Te Lua Samuelu 6:1-23
6 Ne toe fakamaopoopo ne Tavita a toe kautau ‵lei eiloa i Isalaelu, e toko 30,000 tāgata.
2 Tenā ne olo atu ei a Tavita mo ana tāgata katoa ki Paala-iuta o aumai mai konā te Pusa a te Atua tonu,+ telā ne ka‵laga sāle ki ei a tino ki te igoa o Ieova o kautau,+ telā e sagasaga i te nofogaaliki mai luga* o kelupi.+
3 Ne tuku atu ne latou te Pusa a te Atua tonu ki luga i se ka fou+ ke ave mai te fale o Apinatapu,+ telā e tu i luga i se mauga foliki; kae ko tama tāgata a Apinatapu ko Usa mo Aio ne takitaki ne lāua te ka fou tenā.
4 Tenā ne ave ei ne latou te Pusa a te Atua tonu mai te fale o Apinatapu i luga i te mauga foliki, kae ko Aio e sasale i mua o te Pusa.
5 A Tavita mo tino Isalaelu katoa ne fai olotou fakafiafiaga i mua o Ieova ki vaegā mea fakatagi‵tagi katoa ne faite ki te lakau ko te iunipa, kitala, nisi mea fakatagi‵tagi e isi ne uka i ei,+ samupelini,+ mea lūlū tagi‵tagi mo sumepalo.+
6 Kae i te lotou okoatuga ki te koga tuki saito o Nakono, ne ‵kapa atu te lima o Usa ki te Pusa a te Atua tonu o taofi ne ia,+ me toeitiiti kae tō te pusa ne fai ne pulumakau.
7 I konā eiloa ne kaitaua a Ieova ki a Usa, kae ne tamate+ ne te Atua tonu a tou tagata i konā ona ko tena faifaiga sē āva,+ mate eiloa a ia i konā i tafa o te Pusa a te Atua tonu.
8 Kae ne ita a Tavita i a Ieova ne fakaoko atu tena kaitaua ki a Usa; kae ne fakaigoa a te koga tenā ki a Pelesa-usa* ke oko mai ki te aso nei.
9 Ne mataku a Tavita i a Ieova+ i te aso tenā, kae fai aka: “E mafai pefea o aumai te Pusa a Ieova ki a au?”+
10 Ne seki manako a Tavita ke aumai te Pusa a Ieova ki te koga e nofo a ia i ei i te Fakai o Tavita.+ I lō te fai penā, ne fai ne Tavita ke ave ki te fale o Opeta-etoma+ te tino Kata.
11 Ne tuku eiloa te Pusa a Ieova i te fale o Opeta-etoma te tino Kata i masina e tolu, kae ne fakamanuia faeloa ne Ieova a Opeta-etoma mo tena kāiga kātoa.+
12 Ne avatu te fakailoaga ki te Tupu ko Tavita: “Ko oti ne fakamanuia ne Ieova te kāiga o Opeta-etoma mo mea katoa a tou tagata ona ko te Pusa a te Atua tonu.” Tenā ne fano ei a Tavita o aumai te Pusa a te Atua tonu mai te fale o Opeta-etoma ki te Fakai o Tavita mo te fiafia lasi.+
13 I te katoaga o ‵maga e ono o tino kolā ne sau+ ne latou te Pusa a Ieova, ne ofo atu ne ia se pulumakau tagata mo se manu putaputa e pelā me se taulaga.
14 A Tavita ne sakasaka i mua o Ieova mo tena malosi kātoa; i te taimi kātoa tenā ne pei eiloa a Tavita ki se efota lino.+
15 Ne aumai ne Tavita mo tino Isalaelu katoa a te Pusa+ a Ieova kae ka‵laga fia‵fia+ fakatasi mo te faka‵tagiga o pu.+
16 Kae i te taimi ne oko atu ei te Pusa a Ieova ki loto i te Fakai o Tavita, ne kilo ifo a Mekala,+ te tama fafine a Saulo, mai te famalama kae lavea ne ia a te Tupu ko Tavita e evaeva kae sakasaka i mua o Ieova; kae ne kamata a ia o takalialia ki tou tagata i tena loto.+
17 Ne aumai ne latou te Pusa a Ieova ki loto kae tuku i tena tulaga i loto i te faleie telā ne fakatu ne Tavita ke tuku i ei.+ Tenā ne ofo atu ei ne Tavita a taulaga ‵sunu+ mo taulaga ‵kai fakatasi+ i mua o Ieova.+
18 I te otiga ne ofo atu ne Tavita a taulaga ‵sunu mo taulaga ‵kai fakatasi, ne fakamanuia ne ia a tino i te igoa o Ieova o kautau.
19 E se gata i ei, ne tufa atu ne ia ki tino katoa, ki te vaitino o tino Isalaelu, ki tāgata mo fāfine taki tokotasi, se falaoa pukupuku, se keke e fai ki fuaga o pama, mo se keke vine, tenā ko tino katoa eiloa ko olo kea‵tea, ko tino taki tokotasi ki olotou fale.
20 I te fokiatuga a Tavita o fakamanuia tena kāiga, ne vau a Mekala,+ te tama fafine a Saulo, o fakafetaui ki a ia. Ne fai atu a ia: “Ko oko eiloa i te ‵malu o te tupu o Isalaelu i te taimi ne tapale ei ana gatu kae kilo‵kilo atu ki ei a pologa fāfine a ana tavini, ko pelā eiloa me se tagata fakavalevale e tapale ne ia ana gatu!”+
21 Tenā ne fai atu ei a Tavita ki a Mekala: “Au ne fiafia i mua o Ieova, telā ne filifili ne ia au i lō tou tamana mo tena kāiga kae ne fakasopo ne ia au mo fai te takitaki o tino o Ieova i Isalaelu.+ Tela la, ka fiafia eiloa au i mua o Ieova,
22 kae ka fakamalalo ne au a au eiloa i lō te mea tenei kae ka fai au pelā me se tino fatauva i taku kilokiloga eiloa. Kae e pelā mo pologa fāfine konā ne fai mai ne koe, ka faka‵malu eiloa ne latou au.”
23 E pelā mo Mekala,+ te tama fafine a Saulo, ne seki ai eiloa ne ana tama ke oko ki te aso ne mate ei tou fafine.
