Talu mai i te 2018, a ‵tou mekesini mō tino katoa ne faipati fua ki se mataupu e tasi i te lōmiga kātoa. A mekesini katoa konei ne vaega o te ‵tou Pusa o Mea Faigaluega mo Fai Akoakoga. Tela la, e mafai o fakaaoga ne tatou i te galuega talai. E mafai foki o ave ne tatou a mekesini konei māfai e faima‵laga io me olo ki sitoa. Ne seki fakatoka a mekesini konei ke fai ki ei a akoga faka-te-Tusi Tapu mo tino, kae mafai ne latou o fakaala aka a te fiafia o se tino ki mea faka-te-agaga.

Kafai ko oti ne kamata se sau‵talaga, fakaasi atu se tusi faitau mo se mataupu i te mekesini telā e fiafia ki ei te tino. E pelā me se fakaakoakoga, kafai e tausi a ia ki se kāiga, e fakafesagai atu ki te fanoanoa io me manavase, e mafai o fai atu koe: “Ne fatoa faitau au ki se mataupu gali e uiga ki te mea tenā. E fiafia koe ke fakaasi atu ne au?” Kafai e lavea ne koe tena fiafia, e mafai o tuku atu ne koe se ‵kopi o te mekesini io me lafo atu ki tena tivaisi, faitalia me ko te sau‵talaga muamua. E tiga loa te tufaatuga o mekesini e se ko te ‵tou fakamoemoega tāua, e fesoasoani mai a mekesini ke maua ne tatou a tino kolā e fia‵fia o fai a mea ne tauloto ne latou.—Gal 13:48.