Te Lua Nofoaiga Tupu 24:1-27
24 Ko fitu a tausaga o Ioasa i te taimi ne fai ei a ia mo fai te tupu,+ kae ne pule a ia i Ielusalema i tausaga e 40. A te igoa o tena mātua ko Sipea mai Pelesepa.+
2 Ne fai faeloa ne Ioasa a te mea tonu i te kilokiloga a Ieova i aso katoa o Ieoiata te faitaulaga.+
3 Ne filifili aka ne Ieoiata ne avaga e tokolua ma ia, kae ne fai a ia mo tamana ki tama tāgata mo tama fāfine.
4 Fakamuli ifo, ne manako malosi a Ioasa ke toe fakafou aka a te fale o Ieova.+
5 Ne fakamaopoopo mai ne ia a faitaulaga mo tino Levi kae fai atu ki a latou: “Olo atu ki fakai o Iuta o ‵tae mai a tupe mai tino Isalaelu katoa ke fakafou ki ei te fale o te otou Atua+ i tausaga takitasi; kae e ‵tau o gasue‵sue fakavave koutou o fai te mea tenā.” Kae ne seki gasue‵sue fakavave a tino Levi.+
6 Tenā ne ‵kami mai ei ne te tupu a Ieoiata te faitaulaga pule kae fai atu ki ei:+ “Kaia e seki fakatonu ei koe ki tino Levi ke aumai mai Iuta mo Ielusalema a te lafoga tapu telā ne fakatonu mai ne Mose+ te tavini a Ieova, ko te lafoga tapu a te fakapotopotoga o Isalaelu, mō te faleie o te Feagaiga?+
7 Me i tama tāgata a Atalia,+ te fafine masei tenā, ne ulu atu ki te fale o te Atua tonu,+ kae ne fakaaoga ne latou a mea tapu katoa i te fale o Ieova mō Paala.”
8 Mai te fakatonuga a te tupu, ne faite ei se pokisi+ kae tuku i tua i te mataloa o te fale o Ieova.+
9 Oti aka, ne avatu se fekau ki Iuta mo Ielusalema kātoa ke aumai ki a Ieova a te lafoga tapu+ telā ne fakatonu atu ne Mose te tavini a te Atua tonu ki Isalaelu i te koga lavaki.
10 Ne fia‵fia a pelenise katoa mo tino katoa,+ kae ne aumai faeloa ne latou a meaalofa tupe o faulu ki te pokisi ke oko ki te taimi ko ‵fonu ei.
11 So se taimi e aumai ei ne tino Levi a te pokisi ki te tupu kae lavea ne latou a te uke o tupe i loto i ei, e o‵mai a te failautusi a te tupu mo te tino fesoasoani a te faitaulaga pule o ‵ligi a mea i te pokisi+ ki tua, ko toe fakafoki ei ki te koga e tuku i ei. Tenā te mea e fai ne latou i aso takitasi, kae uke ‵ki olotou tupe ne ‵tae.
12 Ko tuku atu ei ne te tupu mo Ieoiata a tupe konā ki a latou kolā e onoono ki te faiga o te galuega i te fale o Ieova, ko ‵togi mai ei ne latou a tino ‵kati fatu mo tufuga faite mea ke fakafou te fale o Ieova,+ e pelā foki mo tino ga‵lue i fiti mo kopa ke toe faka‵lei aka te fale o Ieova.
13 Ne kamata a te galuega ne latou kolā e onoono ki te faiga o te galuega, kae ne gasolo ki mua te toe faka‵leiga o mea mai lalo i te lotou tausiga, kae ne toe fakafou ne latou te fale o te Atua tonu ki tena tulaga mua kae tai fakamalosi aka ne latou.
14 I te lotou otiga eiloa, ne aumai ne latou a tupe kolā ne ‵toe ki te tupu mo Ieoiata kae ne fakaaoga ne latou mo faite a meāfale o te fale o Ieova, meāfale mō te taviniga mo te ofoatuga o taulaga mo ipu mo meāfale aulo mo siliva.+ Kae e ofo sāle ne latou a taulaga ‵sunu+ i te fale o Ieova i aso katoa ne ola i ei a Ieoiata.
15 I te taimi ko toeaina ei a Ieoiata kae ko lotomalie foki ki tena olaga, mate ei a ia. Ko 130 ana tausaga i te taimi ne mate ei.
16 Ne tanu ne latou a ia fakatasi mo nisi tupu+ i te Fakai o Tavita, ona ko te mea ne fai ne ia a mea ‵lei i Isalaelu+ e uiga ki te Atua tonu mo Tena fale.
17 Mai tua o te mate o Ieoiata, ne o‵mai a pelenise o Iuta kae ifo ki lalo i te tupu, kae ne fakalogo te tupu ki a latou.
18 Ne tiaki ne latou te fale o Ieova te Atua o olotou tupuga kae kamata o tavini atu ki te pou lakau tapu* mo tupua, tenā ne kaitaua ei a te Atua ki Iuta mo Ielusalema ona ko te lotou agasala.
19 Ne uga atu faeloa ne ia a pelofeta ki a latou ke faka‵foki mai latou ki a Ieova, kae fakamalosi atu faeloa ki a latou, kae ne ita latou ma faka‵logo.+
20 Ne oko atu te agaga o te Atua ki luga i a Sakalia te tama tagata a Ieoiata+ te faitaulaga, kae ne tu atu a ia i mua o tino kae fai atu ki a latou: “Konei a pati a te Atua tonu ne fai mai, ‘Kaia e fakaseaoga ei ne koutou a fakatonuga a Ieova? A koutou ka se manuia! Ona ko te mea ne tiaki ne koutou a Ieova, ka tiaki foki ne ia a koutou.’”+
21 Kae ne fai ne latou se togafiti ki a ia+ kae peipei ne latou ki fatu e ‵tusa mo te fakatonuga a te tupu i te koga ateatea o te fale o Ieova.+
22 Kae ne seki masaua eiloa ne Ioasa a te alofa fakamaoni ne fakaasi atu ne tena tamana* ko Ieoiata ki a ia, kae ne tamate ne ia tena tama tagata, telā ne fai mai i te taimi ko pili ei o mate: “Ke fakasala eiloa koe ne Ieova ona ko au mea ne fai.”+
23 I te kamataga o te tausaga ne o‵mai te kautau a Sulia o taua atu ki a Ioasa, kae ne fakamasei ne latou a Iuta mo Ielusalema.+ Tenā ne tamate ei ne latou a pelenise+ katoa o tino, kae ave ne latou a mea katoa ne maua i te taua ki te tupu o Tamaseko.
24 E tiga eiloa e mu‵tana te aofaki o tāgata i te kautau a Sulia, ne talia ne Ieova ke fakatakavale ne latou se kautau lasi ‵ki,+ ona ko te mea ne tiaki ne tino konā a Ieova te Atua o olotou tupuga; tenā ne fakaoko ei ne latou* ki a Ioasa a te fakasalaga.
25 Kae i te lotou ologa kea‵tea mai i a ia (me ne tiaki ne latou a ia kae ko pakia malosi tou tagata*), ne fai ne ana tavini se togafiti ki a ia me ne fakamaligi ne ia a toto o tama tāgata a Ieoiata+ te faitaulaga. Ne tamate ne latou a ia i luga eiloa i tena moega.+ Ne mate a ia kae ne tanu ne latou a ia i te Fakai o Tavita,+ kae ne seki tanu ne latou a ia i te koga e tanu ei a tupu.+
26 Konei a tino ne fai ne latou te togafiti+ ki a ia: ko Sapata te tama tagata a Simeata te fafine Amoni mo Ieosepata te tama tagata a Simelita te fafine Moapi.
27 E tusi katoa a mea e uiga ki ana tama tāgata mo folafolaga e uke e uiga ki a ia+ mo te fakafouga o te fale o te Atua tonu,+ i tusitusiga i Tusi o Tupu. Kae ko tena tama tagata ko Amasia ne fai mo tupu e sui ei a ia.
Fakamatalaga mai lalo
^ Telā ko te tamana o Sakalia.
^ Telā ko tino Sulia.
^ Io me “fakatasi mo masaki e uke.”
