Te Lua Tupu 17:1-41
17 I te 12 tausaga o te pulega a te tupu o Iuta ko Aasa, ne fai a Hosia+ te tama tagata a Ela mo fai te tupu o Isalaelu i Samalia; ne pule a ia i tausaga e iva.
2 Ne tumau a ia i te faiga o mea ma‵sei i te kilokiloga a Ieova, kae ne seki oko eiloa ki te ma‵sei o mea ne fai ne tupu o Isalaelu mai mua atu i a ia.
3 A te tupu o Asulia ko Salamanesa ne vau o taua mai ki a ia,+ kae ne fai a Hosia mo fai tena tavini kae kamata o avatu a meaalofa ki a ia.+
4 Kae ne iloa ne te tupu o Asulia me ne aofia a Hosia i se togafiti ne fai, me ne uga ne ia a avefekau ki te tupu o Aikupito ko So+ kae seki avatu ne ia ne meaalofa ki te tupu o Asulia e pelā mo tausaga mai mua atu. Tela la, ne tausi fakapagota kae ‵loka a ia ne te tupu o Asulia i te falepuipui.
5 Ne fanatu te tupu o Asulia o taua ki te fenua kātoa, kae fanatu o nikoi a Samalia mō tausaga e tolu.
6 I te iva tausaga o te pulega a Hosia, ne puke ei ne te tupu o Asulia a Samalia.+ Tenā ne ave fakapagota ei ne ia a tino Isalaelu+ ki Asulia kae fai ne ia ke ‵nofo i Hala mo Hapola i te vaitafe ko Kosana+ mo fakai o tino Metai.+
7 Ne tupu te mea tenei ona ko tino Isalaelu ne agasala ki a Ieova te lotou Atua, telā ne aumai ne ia latou ki tua mo te fenua o Aikupito mai lalo i te pulega a te Falao te tupu o Aikupito.+ Ne tapuaki* latou ki nisi atua,+
8 ne tau‵tali latou i tuu masani a fenua kolā ne afuli kea‵tea ne Ieova mai mua o tino Isalaelu, kae tau‵tali atu latou i tuu masani kolā ne faite ne tupu o Isalaelu.
9 Ne fai faeloa ne tino Isalaelu a mea e se ‵tonu i te kilokiloga a Ieova te lotou Atua. Ne faite faeloa ne latou a koga ma‵luga i olotou fakai katoa,+ mai taoa ma‵luga ke oko ki fakai* e puipui faka‵lei.
10 Ne faka‵tu aka faeloa ne latou mō latou eiloa a pou fatu tapu mo pou lakau tapu*+ i luga i tamā mauga katoa kae mai lalo o so se lakau ola ‵lei;+
11 kae fai ne latou ke fanaka te au mai taulaga i koga ma‵luga katoa e pelā eiloa mo mea ne fai ne fenua kolā ne afuli kea‵tea ne Ieova i olotou mua.+ Ne fai faeloa ne latou a mea ma‵sei ke kaitaua a Ieova.
12 Ne tumau latou i te tavini atu ki tupua fakatakalia‵lia*+ kolā ne fai atu a Ieova ki a latou: “E se ‵tau mo koutou o fai a te mea tenei!”+
13 Kae ne fakailoa atu faeloa ne Ieova ki Isalaelu mo Iuta e auala i ana pelofeta mo fakaasiga katoa,+ ana muna: “‵Fuli kea‵tea mai otou auala ma‵sei!+ Tausi aku fakatonuga mo aku tulafono fakavae e ‵tusa mo tulafono katoa kolā ne fakatonu atu ne au ki otou tupuga kae ne avatu ne au ki a koutou e auala i aku tavini ko pelofeta.”
14 Ne seki faka‵logo latou, kae ne tumau eiloa latou i te loto ma‵keke e pelā mo olotou tupuga kolā ne seki fakaasi atu te fakatuanaki ki a Ieova te lotou Atua.+
15 Ne tumau latou i te ‵teke atu ki ana tulafono fo‵liki mo tena feagaiga+ telā ne fai ne ia mo olotou tupuga mo fakamasauaga kolā ne tuku atu ne ia o fakailoa atu ki a latou,+ kae ne tumau latou i te tau‵tali atu i tupua sē aoga+ kae fai ei latou e pelā me ne tino sē aoga,+ kae fakaakoako ki fenua katoa i olotou tafa kolā ne fakatonu atu a Ieova ke se fakaakoako latou ki ei.+
16 Ne tumau latou i te fulitua ki fakatonuga a Ieova te lotou Atua, kae ne faite ne latou a pulumakau fiti e lua+ mo se pou lakau tapu,*+ kae ne ifo latou ki kautau katoa o te lagi+ kae tavini atu ki a Paala.+
17 Ne ‵sunu foki ne latou olotou tama tāgata mo tama fāfine i te afi,*+ ne fai ne latou a faifaiga fakataulaitu+ kae ‵sala foki ki fakailoga, kae ne tuku atu* faeloa ne latou a latou eiloa ki te faiga o mea ma‵sei i te kilokiloga a Ieova ke kaitaua a ia.
18 Ne kaitaua malosi a Ieova ki Isalaelu, tenā ne ave kea‵tea ei ne ia latou mai ana mua.+ E seai se tino ne faka‵toe mai ne ia kae na ko te matakāiga fua o Iuta.
19 Kae ko tino Iuta ne seki tausi ki fakatonuga a Ieova te lotou Atua;+ ne sa‵sale foki latou i tuu masani kolā ne tau‵tali i ei a Isalaelu.+
20 Ne ‵teke atu a Ieova ki tino katoa kolā ne ‵tupu mai i Isalaelu kae fakamasiasi ne ia latou kae tuku atu ki lima o tino ‵fao mea, ke oko ki te taimi ne ‵pei ei ne ia latou kea‵tea mai i ana mua.
21 Ne ‵sae kea‵tea ne ia a Isalaelu mai te kāiga o Tavita, kae ne fai ne latou a Ielopoamo te tama tagata a Nepata mo fai te tupu.+ Kae ne fai ne Ielopoamo a Isalaelu ke tapeapea kea‵tea mai te tautali atu i a Ieova, kae ne fai ne ia latou ke fai se matugā agasala matagā.
22 Kae ko tino Isalaelu ne tumau eiloa i te sa‵sale i agasala katoa kolā ne fai ne Ielopoamo.+ Ne seki fulitua latou ki ei
23 ke oko ki te taimi ne tapale kea‵tea ei ne Ieova a Isalaelu mai i ana mua, e pelā eiloa mo tena folafolaga ne fai e auala i ana tavini katoa ko pelofeta.+ Tenā ne ave fakapagota ei a tino Isalaelu mai te lotou fenua ki Asulia,+ kae koi ‵nofo eiloa latou i konā ke oko mai ki te aso nei.
24 Ne aumai ne te tupu o Asulia a tino mai Papelonia, Kuta, Iva, Hamata mo Sefavaima+ kae tuku atu ke ‵nofo i fakai o Samalia ke sui ei a tino Isalaelu; ne puke ne latou a Samalia kae ‵nofo i ana fakai.
25 I te taimi muamua ne kamata ei latou o ‵nofo i konā, ne seki ma‵taku* latou ki a Ieova. Tenā ne uga atu ei ne Ieova a leona ki a latou,+ kae ne ‵ta ne latou a nisi tino i ei.
26 Ne fakailoa atu a te mea tenā ki te tupu o Asulia: “A fenua kolā ne ave fakapagota ne koe kae fai ke ‵nofo i fakai o Samalia e se iloa ne latou a te tapuakiga* a te Atua o te fenua. Tenā ne uga atu faeloa ne ia a leona ki a latou, kae tamate ne latou a tino i ei, me e seai se tino i a latou e iloa ne ia a te tapuakiga a te Atua o te fenua.”
27 Tenā ne fakatonu atu ei te tupu o Asulia: “Fakafoki atu se faitaulaga e tokotasi telā ne ave fakapagota ne koutou mai i konā ke nofo i konā ke akoako atu ki a latou a te tapuakiga a te Atua o te fenua.”
28 Ne foki mai se faitaulaga e tokotasi telā ne ave fakapagota ne latou mai Samalia o nofo i Peteli,+ kae ne kamata o akoako ne ia latou ke iloa ne latou te auala e ‵tau ei o ma‵taku* latou ki a Ieova.+
29 Kae ne faite ne fenua takitasi olotou atua totino, kolā ne tuku ne latou i loto i fale tapuaki i luga i koga ma‵luga kolā ne faite ne tino Samalia; ne fai ne fenua takitasi a te mea tenā i fakai ne ‵nofo latou i ei.
30 A tāgata Papelonia ne faite ne latou a Sukota-penota, a tāgata Kuta ne faite ne latou a Nelekala, a tāgata Hamata+ ne faite ne latou a Asima,
31 kae ko tino Iva ne faite ne latou a Nipasa mo Tataka. A tino Sefavaima ne ‵sunu olotou tama tāgata ki te afi ma Atameleko mo Anameleke, ko atua o Sefavaima.+
32 E tiga eiloa ne ma‵taku latou ki a Ieova, ne faka‵sopo aka ne latou ne faitaulaga mai i tino valevale mō koga ma‵luga, kae ne ga‵lue a latou i konā mō tino i fale tapuaki i luga i koga ma‵luga.+
33 Ne ma‵taku latou ki a Ieova, kae ne tapuaki foki eiloa latou ki olotou atua totino e ‵tusa mo tapuakiga* a atufenua kolā ne puke fakapagota latou mai i ei.+
34 Ke oko mai ki te aso nei e tau‵tali eiloa latou i olotou tapuakiga* mua. E seai se tino i a latou e tapuaki* ki a Ieova, kae e seai se tino e tautali i ana tulafono fakavae, ana fakamasinoga, te Tulafono, mo te fakatonuga ne tuku atu ne Ieova ki tama tāgata a Iakopo, telā ne ‵fuli ne ia tena igoa ki a Isalaelu.+
35 I te taimi ne fai ei ne Ieova se feagaiga mo latou,+ ne fakatonu atu a ia ki a latou: “E se ‵tau mo koutou o ma‵taku ki nisi atua, kae e se ‵tau mo koutou o ifo ki mea konā io me tavini ki mea konā io me ofo atu a taulaga ki ei.+
36 Kae ko Ieova telā ne aumai ne ia koutou kea‵tea mai te fenua o Aikupito mo tena malosi sili mo tena lima mafi,+ ko te Atua telā e ‵tau o ma‵taku koutou ki ei,+ ko ia e ‵tau o ifo koutou ki ei, kae ko ia foki e ‵tau o ofo ne koutou ki ei a taulaga.
37 Kae ko tulafono, fakamasinoga, te Tulafono, mo fakatonuga kolā ne tusi ne ia ki lalo mō koutou,+ e ‵tau o tau‵tali faka‵lei koutou i ei; kae e se ‵tau mo koutou o ma‵taku ki nisi atua.
38 Kae e se ‵tau mo koutou o puli a te feagaiga ne fai ne au mo koutou,+ kae e se ‵tau mo koutou o ma‵taku ki nisi atua.
39 Kae ko Ieova te otou Atua e ‵tau o ma‵taku koutou ki ei, me ko ia te tino ka faka‵sao ne ia koutou mai i lima o otou fili katoa.”
40 Kae ne seki faka‵logo latou, kae ne tau‵tali eiloa i te tapuakiga* mua a latou.+
41 Tenā ne ma‵taku ei a fenua konei ki a Ieova,+ kae ne tavini atu foki latou ki olotou tupua fakatakalia‵lia. Ne fai ne olotou tama tāgata mo olotou mokopuna a mea eiloa kolā ne fai ne olotou tupuga, ke oko mai ki te aso nei.
Fakamatalaga mai lalo
^ Epelu, “ma‵taku.”
^ Telā ko koga katoa, faitalia me seai ne tino i ei io me tokouke a tino i ei.
^ A te pati Epelu e mafai o isi sena sokoga ki te pati “fekau o manu” kae e fakaaoga e pelā me se fakaasiga o te takalialia.
^ Epelu, “‵togi atu.”
^ Epelu, “ave i loto i te afi.”
^ Io me “tapuaki.”
^ Io me “faifaiga fakalotu.”
^ Io me “tapuaki.”
^ Io me “faifaiga fakalotu.”
^ Io me “faifaiga fakalotu.”
^ Io me “mataku.”
^ Io me “faifaiga fakalotu.”
