Eseta 4:1-17
4 I te iloaga ne Moletekai+ a mea katoa ne fai,+ ne saesae ana gatu kae pei ki gatu lautaga kae tuku a lefu ki luga i a ia. Ne fanatu a ia ki te kogaloto o te fakai kae tagi pakalaga mo te fanoanoa.
2 Ne fanatu fua a ia ke oko ki te mataloa o te palesi o te tupu, me seai se tino e ulu ki loto i te mataloa o te palesi o te tupu kae pei ki gatu lautaga.
3 Kae i kogā fenua+ katoa ne oko atu ki ei te fakatonuga mo te tulafono a te tupu, ne fanoa‵noa malosi a tino Iutaia, kae fakaliki‵liki+ kae ‵tagi mautuutu kae ‵tagi paka‵laga. E tokouke a tino ne ta‵kato i lalo mo olotou gatu lautaga i luga i ‵pefu.+
4 I te o‵maiga a tavini fāfine mo eunuka a Eseta kae fai atu ki te tupu fafine a te mea tenā, ne mafatia malosi a ia i ei. Tenā ne ave ei ne ia a gatu mō pei a Moletekai i lō te pei ki gatu lautaga, kae ne seki talia ne tou tagata a mea konā.
5 I konā eiloa ne kalaga atu a Eseta ki a Hataka, se eunuka e tokotasi a te tupu telā ne ‵tofi aka ne ia ke tavini atu ki tou fafine, kae ne fakatonu atu tou fafine ki ei ke fano ki a Moletekai o fesili me se a te uiga o te mea tenei kae se a te mea e tupu.
6 Tenā ne fanatu ei a Hataka ki a Moletekai i loto i te malae o te fakai i te feitu ki mua o te mataloa o te palesi o te tupu.
7 Ne fai atu ne Moletekai ki a ia a mea katoa ne ‵tupu ki a ia mo te aofaki tupe+ ne tauto a Hamanu me ka ‵togi ne ia ki te koga ‵teu koloa a te tupu ke tamate+ i ei a tino Iutaia.
8 Ne tuku atu foki ne tou tagata ki a ia a te tulafono telā ne aumai i Susana*+ e uiga ki te lotou fakaseaiga. Ne ‵tau o fakaasi atu ne ia kae fakamatala atu te mea tenei ki a Eseta kae fakatonu tou fafine+ ke fano ki loto i te tupu o fakamolemole ke talia ne tou tagata a ia kae ke fakamolemole ki te tupu e uiga mō ana tino.
9 Ne foki mai a Hataka kae fai atu ki a Eseta a pati a Moletekai.
10 Ne tali atu a Eseta ki a Hataka mai te fai atu o fakatonuga ke fai ki a Moletekai:+
11 “A tavini katoa a te tupu mo tino i kogā fenua o te tupu e iloa ne latou me i so se tagata io me se fafine e fano ki loto i te koga ateatea tafa ki loto+ a te tupu e aunoa mo se ‵kamiga, e tasi eiloa te tulafono ki ei: E ‵tau o tamate a ia; e mafai fua o ola a ia māfai e sisi aka ne te tupu a tena tokotoko aulo.+ Kae e seki ai eiloa soku ‵kamiga mai te tupu i aso e 30.”
12 I te taimi ne fai atu ei ki a Moletekai a pati a Eseta,
13 ne tali atu a ia ki a Eseta: “Sa mafaufau pelā i a koe e nofo i loto i te kāiga o te tupu ko mafai ei koe o sao i lō nisi tino Iutaia katoa.
14 Me kafai e nofo filemu koe i te taimi tenei, ka maua ne tino Iutaia a te faka‵saoga mo te saolotoga mai se isi koga aka,+ kae ko koe mo te kāiga o tou tamana ka ‵mate. Kae ko oi e iloa ne ia me kāti ko te mea tenei ne maua ei ne koe te tulaga fakatupu tenā?”+
15 Tenā ne tali atu ei a Eseta ki a Moletekai:
16 “Fano o fakamaopoopo mai a tino Iutaia katoa i Susana* kae fakaliki‵liki+ mō au. Sa ‵kai io me inu i aso e tolu,+ i te po mo te ao. Ka fakaliki‵liki foki au mo aku tavini fāfine. Ka fanatu au ki loto i te tupu, se mea telā e tapu i te tulafono, kae kafai e ‵tau au o mate, ka mate eiloa au.”
17 Tenā ne fano ei a Moletekai kae fai ne ia a mea katoa ne fakatonu atu ne Eseta ke fai ne ia.
