Se Fakaasiga ki a Ioane 13:1-18
13 Ne tu a ia* i one o te tai kae e se gasuesue.
Kae ne matea ne au se manu fekai+ e fanaka mai te tai,+ mo suki e sefulu mo ulu e fitu, kae i luga i ana suki ko foualiki e sefulu, kae e tusi i ana ulu a igoa kolā e fakamasei atu ki te Atua.
2 A te manu fekai telā ne matea ne au e pelā me se lepoti, kae ko ana vae e pelā mo vae o se pea, kae ko tena gutu e pelā mo te gutu o se leona. Kae ne tuku atu ne te talako+ ki te manu fekai a tena malosi mo tena nofogaaliki mo te pulega lasi.+
3 Ne matea ne au i tena ulu e tasi e foliga pelā me pakia malosi, kae ko tena pakiaga telā ne ‵tau o mate i ei ko mafu,+ kae ko te lalolagi kātoa ne tau‵tali i te manu fekai kae tavae atu ki a ia.
4 Kae ne tapuaki atu latou ki te talako me ne tuku atu ne ia te malosi ki te manu fekai, kae ne tapuaki atu latou ki te manu fekai i olotou pati konei: “Ko oi e ‵pau mo te manu fekai, kae ko oi e mafai o taua atu ki ei?”
5 Ne tuku atu ki ei se gutu telā e faipati ki mea fakaofoofogia mo pati ma‵sei, kae ne tuku atu ki ei te malosi ke gasuesue i masina e 42.+
6 Kae ne fakamaga tena gutu o pati masei+ atu ki te Atua, ne pati masei ki tena igoa mo tena koga nofo, ke oko foki ki a latou kolā e ‵nofo i te lagi.+
7 Ne talia ke taua atu a ia ki tino tapu kae ke fakatakavale latou,+ kae ne tuku atu ki ei te malosi ke pule ki luga i matakāiga mo tino mo ‵gana mo atufenua katoa.
8 Kae ko latou katoa kolā e ‵nofo i te lalolagi ka tapuaki atu ki ei. Talu mai te taimi ne fakavae* ei te lalolagi, e seai eiloa se igoa o latou e tusi i te peluga tusi o te ola+ a te Tamā Mamoe telā ne tamate.+
9 Ke na fakalogo la te tino telā e isi ne ana taliga.+
10 Kafai e ‵tau o ave fakapagota se tino, ka ave fakapagota eiloa a ia. Kafai e isi se tino ka tamate ki te pelu,* e ‵tau mo ia o tamate ki te pelu.+ Tenei te taimi e manakogina ei ke maua ne tino tapu+ te kufaki+ mo te fakatuanaki.+
11 Tenā ne matea ei ne au te suā manu fekai e fanaka mai i te lalolagi, kae e lua ana suki e pelā mo suki o se tamā mamoe, kae ne kamata o faipati mai a ia e pelā me se talako.+
12 E fakaaoga ne ia te pulega kātoa a te manu fekai muamua+ telā e matea ne ia. Kae e fai ne ia te lalolagi mo tino e ‵nofo i ei ke tapuaki atu ki te manu fekai muamua, telā ne mafu tena pakiaga telā ne ‵tau o mate i ei.+
13 Kae e fai ne ia a fakailoga fakaofoofogia, ke oko ki te faiga o te afi ke tō mai i te lagi ki te lalolagi i mua o tino katoa.
14 Ne takitaki ‵se ne ia a latou kolā e ‵nofo i te lalolagi, ona ko fakailoga kolā ne talia ke fai ne ia i mua o te manu fekai, kae fakatonu atu ki a latou kolā e ‵nofo i te lalolagi ke faite se fakatusa+ o te manu fekai telā ne pakia i te pelu kae ne toe malosi mai.+
15 Kae ne talia ke tuku atu ne ia te mānava* ki te fakatusa o te manu fekai, ko te mea ke faipati te fakatusa o te manu fekai kae fai ke tamate a latou katoa kolā e ita ma tapuaki ki te fakatusa o te manu fekai.
16 E faimālō ne ia a tino katoa—tino ma‵lalo mo tino ma‵luga, tino mau‵mea mo tino ma‵tiva, tino saoloto mo pologa—ko te mea ke fakamailoga a latou konei i olotou lima fakaatamai io me i luga i olotou lae,+
17 ko te mea ke seai se tino e mafai o ‵togi mai io me fakatau atu kae na ko te tino fua telā e maua ne ia a te fakamailoga, ko te igoa+ o te manu fekai io me ko te napa o tena igoa.+
18 E manakogina i te mea tenei a te poto: A te tino telā e ‵loto tena malamalama ke na galue ne ia a te napa o te manu fekai, me i te mea tenā se napa o se tagata; kae ko tena napa ko te 666.+
Fakamatalaga mai lalo
^ Tela ko te talako.
^ A te mea tenei e fakasino ki tama‵liki a Atamu mo Eva.
^ Io me kāti, “Kafai e isi se tino e tamate ki te pelu.”
^ Io me “agaga.”
