Te Tusi Muamua ki te Kau i Tesalonia 3:1-13
3 Tela la, i te taimi ne seki toe mafai ei ne matou o fa‵ki, ne mafau‵fau matou me e ‵lei atu ke ‵nofo mua matou i a matou eiloa i Atenai;+
2 kae ne uga atu ne matou a Timoteo,+ te ‵tou taina mo te tavini a te Atua i te tala ‵lei e uiga ki a Keliso, ke faka‵mautakitaki* koutou kae fakamafanafana atu ki a koutou e uiga ki te otou fakatuanaki,
3 ko te mea ke seai se tino e fakavāivāi* ne puapuaga konei. Me e iloa ne koutou me e se mafai o faka‵seke tatou i te logo‵mae i vaegā mea penā.*+
4 Me i te motou ‵nofoga i a koutou, ko leva ne fai sāle atu matou me ka logo‵mae tatou i puapuaga, kae tenā eiloa te mea ko oti ne tupu, e pelā mo te mea e iloa ne koutou.+
5 Tenā te pogai, i te taimi ne seki toe mafai ei ne au o fa‵ki, ne uga atu taku fekau ke iloa aka ne au a te otou fakamaoni,+ i te mea māfai ko oti ne fakaosoosogina koutou ne te Tino Fakaosooso+ i nisi auala, ko se aoga ei omotou galuega mō koutou.
6 Kae ne fatoa oko mai a Timoteo mai i a koutou+ kae fai mai ki a matou a te tala fakafiafia e uiga ki te otou fakamaoni mo te a‵lofa, kae e masaua faeloa ne koutou a matou kae olioli koutou ke fetaui tatou e pelā eiloa mo matou ki a koutou.
7 Tenā te pogai, e oku taina, ko fakamafanafanagina ei matou i omotou logo‵maega* mo puapuaga katoa ona ko koutou mo te fakamaoni telā ne fakaasi mai ne koutou.+
8 Me e maua ne matou se malosi fou* māfai e tu ‵mautakitaki koutou i te Aliki.
9 E mafai pefea o fakaasi atu ne matou te motou fakafetai ki te Atua e uiga mō koutou ona ko te lasi o te fiafia ko maua ne matou i mua o te Atua ona ko koutou?
10 I po mo ao e ‵talo malosi matou ke mafai o fetaui tatou kae ke fakakatoatoa atu a nai mea kolā e vāivāi i ei te otou fakatuanaki.+
11 Nei la, ke na fakatoka ne te ‵tou Atua telā ko te Tamana mo te ‵tou Aliki ko Iesu se auala mō matou ke olo atu ki a koutou.
12 E se gata i ei, ke na fai foki ne te Aliki ke gasolo aka koutou o tokouke, ao, ke ‵fonu i te alofa o te suā tino ki te suā tino+ mo tino katoa, e pelā eiloa mo matou ki a koutou,
13 ko te mea ke fai ne ia otou loto ke ‵mautakitaki kae tapu e aunoa mo se pona i mua o te ‵tou Atua+ te Tamana, i te taimi e fakatasi mai ei te ‵tou Aliki ko Iesu+ fakatasi mo ana tino tapu katoa.
Fakamatalaga mai lalo
^ Io me “fakamalosi koutou.”
^ Eleni, “fakagasuesue.”
^ Io me “ne ‵tofi aka tatou ki te mea tenei.”
^ Eleni, “ne mea e ‵tau o ‵tupu.”
^ Eleni, “ola matou.”
