Eseta 3:1-15
3 I te otiga o te mea tenei ne fakamasiki aka ne te Tupu ko Asuelu a Hamanu+ te tama tagata a Hametata te tino Akako+ kae fakamaluga aka a ia mai te faiga o tena nofogaaliki ke maluga atu i nisi pelenise katoa a ia.+
2 Kae ko tavini katoa a te tupu kolā e ‵nofo i loto i mataloa o te palesi o te tupu e ‵tau o to‵tuli kae ifo ki a Hamanu, me tenā te fakatonuga ne fai ne te tupu e uiga ki a ia. Kae ko Moletekai ne ita ma totuli o ifo ki a ia.
3 Ne fai atu a tavini a te tupu kolā e ‵nofo i loto i mataloa o te palesi o te tupu ki a Moletekai: “Kaia e se fakalogo ei koe ki te fakatonuga a te tupu?”
4 I aso katoa, e fesili atu faeloa latou ki a ia, kae e se fia fakalogo a ia ki a latou. Tenā ne fai atu ei latou ki a Hamanu me e mata e ‵lei ke tumau a te faifaiga tenā+ a Moletekai; me ne fai atu a ia ki a latou i a ia se tino Iutaia.+
5 I te laveaga ne Hamanu i a Moletekai e ita ma totuli o ifo ki a ia, ne kaitaua malosi+ a Hamanu.
6 Kae ne seki manako a ia ke tamate tokotasi fua a Moletekai, me ko oti ne fai atu latou ki a ia e uiga ki tino o Moletekai. Tenā ne kamata ei a Hamanu o salasala ki se togafiti ke fakaseai a tino Iutaia kolā e ‵nofo mai lalo i te malo o Asuelu, ko tino katoa o Moletekai.
7 I te masina muamua, telā ko te masina o Nisani,* i te 12 tausaga+ o te pulega a te Tupu ko Asuelu, ne fai ne latou a te Pulo+ (telā ko te Vili) i mua o Hamanu ke iloa aka a te aso mo te masina, kae ne tu atu ki te 12 o masina telā ko Atala.*+
8 Tenā ne fai atu ei a Hamanu ki te Tupu ko Asuelu: “E isi ne tino konei e salalau i ‵tou tino+ i kogā fenua katoa o tou malo,+ kolā e ‵kese olotou tulafono mai tulafono katoa a nisi tino; kae e se faka‵logo latou ki tulafono a te tupu, kae e se ko te manakoga o te tupu ke fai latou penā.
9 Kafai e fiafia ki ei te tupu, ke tusi la se fakatonuga ke fakaseai atu latou. Ka ‵togi atu ne au e 10,000 taleni* siliva ki ofisa ke tuku ki loto i te koga ‵teutupe a te tupu.”
10 Tenā ne tapale ei ne te tupu a tena mama fakamailoga+ mai tena lima kae tuku atu ki a Hamanu+ te tama tagata a Hametata te tino Akako,+ telā ko te fili o tino Iutaia.
11 Ne fai atu te tupu ki a Hamanu: “Ko tuku atu ki a koe a siliva mo tino, ke fai ne koe te mea e ‵tau o fai ki a latou.”
12 I te po 13 o te masina muamua ne fakamaopoopo mai ei a failautusi+ a te tupu. Ne tusi+ ne latou ki lalo a fakatonuga katoa a Hamanu ki tino pule a te tupu, kovana kolā e pule atu i kogā fenua, mo pelenise o tino kese‵kese, i tusitusiga a kogā fenua konā mo olotou ‵gana eiloa. Ne tusi a mea konā i te igoa o te Tupu ko Asuelu kae fakamailoga ki te mama fakamailoga+ o te tupu.
13 Ne avatu a tusi e auala i avefekau ki kogā fenua katoa a te tupu, kae avatu te fakatonuga ke ‵ta fakapalele, ke tamate, kae fakaseai atu a tino Iutaia katoa, ko talavou mo tino ma‵tua, tama‵liki mo fāfine, i te aso eiloa e tasi, i te po 13 o te 12 o masina, telā ko te masina o Atala,+ kae ke puke katoa olotou kope.+
14 Ne avatu se ‵kopi o te tusi e pelā me se tulafono ki kogā fenua katoa kae fakailoa atu ki tino katoa, ko te mea ke fakatoka latou ki te aso tenā.
15 Ne olo fakavave a avefekau+ i te fakatonuga a te tupu; ne fai a te tulafono tenā i Susana*+ te taoa malosi.* Tenā ne saga‵saga ifo ei a te tupu mo Hamanu o inu, kae ko te fakai o Susana* ko ‵numi valevale.
