Ko oko loa i te fia‵fia o tatou ke maua se polosiua fou mo te tusi fou mo fai akoga faka-te-Tusi Tapu! E ‵talo tatou ki a Ieova ke fakamanuia mai ‵tou taumafaiga ke maua a soko e uke atu. (Mat 28:18-20; 1Ko 3:6-9) E fakaaoga pefea te mea faigaluega fou tenei?

Ona ko te Ke Ola ki te Se-Gata-Mai!, telā ka fakaaoga mo fai sau‵talaga faka-te-Tusi Tapu e tuku mai ei se auala fou ke akoako i ei, e ‵tau o tautali ki fakatakitakiga konei māfai ko fakatoka kae fai a akoga faka-te-Tusi Tapu. *

• Faitau te matatupu kae sau‵tala ki fesili

• Faitau a tusi “faitau” kae fesoasoani ki te tino akoga ke maina i te auala e fakagalue i ei a te tusi faitau

• Pei kae sau‵tala ki vitio, mai te fakaaogaga o so se fesili telā e tuku mai

• Taumafai ke oti te mataupu i loto i akoga takitasi

I te galuega talai, ofo muamua te polosiua ke mafai o iloa aka te fiafia o te tino. (Ke onoono ki te pokisi “ Te Auala ke Ofo te Polosiua ko te Ke Ola ki te Se-Gata-Mai! i te Sau‵talaga Muamua.”) Kafai ko oti ne suke‵suke koulua ki te polosiua kae ko te tino akoga koi manako ke faka‵soko, ko ofo atu ei te tusi kae kamata i te mataupu e 04. Kafai ko oti ne kamata o suke‵suke koulua mo se tino ki te tusi ko te Tauloto ne Tatou io me ko te tusi ko te Tumau i te Alofa o te Atua, ‵fuli ki te tusi ko te Ke Ola ki te Se-Gata-Mai! kae onoono ki te koga e ‵tau o kamata koulua i ei.

ONOONO KI TE VITIO GALI ‵KI ME KO FAI TAU AKOGA, KAE TALI A FESILI KONEI:

• Ne a mea ka tauloto ne tino a‵koga mai te tusi fou?

• Kaia e ‵tau o fakaasi atu te vitio tenei ki tino a‵koga fou?

• Ne a fakamoemoega e fakamalosi ne koe ki te tino akoga ke fai kae ke fakataunu?—Onoono ki te tiati “ Manatu Tāua mo Mea e Mafai o Fai i Vaega Takitasi”