Esekielu 45:1-25
45 “‘Kafai e vaevae ne koutou te laukele ke fai pelā me se tofi,+ e ‵tau o ofo atu ne koutou se vaega ki a Ieova, se vaega tapu mai i te fenua.+ A tena loa e ‵tau o 25,000 kupita,* kae ko tena lauefa e 10,000 kupita.+ A te koga kātoa* tenā ka fai e pelā me se vaega tapu.
2 I loto i te koga tenei se vaega telā e sikuea mō te koga tapu e 500 kupita ki te 500 kupita,+ kae e ‵tau o 50 kupita i ana feitu katoa mo fai a laukele moukuā.+
3 Mai te fua tenei e ‵tau o fua ne koutou te loa e 25,000, mo te lauefa e 10,000, kae i loto i ei ko te koga tapuaki, se mea tafasili i te tapu.
4 Ka fai te mea tenā e pelā me se vaega tapu o te laukele mō faitaulaga,+ ko tavini o te koga tapuaki, kolā e o‵mai ki a Ieova o tavini atu ki a ia.+ Ka fai te koga tenā mo olotou fale mo se koga tapu mō te koga tapuaki.
5 “‘Ki tino Levi, ko tavini o te faletapu, ka isi se vaega e 25,000 kupita te loa kae 10,000 kupita te lauefa,+ kae ka isi ne potu ‵kai e 20+ ke fai mō latou.
6 “‘E ‵tau o tuku atu ne koutou a te laukele o te fakai e 25,000 kupita te loa (e ‵pau mo te tusaga tapu) kae 5,000 kupita te lauefa.+ Ka fai te mea tenā ma te kāiga o Isalaelu.
7 “‘Kae pelā mo te takitaki ka isi se laukele i feitu e lua o te tusaga tapu mo te vaega ne ‵tofi ki te fakai. Ka tu i tafa o te tusaga tapu mo te laukele o te fakai. Ka tu i te feitu ki togala mo te feitu ki saegala. A tena loa mai te tuakoi i te feitu ki togala ke oko ki te tuakoi i te feitu ki saegala e ‵pau mo se vaega e tasi o matakāiga.+
8 A te laukele ka fai mō ia i Isalaelu. A oku takitaki ka se toe fai fakamasei ne latou oku tino,+ kae ka tuku atu ne latou a te laukele ki te kāiga o Isalaelu e ‵tusa eiloa mo olotou matakāiga.’+
9 “Konei a pati a te Aliki Sili ko Ieova ne fai mai: ‘Ko tō silia otou mea e fai, e takitaki o Isalaelu!’
“‘Fakagata otou faifaiga fakasaua mo te pule fakasaua, kae fai te mea tonu kae amiotonu.+ Fakagata te puke o laukele o oku tino,’+ ko te folafolaga a te Aliki Sili ko Ieova.
10 E ‵tau o fakaaoga ne koutou a fua ‵tonu, se fua tonu o te efa* mo se fua tonu e fua ki ei a paita.*+
11 E ‵tau o isi se fua mautinoa mō te fuaga o te efa mo te paita. A te paita e ‵tau o puke ne ia te tasi-vae-sefulu o te homa,* kae ko te efa e ‵tau o puke ne ia te tasi-vae-sefulu o te homa. Ka fai a te homa mo fai te fua mautinoa e fua ki ei a mea.
12 A te sekela*+ e ‵tau o 20 kile.* Kae ko te 20 sekela fakaopoopo mo te 25 sekela fakaopoopo mo te 15 sekela ka maua i ei te mane* e tasi ma koutou.’
13 “‘Tenei te tusaga e ‵tau o ofo atu ne koutou: e tasi-vae-ono o te efa mai i homa takitasi o te saito mo te tasi-vae-ono o te efa mai i homa takitasi o te kalite.
14 A te fuāga o te sinu e ‵tau o fakavae ki te fuāga o te paita. A te paita ko te tasi-vae-sefulu o te koli,* kae ko paita e sefulu se homa, me i paita e sefulu e ‵pau mo te homa.
15 Kae mai i lafu mamoe o Isalaelu, e ‵tau o tuku atu a te mamoe e tasi mai i mamoe e taki 200. Ka fai a mea konei mo fai a taulaga meakai,+ taulaga ‵sunu kātoa,+ mo taulaga ‵kai fakatasi,+ mo fai ki ei te faka‵māga o te fenua,’+ ko te folafolaga a te Aliki Sili ko Ieova.
16 “‘A tino katoa o te fenua ka fai ne latou te tusaga tenei+ ki te takitaki o Isalaelu.
17 Kae ko te takitaki e ‵tau o fakatoka ne ia a taulaga ‵sunu kātoa,+ taulaga meakai,+ mo taulaga meainu i taimi o ‵kaiga fia‵fia,+ masina sae, Sapati,+ mo ‵kaiga fia‵fia katoa o te kāiga o Isalaelu.+ Ko ia telā e ‵tau o fakatoka ne ia te taulaga mō agasala, te taulaga meakai, te taulaga ‵sunu kātoa, mo te taulaga ‵kai fakatasi, mo fai te faka‵māga o te kāiga o Isalaelu.’
18 “Konei a pati a te Aliki Sili ko Ieova ne fai mai: ‘I te masina muamua, i te aso muamua o te masina, e ‵tau mo koe o puke se tamā pulumakau tagata ‵lei mai te lafu, kae e ‵tau o faka‵ma ne koe te koga tapuaki mai i te agasala.+
19 E ‵tau o puke ne te faitaulaga a nisi toto o te taulaga mō agasala kae nani atu ki te pou mataloa o te faletapu,+ ki ‵kōna e fa o lela kolā e fakatamilo i te fatafaitaulaga, mo te pou mataloa o te koga ateatea tafa ki loto.
20 Tenā te mea ka fai ne koe i te fitu o aso o te masina ona ko tino kolā e agasala fakafuasei io me e aunoa mo se iloa;+ kae e ‵tau mo koe o fai se faka‵māga mō te faletapu.+
21 “‘I te masina muamua, i te po 14 o te masina, ka fakamanatu ne koe te ‵kaiga fiafia o te Paseka.+ E ‵tau eiloa o ‵kai ki falaoa seki fakafete i aso e fitu.+
22 I te aso tenā ka fakatoka ne te takitaki se tamā pulumakau tagata e pelā me se taulaga mō agasala mō ia eiloa mo tino katoa o te fenua.+
23 I aso e fitu o te ‵kaiga fiafia ka fakatoka ne ia a te taulaga ‵sunu kātoa ki a Ieova e fitu tamā pulumakau ‵lei kae fitu a mamoe ‵lei mō aso e fitu,+ e pelā foki mo kouti tāgata e pelā me se taulaga mō agasala.
24 E ‵tau foki mo ia o fakatoka se taulaga meakai, e tasi te efa mō tamā pulumakau tāgata takitasi kae tasi te efa mō mamoe takitasi, e pelā foki mo se hini* o sinu mō efa takitasi.
25 “‘I te fitu o masina, i te po 15 o te masina, i aso e fitu o te ‵kaiga fiafia,+ e ‵tau o fakatoka ne ia te taulaga mō agasala penā, se taulaga ‵sunu kātoa, se taulaga meakai mo sinu.’”
Fakamatalaga mai lalo
^ Io me “I loto i ana tuakoi katoa.”
