Eseta 6:1-14
-
Ko fakaaloalogina a Moletekai ne te tupu (1-14)
6 I te po tenā ne seki mafai o tō te moe a te tupu. Tenā ne fai atu ei a ia ke aumai te tusi o tala fakasolopito o taimi konā,+ kae ne faitau atu ki te tupu.
2 Ne maua atu e tusi i ei a te lipoti ne fai ne Moletekai e uiga ki a Pikitana mo Telesa, ne ofisa e tokolua a te tupu, ne tino tausi mataloa, kolā ne taumafai o fai se togafiti ke tamate a te Tupu ko Asuelu.+
3 Ne fesili atu te tupu: “Se a te fakaaloaloga mo te taui ne tuku atu ki a Moletekai ona ko te mea tenei?” Ne tali atu a tavini fesoasoani a te tupu: “E seai se mea ne fai ki te tagata tenā.”
4 Fakamuli ifo, ne fai aka te tupu: “Ko oi te tino i te koga ateatea?” A Hamanu ne fanatu ki te koga ateatea tafa ki tua+ o te fale o te tupu ke faipati atu ki te tupu ke fakatautau a Moletekai i te pou telā ko oti ne fakatoka ne ia mō tou tagata.+
5 Ne fai atu a tavini fesoasoani a te tupu ki a ia: “Ko Hamanu+ tenei e tu i te koga ateatea.” Ne fai atu te tupu: “Fai ki ei ke vau ki loto.”
6 I te vauga a Hamanu ki loto, ne fai atu te tupu ki a ia: “Se a te mea e ‵tau o fai ki se tagata telā e manako te tupu ke fai se fakaaloaloga ki ei?” Ne fai ifo a Hamanu i tena loto: “Ko oi foki la te tino e manako te tupu ke fai se fakaaloaloga ki ei i lō au?”+
7 Ne fai atu a Hamanu ki te tupu: “A te tagata telā e manako te tupu ke fai se fakaaloaloga ki ei,
8 e ‵tau o aumai ne latou a gatu fakatupu+ kolā e pei ki ei te tupu mo se solofanua telā e tele i ei te tupu, mo te pulou fakatupu i luga i tena ulu.
9 Tenā ko tuku atu ei a gatu mo te solofanua ki se tino maluga e tokotasi a te tupu, ko fakapei ei ne latou a gatu konā ki te tagata e manako te tupu ke fai se fakaaloaloga ki ei ko fai ei ke tele a ia i luga i te solofanua i loto i te malae o te fakai. Kae e ‵tau o ka‵laga atu a latou ki a ia penei: ‘Tenei te mea e ‵tau o fai ki se tagata telā e manako te tupu ke fai se fakaaloaloga ki ei!’”+
10 I konā eiloa ne fai atu te tupu ki a Hamanu: “Fakavave! Puke a gatu mo te solofanua, kae fai a mea konā ne fatoa faipati mai ne koe ki a Moletekai te tino Iutaia telā e sagasaga i te mataloa o te palesi o te tupu. Ke mo a ma sē fai ne koe so se mea ne faipati mai ne koe.”
11 Tenā ne puke ei ne Hamanu a gatu mo te solofanua kae fakapei ki ei a Moletekai+ kae fai ke tele atu i te malae o te fakai kae kalaga atu i ana mua: “Tenei te mea e ‵tau o fai ki se tagata telā e manako te tupu ke fai se fakaaloaloga ki ei!”
12 Oti aka, ne foki atu a Moletekai ki te mataloa o te palesi o te tupu, kae ne fanatu fakavave a Hamanu ki tena fale o tagi fanoanoa i ei kae pulou tena ulu.
13 I te faiatuga ne Hamanu ki tena avaga ko Selesa+ mo ana taugasoa katoa a mea katoa ne ‵tupu ki a ia, ne fai atu ana tāgata ‵poto mo tena avaga ko Selesa ki a ia: “Kafai a Moletekai, te tino telā ko kamata koe o takavale i ei, ne tupu mai i te gafa o tino Iutaia, ka se manumalo eiloa koe i a ia; e mautinoa eiloa me ka takavale masei koe i a ia.”
14 I te taimi koi fai‵pati ei latou mo ia, ne oko atu a ofisa a te tupu kae puke fakavave mai ne latou a Hamanu ki te ‵kaiga telā ne fakatoka ne Eseta.+
