Te Lua Samuelu 24:1-25
24 Ne toe kaitaua a Ieova ki tino Isalaelu+ i te taimi ne fakamalosi atu ei se tokotasi ki a Tavita* penei: “Fano o lau aka+ a tino Isalaelu mo tino Iuta.”+
2 Ne fai atu te tupu ki a Ioapo+ te takitaki o te kautau telā ne ‵nofo mo ia: “Fakamolemole fanatu ki matakāiga katoa o Isalaelu, mai Tanu ke oko ki Pelesepa,+ kae tusi ki lalo te lotou aofaki ko te mea ke iloa ne au te aofaki o tino katoa.”
3 Kae ne fai atu a Ioapo ki te tupu: “Ke fakatokouke eiloa ne Ieova tou Atua a tino faka-100 taimi, kae ke lavea eiloa ne toku aliki te tupu a te mea tenei ki ana mata, kae kaia e manako ei toku aliki te tupu ke fai se vaegā mea penei?”
4 Kae ne manumalo eiloa te fakatonuga a te tupu i a Ioapo mo takitaki o te kautau. Tenā ne olo atu ei a Ioapo mo takitaki o te kautau mai mua o te tupu o tusi ki lalo te aofaki o tino Isalaelu.+
5 Ne olo atu latou ki te suā feitu o te Iolitana kae ma‵nava i Aloela,+ i te feitu fakaatamai* o te fakai i te kogaloto o te vanu, telā e tafa ki tino Kato o fano ki Iaseli.+
6 Mai tua i konā ne olo atu latou ki Kileata+ mo te fenua ko Tatimosi kae toe faka‵soko atu ki Tanu-iana kae olo ki Saitonu.+
7 Tenā ne olo atu ei latou ki te taoa malosi o Tulo+ mo fakai katoa o tino Hivi+ mo tino Kanana, kae fakamuli ifo ne oko atu latou ki te Nekepi+ o Iuta i Pelesepa.+
8 Ne olo atu latou ki fenua katoa kae oko atu ki Ielusalema i te fakaotiga o te iva masina mo aso e 20.
9 Ne tuku atu ne Ioapo ki te tupu te aofaki o tino kolā ne fakamau olotou igoa. A te aofaki o toa ‵mafi o Isalaelu kolā e isi ne olotou pelu e toko 800,000, kae ko tāgata Iuta e toko 500,000.+
10 Kae ne seki toka te loto*+ o Tavita i te otiga ne lau aka ne ia a tino. Tenā ne fai atu ei a Tavita ki a Ieova: “Ko oti ne fai ne au se agasala+ masei ‵ki i te faiga o te mea tenei. I te taimi nei, e Ieova, fakamolemole fakamagalo mai te mea ‵se+ a tau tavini, me ko oti ne fai ne au se mea valea ‵ki.”+
11 I te taimi ne tu aka ei Tavita i te tafataeao, ne oko mai te fekau a Ieova ki a Kato+ te pelofeta, te tino fakamatala fakaasiga a Tavita, ana muna:
12 “Fano o fai atu ki a Tavita, ‘Konei a pati ne fai mai ne Ieova: “E tolu a mea ka tuku atu ne au ki a koe. Filifili aka a te mea telā e ‵tau o fai ne au ki a koe.”’”+
13 Tenā ne vau ei a Kato ki a Tavita kae fai atu ki ei: “E a, e ‵tau o poko se oge i tou fenua i loto i se fitu tausaga?+ Io me e ‵tau o tele koe kea‵tea i se tolu masina mai ou fili kolā e salasala ki a koe?+ Io me e ‵tau o poko se famai i aso e tolu i tou fenua?+ Nei la, ke mafaufau faka‵lei ki te tali e ‵tau o fai atu ne au ki te Atua telā ne uga mai ne ia au.”
14 Ne fai atu a Tavita ki a Kato: “Ko oko loa au i te mafatia. Fakamolemole tuku atu matou ki lima o Ieova,+ me e lasi ‵ki tena alofa fakamagalo;+ kae sa tuku atu au ki lima o se tagata.”+
15 Tenā ne fai ei ne Ieova ke poko se famai+ i Isalaelu mai te tafataeao ke oko ki tena taimi tonu, telā ne ‵mate+ i ei a tino e toko 70,000 mai Tanu ki Pelesepa.+
16 I te taimi ne ‵fola atu ei te lima o te agelu o fakamasei a Ielusalema, ne fanoanoa a Ieova ona ko te fakalavelave tenā,+ kae ne fai atu a ia ki te agelu telā e aumai ne ia te fakamaseiga ki tino: “Ko lava! Tuku ki lalo tou lima.” A te agelu a Ieova ne nofo pili atu ki te koga tuki saito o Alauna+ te tino Iepuse.+
17 I te laveaga ne Tavita a te agelu telā ne tamate ne ia a tino, ne fai atu a ia ki a Ieova: “Ko au te tino ne agasala, kae ko au te tino fai mea ‵se; kae ko mamoe konei+—ne a olotou mea ne fai? Fakamolemole, fakaoko mai tou lima ki a au, mo te kāiga o toku tamana.”+
18 Ne fanatu a Kato ki a Tavita i te aso tenā kae fai atu ki ei: “Fano o fakatu se fatafaitaulaga mō Ieova i te koga tuki saito o Alauna te tino Iepuse.”+
19 Tenā ne fano ei a Tavita e ‵tusa mo te pati a Kato, e pelā eiloa mo te fakatonuga a Ieova.
20 I te kiloifoga a Alauna kae lavea ne ia te tupu mo ana tavini e o‵mai ki a ia, ne fano fakavave a Alauna ki tua kae ifo ki te tupu mo ana mata e ‵fuli ki te laukele.
21 Ne fesili atu a Alauna: “Kaia ne vau ei a toku aliki te tupu ki tena tavini?” Ne tali atu a Tavita: “Ke ‵togi mai i a koe a te koga tuki saito ke fakatu aka i ei te fatafaitaulaga mō Ieova, ko te mea ke fakagata aka te mala tenei e poko i tino.”+
22 Kae ne fai atu a Alauna ki a Tavita: “Toku aliki te tupu, puke te mea tenā kae ofo atu so se mea telā e ‵lei ki a ia. Konei a pulumakau mo fai te taulaga ‵sunu mo te mea tuki saito mo te mea faigaluega a te pulumakau mo fai a fafie.
23 A mea katoa konei, e te tupu, e tuku atu ne Alauna ki te tupu.” Tenā ne fai atu ei a Alauna ki te tupu: “Ke talia eiloa koe ne Ieova tou Atua.”
24 Kae ne fai atu te tupu ki a Alauna: “Ikai, e ‵tau eiloa o ‵togi ne au. E se mafai o ofo atu ne au a taulaga ‵sunu ki a Ieova toku Atua kolā e seki ‵togi ne au.” Tenā ne ‵togi ei ne Tavita a te koga tuki saito mo pulumakau ki te 50 sekela*+ siliva.
25 Kae ne faite ne Tavita se fatafaitaulaga+ ki a Ieova i konā kae ofo atu i ei a taulaga ‵sunu mo taulaga ‵kai fakatasi. Tenā ne saga atu ei a Ieova ki te fakamolemole tenā mō te fenua,+ kae ne gata ei te mala i Isalaelu.
Fakamatalaga mai lalo
^ Io me “i te taimi ne fakamalosi atu ei ki a Tavita.”
^ Io me “saute.”
^ Io me “loto lagona.”
