Te Lua Nofoaiga Tupu 18:1-34
18 Ne maua ne Iosefatu a koloa e uke penā foki loa mo te ‵malu sili,+ kae ne fai ne ia ke avaga se tino i tena kāiga mo te kāiga o Aapo.+
2 I tausaga fakamuli ifo ne fanatu a ia ki a Aapo i Samalia,+ kae ne ofo atu ne Aapo a taulaga o mamoe mo pulumakau e uke mō ia mo tino kolā ne olo fakatasi atu mo ia. Kae ne fakamalosi atu a ia ki tou tagata ke fano o taua ki Lamota-kileata.+
3 Tenā ne fai atu ei a te tupu o Isalaelu ko Aapo ki te tupu o Iuta ko Iosefatu: “E a, e vau koe ke olo tāua ki Lamota-kileata? Ne tali atu tou tagata: “Au e ‵pau eiloa mo koe, kae ko oku tino e ‵pau eiloa mo ou tino kae ka ‵lago atu ki a koe i te taua.”
4 Kae ne fai atu a Iosefatu ki te tupu o Isalaelu: “Fakamolemole, fesili muamua ki a Ieova me ne a ana pati.”+
5 Ne fakamaopoopo mai ne te tupu o Isalaelu a te kau pelofeta, e toko 400 tāgata, kae fai atu ki a latou: “E mata, e ‵tau mo matou o olo o taua atu ki Lamota-kileata, io me se ‵tau mo au o fano?” Ne fai atu latou: “Fano, kae ka tuku atu ne te Atua tonu te fakai ki lima o te tupu.”
6 Tenā ne fai atu ei a Iosefatu: “E a, e seai aka foki se pelofeta a Ieova i konei?+ E mafai o fesili atu tatou e auala i a ia.”+
7 I konā ne fai atu ei te tupu o Isalaelu ki a Iosefatu: “E toe tokotasi te tagata+ telā e mafai o fesili atu tatou ki a Ieova e auala i a ia; kae ko au e takalialia i a ia, me e se ‵valo sāle ne ia a mea ‵lei e uiga ki a au, kae ko mea ma‵sei faeloa.+ A ia ko Mikaio te tama tagata a Imila.” Kae ne fai atu a Iosefatu: “E se ‵tau o fai ne te tupu a vaegā pati penā.”
8 Ne kalaga atu a te tupu o Isalaelu ki se ofisa kae fai atu: “Aumai fakavave a Mikaio te tama tagata a Imila.”+
9 A te tupu o Isalaelu mo Iosefatu te tupu o Iuta ne saga‵saga eiloa i lā nofogaaliki takitasi, kae ‵pei ki lā gatu fakatupu; ne saga‵saga lāua i te koga tuki saito i te mataloa o Samalia, kae ko pelofeta katoa e fai olotou faifaiga fakapelofeta i lā mua.
10 Tenā ne faite ei ne Setekaia te tama tagata a Kenaana ne sau fiti ma ia kae fai atu: “Konei a pati a Ieova ne fai mai, ‘Konei a mea ka ‵ta* ne koutou ki ei a tino Sulia ke oko ki te taimi ko fakaseai atu ei latou.’”
11 E ‵pau eiloa a mea ne ‵valo mai ne nisi pelofeta katoa, olotou muna: “Fano ki Lamota-kileata kae ka manuia koe;+ ka tuku atu ne Ieova a te fakai ki lima o te tupu.”
12 A te avefekau telā ne fano o ‵kami mai a Mikaio ne fai atu ki a ia: “Kiloke! A pati katoa a te kau pelofeta e fiafia ki ei a te tupu. Fakamolemole, fai foki ke ‵pau au pati mo olotou pati,+ kae fai atu se pati ‵lei.”+
13 Kae ne fai atu a Mikaio: “E pelā eiloa mo Ieova e ola, so se pati e fai mai ne toku Atua ka faipati atu ne au.”+
14 Tenā ne fanatu ei a ia ki te tupu, kae ne fesili atu a te tupu ki a ia: “Mikaio, e mata, e ‵tau mo matou o olo o taua atu ki Lamota-kileata io me e se ‵tau mo au o fano?” I konā ne tali atu a ia: “Olo kae ka manuia eiloa koutou; ka tuku atu latou ki otou lima.”
15 Ne fai atu te tupu ki a ia: “Ko fakafia taimi ne fai ei ne au koe ke tauto mai ke mo a ma faipati mai ne koe ki a au se isi mea aka kae na ko te munatonu i te igoa o Ieova?”
16 Tenā ne fai atu ei a ia: “E lavea ne au a tino Isalaelu katoa e salalau i luga i mauga, e pelā me ne mamoe e seai se lotou tausi mamoe.+ Muna a Ieova: ‘A latou konei e seai se lotou matai. Tuku atu a tino taki tokotasi ke ‵foki ki olotou fale mo te filemu.’”
17 Tenā ne fai atu ei te tupu o Isalaelu ki a Iosefatu: “E a, ne seki fai atu au ki a koe, ‘Ka se ‵valo ne ia a mea ‵lei e uiga ki a au, kae ko mea ma‵sei fua’?”+
18 Ne fai atu a Mikaio: “Tela la, faka‵logo mai ki pati a Ieova: E lavea ne au a Ieova e sagasaga i luga i tena nofogaaliki+ kae ko kautau katoa o te lagi+ e ‵tu i tena feitu fakaatamai mo tena feitu fakamaui.+
19 Tenā ne fai aka ei a Ieova, ‘Ko oi ka fakaloiloi ne ia a te tupu o Isalaelu ko Aapo, ko te mea ke fano a ia ki Lamota-kileata ke takavale i ei?’ Kae ne fai mai ne se agelu e tokotasi se manatu e tasi, kae fai mai ne te suā agelu se isi manatu aka.
20 Tenā ne vau ei se agelu+ kae tu atu i mua o Ieova, ana muna, ‘Ka fakaloiloi ne au a ia.’ Ne fesili atu a Ieova, ‘Ka fai pefea ne koe te mea tenā?’
21 Ne tali atu a ia, ‘Au ka fano o fai ana pelofeta katoa ke ‵loi.’ Tenā ne fai atu ei a ia, ‘Ka fakaloiloi eiloa ne koe a ia, kae sili atu i ei, ka manuia eiloa koe. Fano o fai te mea tenā.’
22 I te taimi nei ko oti ne fai ne Ieova au pelofeta katoa ke ‵loi,+ kae ko Ieova ko oti ne folafola mai ne ia a te puapuaga ka oko ki a koe.”
23 Ne vau a Setekaia+ te tama tagata a Kenaana kae ‵pa ne ia a Mikaio+ i te kalafou,+ ana muna: “Ko te auala fea ne fakaseke ei te agaga o Ieova mai i a au o faipati atu ki a koe?”+
24 Ne tali atu a Mikaio: “Kiloke! Ka iloa ne koe te auala i te aso e ulu atu ei koe ki te potu tafa ki loto o ‵muni i ei.”
25 Tenā ne fai atu ei te tupu o Isalaelu: “Puke a Mikaio kae ave ki a Amone te pule o te fakai mo Ieoasa te tama tagata a te tupu.
26 Fai atu ki a lāua penei: ‘Konei a pati a te tupu ne fai mai: “Puke te tagata tenei o ‵loka i te falepuipui+ kae fakati‵titi ana meakai mo vai ke oko ki te taimi e foki mai ei au mo te filemu.”’”
27 Kae ne fai atu a Mikaio: “Kafai e foki mai koe mo te filemu, a Ieova e seki faipati mai ki a au.”+ Kae ne toe fai atu a ia: “Tino katoa, ke masaua ne koutou te mea tenā.”
28 Tenā ne olo ei a te tupu o Isalaelu mo Iosefatu te tupu o Iuta ki Lamota-kileata.+
29 Ne fai atu te tupu o Isalaelu ki a Iosefatu: “Au ka ‵funa oku foliga kae fano ki te taua, kae e ‵tau mo koe o pei ou gatu fakatupu.” Tenā ne ‵funa ei ne te tupu o Isalaelu ana foliga kae olo atu lāua o taua.
30 Ne fakatonu atu te tupu o Sulia ki ana tāgata pule i kaliota: “Sa taua atu ki so se tino, faitalia me se tino malalo io me se tino maluga, kae na ko te tupu fua o Isalaelu.”
31 I te laveaga eiloa ne tāgata pule i kaliota a Iosefatu, ne fai aka latou: “Tenei eiloa te tupu o Isalaelu.” Tenā ne ma‵fuli atu ei latou o taua atu ki a ia; kae ko Iosefatu ne kamata o kalaga ki se fesoasoani,+ kae ne fesoasoani atu a Ieova ki a ia, kae ne fai ne te Atua a latou ke olo kea‵tea mai i a ia.
32 I te iloaga ne tāgata pule i kaliota me e se ko te tupu o Isalaelu, ne seki toe tau‵tali atu latou i ana tua.
33 Kae e tokotasi te tagata ne sona* sana atu fua tena matasana kae tu i te tupu o Isalaelu i te sokoga o tena gatu tau fiti. Tenā ne fai atu ei te tupu ki tena tino fakatele kaliota: “‵Fuli o ave au kea‵tea mo te taua, i a au ko pakia masei.”+
34 Ne malosi eiloa te taua i te aso tenā, kae ne ‵tau o fakatu aka te tupu o Isalaelu i loto i te kaliota, kae fakasaga atu ki te kau Sulia ke oko ki te afiafi; kae ne mate eiloa a ia i te taimi ne tō ei te mata o te la.+
