Te Lua o Tusi ki a Timoteo 4:1-22
4 E fakatonu atu au ki a koe i mua o te Atua mo Keliso Iesu, telā ka fakamasino+ ne ia a tino ola mo tino ‵mate,+ māfai ko fakaasi faka‵lei mai a ia+ i te taimi e vau ei i tena Malo:+
2 Folafola atu te muna;+ fai fakavave i taimi ‵lei mo taimi faiga‵ta; polopoloki atu,+ fakatonutonu atu, fakamalosi atu mo te kufaki katoatoa mo te apo i te faiga o akoakoga.+
3 Me ka isi se vaitaimi ka se faka‵logo ei a tino ki akoakoga aoga,+ kae e ‵tusa mo olotou manakoga totino, ka ‵sala atu latou ki faiakoga kolā e akoako ne latou a mea e logo‵tonu ki olotou taliga.*+
4 Ka ‵fuli kea‵tea latou mai te fakalogo‵logo ki te munatonu kae ‵saga atu ki tala sē ‵tonu.
5 Kae ko koe, tausi tou mafaufau ke ‵lei i mea katoa, kufaki i mea faiga‵ta,+ fai te galuega a te tino talai,* fakataunu katoatoa tau galuega.+
6 Me ko oti au ne ‵ligi ki tua e pelā me se taulaga uaina,+ kae ko pili mai te taimi ka fakasaoloto ei au.+
7 Ko oti au ne taua i te taua ‵lei,+ ko oti au ne tele i te fakatau‵telega ki te fakaotiga,+ ko oti ne tausi ne au te fakatuanaki.
8 Mai te taimi tenei o fano ki mua, ko oti ne tausi mō oku te foualiki o te amiotonu,+ telā ka tuku mai ki a au ne te Aliki, ko te famasino amiotonu,+ e pelā me se taui i te aso tenā,+ kae e se ki a au fua, kae ki a latou katoa kolā e olioli ki te taimi e fakaasi mai ei a ia.
9 Taumafai malosi ke oko fakavave mai koe ki a au.
10 Me ko oti au ne tiaki ne Tema+ ona ko tena fiafai malosi ki te olaga tenei, kae ko oti ne fanatu a ia ki Tesalonia, ko Kelesene ki Kalatia, ko Tito ki Talamatia.
11 Ko Luka fua tenei e ‵nofo māua. Puke mai a Maleko ke o‵mai mo koe me e mafai o fesoasoani mai ki a au i te faiga o te galuega.
12 Kae ko oti ne uga atu ne au a Tukasi+ ke fano ki Efeso.
13 Kafai e vau koe, puke mai toku gatu telā ne tiaki i Teloa i a Kapasi, mo peluga tusi, maise loa a peluga tusi i pa‵kili o manu.
14 A Alesana te tino faite mea ki kopa ne fakalogo‵mae malosi ne ia au. Ka taui atu ne Ieova* e ‵tusa mo ana mea ne fai.+
15 E ‵tau foki o fakaeteete koe i a ia, me e ‵teke malosi atu a ia ki ‵tou fekau.
16 I te kamataga o aku fakamatalaga o ‵pulu au i te fono, e seai se tino ne kau mai ki a au kae ne tiakina au ne latou katoa—talosia ke se agasala latou i te mea tenei.
17 Kae ne tu te Aliki i oku tafa kae faulu mai ne ia te ‵mana ki loto i a au, ko te mea ke fakataunu katoatoa te galuega talai e auala i a au kae ke lagona ne atufenua katoa;+ kae ne fakasao au mai te gutu o te leona.+
18 Ka fakasao au ne te Aliki mai so se mea masei kae ka fakasao ne ia au mō tena Malo i te lagi.+ Ke i luga i a ia te ‵malu ki te se-gata-mai, se-gata-mai eiloa. Amene.
19 ‵Moli atu oku alofaaga ki a Piseka* mo Akuila+ mo tino i te kaufale o Onesefolo.+
20 Ne nofo a Elasita+ i Kolinito, kae ne tuku ne au a Tofimo+ i Mileto me e masaki.
21 Taumafai malosi ke oko mai koe mai mua o te tau ‵moko.
Ko ‵moli atu alofaaga o Eupele ki a koe, e pelā foki mo Paute mo Lino mo Kalaotia mo taina katoa.
22 Ke fakatasi atu te Aliki ki te agaga telā e fakaasi ne koe. Ke i luga i a koutou katoa tena alofa tauanoa.
Fakamatalaga mai lalo
^ Io me “ke fai atu ki a latou a mea kolā e ma‵nako ke lagona ne latou.”
^ Io me “tumau i te talai atu te tala ‵lei.”
^ Io me “Pisila.”
