Te Tusi Muamua ki te Kau Kolinito 13:1-13
-
Alofa—te ‵toe auala sili (1-13)
13 Kafai au e faipati ki ‵gana a tāgata mo agelu kae e seai se alofa, e fai fua au e pelā me se atigi kāpa fakalogoa io me se sumepalo tagitagi.*
2 Kae kafai e maua ne au a te meaalofa ko te faiga o valoaga kae malamalama i mea ‵funa kae tapu katoa mo te iloa,+ kae kafai e lasi toku fakatuanaki ke fakamasiki ne au a mauga, kae e seai se alofa, e seai eiloa soku aoga.+
3 Kae kafai e tuku atu ne au aku mea katoa ke fagai ki ei a nisi tino,+ kae kafai e tuku atu ne au toku foitino ke faipati fakamatamata, kae e seai se alofa,+ e seai eiloa se mea aoga e maua ne au mai i ei.
4 A te alofa+ e kufaki+ kae atafai.+ A te alofa e se loto masei.+ E se tavae ne ia a ia eiloa, e se ‵fonu i te fakamatamata,+
5 e se fakamaualuga,*+ e se salasala ki mea mō tena ‵lei eiloa,+ e se kaitaua vave.+ E se ita fakamoemoe.+
6 E se fiafia ki amioga ma‵sei,+ kae e fiafia eiloa ki te munatonu.
7 E onosai i mea katoa,+ e talitonu ki mea katoa,+ e fakamoemoe ki mea katoa,+ e kufaki i mea katoa.+
8 A te alofa e se mafai o gata. Kae kafai e isi ne meaalofa i te faiga o valoaga, ka fakaseai atu a mea konā; kafai e isi ne tino e fai‵pati ki ‵gana kese‵kese, ka fakagata atu te mea tenā; kafai e isi se iloa, ka fakaseai atu eiloa.
9 Me e se katoatoa te ‵tou iloa,+ kae e se katoatoa foki a ‵tou valoaga,
10 kae kafai e oko mai te mea telā e katoatoa, ka fakaseai atu ei te mea telā e se katoatoa.
11 I te taimi koi tamaliki ei au, ne faipati sāle au e pelā me se tamaliki, ne mafaufau e pelā me se tamaliki, ne fakasakosako e pelā me se tamaliki; kae i te taimi tenei ko matua ei au, ne fakaseai atu ne au a uiga fakatamaliki.
12 Me nei la koi ‵nefu te ‵tou ‵kilo e pelā me e ‵kilo atu tatou ki se kilo telā e se maina ‵lei, kae ka maina faka‵lei mai eiloa fakamuli. E se katoatoa toku iloa i te taimi tenei, kae fakamuli loa ka iloa ‵lei eiloa ne au a mea konā e pelā eiloa mo toku iloa faka‵lei ne te Atua.
13 Kae e tumau eiloa a mea e tolu konei: te fakatuanaki, te fakamoemoega, mo te alofa; kae ko te ‵toe mea sili i mea konei, ko te alofa.+
Fakamatalaga mai lalo
^ Se mea tātā pese telā e pukupuku, kae tagitagi māfai ko ‵kini fakatasi.
^ Io me “e se āva.”
