Te Muamua Samuelu 12:1-25
12 Fakamuli loa, ne fai atu a Samuelu ki Isalaelu kātoa: “Ko oti ne fai ne au a mea katoa ne ma‵nako koutou ki ei, kae ne fakasopo aka ne au se tupu ke pule ki luga i a koutou.+
2 Tenei la te tupu telā ka takitaki* ne ia koutou!+ Kae pelā mo au, au ko toeaina kae ko sinā toku ulu, kae ko aku tama konei e ‵nofo mo koutou,+ kae ne takitaki ne au koutou mai te taimi koi talavou ei au ke oko mai ki te aso nei.+
3 Tenei au. Fai mai se otou molimau o ‵teke mai ki a au i mua o Ieova mo tena tino fakaekegina:+ Ko oi ne puke ne au tena pulumakau io me ko tena asini?+ Io me ko oi ne faka‵segina io me ne ta ne au? Ko oi ne talia ne au olotou ‵togi fakakolekole ke fai ei au ke kilo fakaa‵tea?+ Kafai e isi se mea ne talia ne au, ka toe fakafoki atu ne au ki a koutou.”+
4 Tenā ne fai atu ei latou: “E seki faka‵segina ne koe matou io me ta ne koe matou io me talia ne koe se mea mai i lima o se tino i a matou.”
5 Kae ne fai atu a ia ki a latou: “A Ieova ko fai mo molimau ki a koutou, kae ko molimau foki tena tino fakaekegina i te aso nei me e seai se mea ‵se kai fai ne au ke ‵losi mai ei koutou ki a au.” Kae ne fai atu latou: “Ke fai a ia mo molimau.”
6 Ne fai atu a Samuelu ki tino: “A Ieova, telā ne fakaaoga ne ia a Mose mo Alona kae ko ia foki ne aumai ne ia otou tupuga kea‵tea mo te fenua o Aikupito,+ ko fai mo molimau.
7 Kae nei la, ‵tu i otou tulaga, kae ka fakamasino ne au koutou i mua o Ieova e ‵tusa eiloa mo faifaiga amio‵tonu katoa ne fai ne Ieova mō koutou e pelā foki mo otou tupuga.
8 “I te taimi eiloa ne oko atu ei a Iakopo ki Aikupito+ ne kamata o ka‵laga otou tupuga ki a Ieova mō se fesoasoani,+ kae ne uga atu ne Ieova a Mose+ mo Alona ke takitaki ne lāua otou tupuga kea‵tea mo Aikupito kae ke o‵mai latou o ‵nofo i te koga tenei.+
9 Kae ne puli i a latou a Ieova te lotou Atua, kae ne fakatau atu ne ia latou+ ki lima o Sesela+ te takitaki o te kautau a Hasola, mo lima o tino Filisitia,+ mo lima o te tupu o Moapi,+ kae ne taua atu latou ki ei.
10 Kae ne ka‵laga atu latou ki a Ieova mō se fesoasoani+ kae fai atu, ‘A matou ko agasala,+ me ko oti ne tiaki ne matou a Ieova o tavini atu ki a Paala+ mo fakatusa o Asitate;+ nei la, faka‵sao aka matou mai lima o omotou fili ko te mea ke mafai o tavini atu matou ki a koe.’
11 Tenā ne uga atu ei ne Ieova a Ielupaala+ mo Petana mo Iefata+ mo Samuelu+ o faka‵sao koutou mai lima o fili katoa i otou tafa, ko te mea ke mafai o ola koutou mo te saogalemu.+
12 I te taimi ne lavea ei ne koutou i a Nahasa+ te tupu o tino Amoni ko vau o taua mai ki a koutou, ne fai mai faeloa koutou, ‘Ikai, matou e ma‵nako eiloa ke pule matou ne se tupu!’+ faitalia eiloa me i a Ieova te Atua ko te otou Tupu.+
13 Tenei la te tupu ne filifili ne koutou, te tino telā ne fakamolemole mai koutou ki ei. Kiloke! Ko oti ne fakasopo aka ne Ieova se tupu ke pule i a koutou.+
14 Kafai e ma‵taku koutou ki a Ieova+ kae tavini atu ki a ia+ kae faka‵logo foki ki tena leo+ kae e se ‵teke atu koutou ki fakatonuga a Ieova, kae e tau‵tali eiloa a koutou mo te tupu telā e pule i a koutou ki a Ieova te Atua, se mea ‵lei eiloa tenā.
15 Kae kafai e se faka‵logo koutou ki te leo o Ieova kae ‵teke atu koutou ki te fakatonuga a Ieova, ka fakasala eiloa ne Ieova a koutou mo otou tamana.+
16 Nei la, ‵tu i otou tulaga kae ‵kilo atu ki te mea fakaofoofogia tenei ka fai ne Ieova i otou mua.
17 E a, e se tenei te aso ‵kati saito? Ka kalaga atu au ki a Ieova ke faka‵pa mai a fa‵tili kae faka‵to ifo te vaiua; tenā ka iloa kae malamalama ei koutou i te matagā o te mea ne fai ne koutou i mua o Ieova mai te fakamolemole atu ke maua se tupu mō koutou.”+
18 I konā ne kalaga atu ei a Samuelu ki a Ieova, kae ne fai ne Ieova ke ‵pa mai a fa‵tili kae ke ‵to te vaiua i te aso tenā, kae ko tino katoa ne ma‵taku malosi i a Ieova mo Samuelu.
19 Kae ne fai atu a tino katoa ki a Samuelu: “‵Talo ki a Ieova tou Atua mō au tavini,+ me i a matou e se ma‵nako ke ‵mate, me ko oti ne fakaopoopo ne matou ki omotou agasala se isi mea matagā mai te fakamolemole atu ke maua se tupu.”
20 Tenā ne fai atu ei a Samuelu ki tino: “Sa ma‵taku. Ne fai eiloa ne koutou a mea matagā katoa konei. Ke mo a fua koutou e ‵fuli kea‵tea mai te tautali atu ki a Ieova,+ kae tavini atu ki a Ieova mo otou loto kātoa.+
21 Ke mo a ma ‵fuli atu koutou o tau‵tali i atua ‵se,+ kolā e se aoga+ kae e se mafai o fakasao se mea, me i a latou ne tupua sē ma‵losi.
22 Ona ko tena igoa sili,+ ka se tiaki eiloa ne Ieova ana tino,+ me ko oti ne fai ne Ieova a koutou ke fai mo ana tino.+
23 Kae penei mo au, e se taitai eiloa o agasala au ki a Ieova mai te sē ‵talo atu mō koutou, kae ka tumau eiloa au i te akoako o koutou ki te auala ‵lei kae tonu.
24 Ma‵taku fua ki a Ieova,+ kae tavini fakamaoni* atu ki a ia mo otou loto kātoa, kae masaua a mea fakaofoofogia ko oti ne fai ne ia mō koutou.+
25 Kae kafai e fai faeloa ne koutou a mea ma‵sei, ka fakaseai atu eiloa koutou,+ ko koutou fakatasi mo te otou tupu.”+
