Te Muamua Tupu 1:1-53
1 I te taimi tenā a te Tupu ko Tavita ko toeaina,+ ko leva ‵ki a tausaga o tena olaga, kae faitalia eiloa me ‵kafu ne latou a ia ki pulagiketi, e se mafai eiloa a ia o mafanafana.
2 Ne fai atu ana tavini ki a ia: “‵Sala mai aka se tamaliki fafine, se tamafine ‵ma ki toku aliki te tupu, kae ka tausi ne ia te tupu e pelā me se nesi a ia. Ka takato a ia i ou lima ko te mea ke maua ne te tupu se mafanafana.”
3 Ne salasala latou ki se tamaliki fafine tinogali i kogā koga katoa o Isalaelu, kae ne maua ne latou a Apiseka+ te tino Sunema,+ aumai ei a ia ki te tupu.
4 A te tamaliki fafine tenā e tinogali ‵ki, kae ne fai a ia mo fai te nesi a te tupu kae tausi atu ki ei, kae ko te tupu ne seki ‵moe fakatauavaga eiloa mo tou fafine.
5 I te taimi tenā, a Atonia+ te tama tagata a Hakita ne fakamaluga aka ne ia a ia eiloa, ana muna: “Ko au te tino ka fai mo tupu!” Ne faite ne ia se kaliota mō ia eiloa fakatasi mo tāgata faka‵tele solofanua mo tāgata e toko 50 ke ‵tele i ana mua.+
6 Kae ko tena tamana ne seki faipati ‵tonu atu* eiloa ki a ia mai te fai atu: “Kaia ne fai ei ne koe te mea tenei?” A ia foki se tagata taulekaleka, kae ko tena mātua ne fanau ne ia a ia mai tua o Apisaloma.
7 Ne faipati a ia ki a Ioapo te tama tagata a Seluia mo Aviata+ te faitaulaga, kae ne fesoasoani atu lāua ki a Atonia kae ‵lago atu foki ki a ia.+
8 Kae ko Satoka+ te faitaulaga, Penaia+ te tama tagata a Ieoiata, Natano+ te pelofeta, Simei,+ Lei mo toa ‵mafi+ a Tavita ne seki ‵lago atu eiloa ki a Atonia.
9 Fakamuli ifo, ne ofo atu ne Atonia se taulaga+ o mamoe, pulumakau mo manu puta‵puta i tafa o te fatu o Soheleti, telā e pili ki Enelokelo, kae ne ‵kami ne ia ana taina katoa kolā ko tama tāgata a te tupu, mo tāgata Iuta katoa kolā ko tavini a te tupu.
10 Kae ne seki ‵kami ne ia a Natano te pelofeta, Penaia mo toa ‵mafi io me ko Solomona tena taina.
11 Tenā ne fai atu ei a Natano+ ki a Patisepa+ te mātua+ o Solomona: “E a, e se logo koe i a Atonia+ te tama tagata a Hakita ko fai nei mo tupu, kae e seai eiloa se mea a te ‵tou aliki ko Tavita e iloa e uiga ki ei?
12 Tela la, fakamolemole vau aka ke fai atu toku manatu, ko te mea ke mafai o fakasao ne koe tou ola mo te ola o tau tama ko Solomona.+
13 Fanatu ki te Tupu ko Tavita kae fai atu ki ei, ‘E a, e se ko koe e toku aliki te tupu ne tauto mai ki tau tavini, penei: “A tau tama tagata ko Solomona ka fai mo tupu i oku tua, kae ko ia te tino ka sagasaga i luga i toku nofogaaliki”?+ Kae kaia la ko fai ei a Atonia mo fai te tupu?’
14 Kae koi nofo atu koe i konā o faipati ki te tupu, ka ulu atu eiloa au mai ou tua o fakamaoni aka te ‵tonu o au pati.”
15 Ne fanatu a Patisepa ki te tupu i loto i tena potu. A te tupu ko toeaina ‵ki, kae ko Apiseka+ te tino Sunema e tausi ne ia te tupu.
16 Tenā ne totuli kae ifo atu a Patisepa ki te tupu, kae ne fai atu te tupu: “Se a te mea e manako koe ki ei?”
17 Ne tali atu tou fafine: “Toku aliki, ko koe eiloa ne tauto mai ki tau tavini e auala i a Ieova tou Atua, ‘A tau tama ko Solomona ka fai mo tupu i oku tua, kae ko ia te tino ka sagasaga i luga i toku nofogaaliki.’+
18 Kae kiloke! A Atonia ko fai nei mo tupu, kae e seai eiloa se mea a toku aliki te tupu e iloa e uiga ki ei.+
19 Ne ofo atu ne ia a pulumakau, manu puta‵puta mo mamoe e uke kae ne ‵kami foki ne ia a tama tāgata katoa a te tupu mo Aviata te faitaulaga mo Ioapo te takitaki o te kautau;+ kae e seki ‵kami ne ia a tau tavini ko Solomona.+
20 Nei la, e toku aliki te tupu, a tino Isalaelu katoa ka ‵kilo mai ki a koe ke fai atu ki a latou me ko oi te tino ka sagasaga i luga i te nofogaaliki o toku aliki te tupu mai tua o ia.
21 Me i te taimi eiloa e takato ifo ei toku aliki te tupu o malō‵lo fakatasi mo ana tupuga, ko au eiloa mo taku tama ko Solomona ko fai pelā me ne fili.”
22 Kae koi faipati atu tou fafine ki te tupu, kae ulu mai a Natano te pelofeta ki loto.+
23 Ne fakailoa fakavave atu ki te tupu penei: “Tenei te pelofeta ko Natano!” Ne fanatu a ia ki mua o te tupu kae punou ifo ki lalo.
24 Tenā ne fai atu ei a Natano, “Toku aliki te tupu, e mata, e isi sau pati ne fai, ‘A Atonia ka fai mo tupu i oku tua, kae ko ia te tino ka sagasaga i luga i toku nofogaaliki’?+
25 I te aso nei, ko oti ne fanatu tou tagata o ofo a taulaga+ pulumakau, manu puta‵puta mo mamoe e uke, kae ‵kami ne ia a tama tāgata katoa a te tupu mo takitaki o te kautau mo Aviata te faitaulaga.+ A latou konā e ‵kai kae inu fakatasi mo ia, kae fai aka faeloa penei, ‘Ke ola leva te Tupu ko Atonia!’
26 Kae ne seki ‵kami ne ia au, tau tavini, io me ko Satoka te faitaulaga, io me ko Penaia+ te tama tagata a Ieoiata, io me ko tau tavini ko Solomona.
27 E mata, ne talia ne toku aliki te tupu a te mea tenei kae e se fakailoa mai ki tau tavini me ko oi e ‵tau o sagasaga i te nofogaaliki o toku aliki te tupu mai tua o ia?”
28 Ne tali atu te Tupu ko Tavita: “Fai ki a Patisepa ke vau ki a au.” Tenā ne fanatu ei tou fafine kae tu i mua o te tupu.
29 Tenā ne fai ei ne te tupu se tautoga: “E pelā eiloa mo Ieova e ola, te tino telā ne fakasao ne ia au mai puapuaga katoa,+
30 e pelā eiloa mo taku tautoga ne fai ki a koe e auala i a Ieova te Atua o Isalaelu, penei, ‘A tau tama ko Solomona ka fai mo tupu i oku tua, kae ko ia te tino ka sagasaga i luga i toku nofogaaliki o sui au!’ tenā te mea ka fai ne au i te aso nei.”
31 Tenā ne totuli ifo ei a Patisepa kae punou ki lalo i mua o te tupu kae fai atu: “Ke ola ki te se-gata-mai a toku aliki te Tupu ko Tavita!”
32 I konā eiloa ne fai atu te Tupu ko Tavita: “Fai ki a Satoka te faitaulaga, Natano te pelofeta mo Penaia+ te tama tagata a Ieoiata+ ke o‵mai.” Tenā ne o‵mai ei latou ki mua o te tupu.
33 Ne fai atu te tupu ki a latou: “Puke ne koutou a tavini a te otou aliki, kae fai a taku tama ko Solomona ke tele i luga i taku miula,*+ kae takitaki atu a ia ki lalo i Kaiona.+
34 Ka fakaeke ne Satoka te faitaulaga mo Natano te pelofeta a ia+ ke fai mo tupu o Isalaelu i konā; ko ili ei te pu kae fai atu, ‘Ke ola leva te Tupu ko Solomona!’+
35 Ko tau‵tali mai ei koutou i a ia māfai ko foki mai, kae ka ulu mai a ia ki loto o sagasaga i toku nofogaaliki; kae ka fai a ia mo fai te tupu o sui au, kae ka ‵tofi ne au a ia ke fai mo takitaki o Isalaelu mo Iuta.”
36 I konā eiloa ne fai atu a Penaia te tama tagata a Ieoiata ki te tupu: “Amene! Ke fakamautinoa eiloa ne Ieova te Atua o toku aliki a te mea tenei.
37 E pelā eiloa mo Ieova ne fakatasi atu ki toku aliki te tupu, ke fakatasi atu foki a ia ki a Solomona,+ kae ke fai ne Ia tena nofogaaliki ke sili atu i te nofogaaliki o toku aliki te Tupu ko Tavita.”+
38 Tenā ne olo ifo ei a Satoka te faitaulaga, Natano te pelofeta, Penaia+ te tama tagata a Ieoiata mo tino Keleti mo tino Peletite+ kae fai ne latou a Solomona ke tele i luga i te miula a te Tupu ko Tavita,+ kae avatu ne latou a ia ki Kaiona.+
39 Ne puke ne Satoka te faitaulaga a te fagu* sinu+ mai te faleie+ kae fakaeke ne ia a Solomona,+ kae ne kamata o ili ne latou a te pu, kae ko tino katoa ne kamata o ka‵laga atu: “Ke ola leva te Tupu ko Solomona!”
40 Mai tua i konā ne tau‵tali atu a tino katoa i a ia kae olo aka ki luga, e fakatagi‵tagi a faili kae fia‵fia malosi, kae ne galulu ei te laukele ona ko te logoa.*+
41 Ne lagona ne Atonia mo tino katoa kolā ne ‵kami ne ia a te mea tenā i te lotou otiga ne ‵kai.+ I te lagonaga eiloa ne Ioapo a te tagi o te pu, ne fai aka a ia: “Kaia e logoa malosi ei te fakai?”
42 Kae koi faipati a ia, ne oko mai a Ionatana+ te tama tagata a Aviata te faitaulaga. Tenā ne fai atu ei a Atonia: “Vau, a koe se tagata ‵lei,* kae e ‵tau o aumai ne koe se tala ‵lei.”
43 Kae ne tali atu a Ionatana ki a Atonia: “Ikai! A te ‵tou aliki te Tupu ko Tavita ko oti ne fai ne ia a Solomona ke fai mo tupu.
44 Ne uga atu ne te tupu a Satoka te faitaulaga, Natano te pelofeta, Penaia te tama tagata a Ieoiata mo tino Keleti mo tino Peletite ke olo fakatasi mo ia, kae fai ne latou a ia ke tele i luga i te miula a te tupu.+
45 Tenā ne fakaeke ei ne Satoka te faitaulaga mo Natano te pelofeta a Solomona ke fai mo tupu i Kaiona. Oti aka, o‵mai ei latou mo te fia‵fia mai konā, kae ne logoa valevale te fakai. Tenā te logoa telā ne lagona ne koutou.
46 E se gata i ei, ko sagasaga nei a Solomona i luga i te nofogaaliki o te tupu.
47 A te suā mea foki, ne o‵mai a tavini a te tupu o fakamanuia ki te ‵tou aliki te Tupu ko Tavita, olotou muna, ‘Ke fai eiloa ne tou Atua a te igoa o Solomona ke takutakua atu i lō tou igoa, kae ke fai foki ne Ia tena nofogaaliki ke maluga atu i lō tou nofogaaliki!’ Tenā ne punou ifo ei te ulu o te tupu i luga i tena moega.
48 Kae ne fai atu foki te tupu, ‘Ke vikia a Ieova te Atua o Isalaelu telā ko oti ne fakasopo ne ia i te aso nei se tino ke sagasaga i luga i toku nofogaaliki kae talia ne ia ke lavea eiloa ne au a te mea tenei ki oku mata!’”
49 Kae ko tino katoa kolā ne ‵kami ne Atonia ne kamata o pole‵pole, kae ne ‵tu aka latou taki tokotasi o olo i olotou auala.
50 Ne mataku foki a Atonia i a Solomona, tenā ne tu aka ei tou tagata kae fano o puke ‵mau ki suki o te fatafaitaulaga.+
51 Ne avatu te fakailoaga ki a Solomona: “Atonia ko mataku i te Tupu ko Solomona; kae taofi ‵mau ana lima ki suki o te fatafaitaulaga, ana muna, ‘Fai ke tauto muamua mai te Tupu ko Solomona ki a au me ka se tamate ne ia tena tavini ki te pelu.’”
52 Tenā ne fai atu ei a Solomona: “Kafai e fai ne ia a mea aoga, ka seai sena laulu e tō ki te laukele; kae kafai e maua atu e fai ne ia a mea ma‵sei,+ ka tamate eiloa a ia.”
53 Ne avatu te fekau a te Tupu ko Solomona ki ei ke fanaifo mai te fatafaitaulaga. Tenā ne vau ei a ia ki loto i te fale kae ifo atu ki te Tupu ko Solomona, kae fai atu a Solomona ki ei: “Fano ki tou fale.”
Fakamatalaga mai lalo
^ Io me “fakalogo‵mae atu ki ana lagonaga; ‵teke ki a ia.”
^ Io me “miula fafine.”
^ Io me “sau o te mamoe.”
^ Epelu, “ne mavaelua.”
^ Io me “aoga.”
