Ielemia 23:1-40
23 “Kalofa eiloa i tausi mamoe kolā e fakamasei kae fakasalalau valevale ne latou a mamoe o taku lafu!” ko te folafolaga a Ieova.+
2 Tela la, konei a pati a Ieova te Atua o Isalaelu ne fai e ‵teke atu ei ki tausi mamoe kolā e tausi ne latou oku tino: “Ne fakasalalau valevale ne koutou aku mamoe; kae ne fakamavae‵vae faeloa ne koutou, kae ne seki ‵saga atu eiloa koutou ki a latou.”+
“Tela la, ka saga atu au ki a koutou ona ko otou faifaiga matagā,” ko te folafolaga a Ieova.
3 “Ka oti, ko fakamaopoopo mai ei ne au a te ‵toega o aku mamoe mai i fenua katoa kolā ne fakamavae‵vae ne au ki ei,+ kae ka toe faka‵foki mai ne au a latou ki olotou laukele moukuā,+ kae ka fanafanau kae gasolo o uke.+
4 Kae ka faka‵tu aka ne au i luga i a latou a tausi mamoe kolā ka tausi faka‵lei atu ki a latou.+ Ka se toe ma‵taku latou io me pole‵pole, kae ka seai se mamoe e galo atu,” ko te folafolaga a Ieova.
5 “Kiloke! Ka oko mai a aso,” ko te folafolaga a Ieova, “ka fakatu aka ei ne au mō Tavita se tino* amiotonu mai tena gafa.+ Kae ka pule+ se tupu kae fakaasi atu te malamalama kae fakamaluga aka te fakamasinoga tonu mo te amiotonu i te fenua.+
6 Ka fakasao ne ia a Iuta i ana aso,+ kae ka tokagamalie foki a Isalaelu.+ Kae tenei te igoa ka fakaigoa a ia ki ei: A Ieova ko te Motou Amiotonu.”+
7 “Kae ka oko mai a aso,” ko te folafolaga a Ieova, “ka se toe fai aka ei latou, ‘E pelā eiloa mo Ieova e ola, telā ne aumai ne ia a tino Isalaelu ki tua mo te fenua o Aikupito!’+
8 kae ka fai aka latou, ‘E pelā eiloa mo Ieova e ola, telā ne aumai kea‵tea kae toe faka‵foki mai ne ia a tino ne ‵tupu mai i te kāiga o Isalaelu mai te fenua i te feitu ki mātū mo fenua katoa kolā ne fakamavae‵vae ne au latou ki ei,’ kae ka ‵nofo latou i te lotou fenua eiloa.”+
9 Konei a pati e uiga ki te kau pelofeta:
A toku loto ko fatifati i loto i a au.
Oku ivi katoa ko pole‵pole.
Au ko ‵pau mo se tagata konāKae pelā me se tagata ko takavale i te uaina,Ona ko Ieova kae ona ko ana muna tapu.
10 Me i te fenua ko ‵fonu i tino mulilua;+Ona ko te malaia ko fanoa‵noa eiloa te fenua+Kae ko laukele moukuā o te koga lavaki ko paku‵paku.+
E matagā te lotou auala, kae e fakaaoga ‵se te lotou malosi.
11 “A te pelofeta mo te faitaulaga e se ‵ma.*+
Ko oti ne maua aka ne au a lā amioga ma‵sei i loto eiloa i toku fale,”+ ko te folafolaga a Ieova.
12 “Tela la, ka mole‵mole olotou auala kae pouli;+Ka ‵tule atu latou kae ka ‵siga.
Me ka aumai ne au te puapuaga ki luga i a latouI te tausaga o te fakasalaga,” ko te folafolaga a Ieova.
13 “Kae ne lavea ne au se mea fakatakalialia i pelofeta o Samalia.+
A olotou valoaga e fakamalosi aka e auala i a Paala,Kae e takitaki ‵se ne latou oku tino Isalaelu.
14 Kae ne lavea ne au a mea matagā i pelofeta o Ielusalema.
E mulilua+ latou kae sa‵sale i mea sē ‵tonu;+E fakamalosi aka* ne latou a tino amio matagā,Kae e se fulitua atu latou ki olotou amioga ma‵sei.
Ki a au eiloa, e fai a latou katoa e pelā mo Sotoma,+Kae ko tino e ‵nofo i ei e fai pelā mo Komolo.”+
15 Tela la, konei a pati a Ieova o kautau ne fai e ‵teke atu ei ki te kau pelofeta:
“Ko fai nei ne au latou ke ‵kai ki lakau ‵konaKae tuku atu a vai poisini ke inu ki ei.+
Me e auala i pelofeta o Ielusalema ne salalau atu i ei a te aposetasi i loto i te fenua.”
16 Konei a pati a Ieova o kautau ne fai mai:
“Sa fakalogo ki pati a pelofeta kolā e fai olotou valoaga ki a koe.+
E fakaloiloi ne latou koe.*
A fakaasiga e faipati ne latou e māfua mai i olotou loto eiloa,+Kae e se māfua mai i te gutu o Ieova.+
17 E fai atu faeloa latou ki tino kolā e se āva mai ki a au,‘A Ieova ne fai mai: “Ka maua ne koutou a te filemu.”’+
Kae ki so se tino telā e tautali i tena loto makeke, e fai atu latou,‘Ka seai se fakalavelave e oko atu ki a koutou.’+
18 Ko oi te tino ne ‵tu fakatasi mo tino kolā e ‵pili ki a IeovaKe lavea kae fakalogo ki ana muna?
Ko oi ne saga tonu atu ki ana muna ko te mea ke lagona ne ia?
19 Kiloke! A te kaumatagi o Ieova ka agi mai mo te kaitaua;E pelā me se afā malosi ka agi mai ki luga i ulu o tino amio ma‵sei.+
20 A te kaitaua o Ieova ka se toe ‵fuliKe oko eiloa ki te taimi ko oti ei ne fakataunu kae fai ne ia a te mea e manako ki ei tena loto.
I te fakaotiotiga o aso fakaoti ka malamalama faka‵lei ei koutou i te mea tenei.
21 Ne seki uga atu ne au a pelofeta, kae ne ‵tele eiloa latou.
Ne seki faipati atu au ki a latou, kae ne fai eiloa olotou valoaga.+
22 Kae kafai ne ‵tu fakatasi latou mo tino kolā e ‵pili mai ki a au,Penei e fai ne latou ke lagona ne tino aku munaKae fai ke fulitua atu a tino ki olotou auala ma‵sei mo olotou faifaiga matagā.”+
23 “E a, au nei se Atua fua e pili mai,” ko te folafolaga a Ieova, “kae e sē se Atua foki mai i koga ‵mao?”
24 “E a, e mafai o ‵muni se tagata i se koga ‵muni ke se lavea ne au a ia?”+ ko te folafolaga a Ieova.
“E a, e se ‵fonu a te lagi mo te lalolagi i a au?”+ ko te folafolaga a Ieova.
25 “Ko oti ne lagona ne au a pelofeta kolā e fai olotou valoaga ‵loi i toku igoa, olotou muna, ‘E isi saku moemiti! E isi saku moemiti!’+
26 Ka pefea te leva e tumau ei a mea konei i loto o pelofeta, ke fai olotou valoaga ‵loi? A latou ne pelofeta e ‵valo a mea ‵loi i olotou loto.+
27 E taumafai latou o fai ke puli i oku tino a toku igoa e auala i moemiti kolā e fakamatala ne latou te suā tino ki te suā tino, e pelā eiloa mo olotou tamana kolā ne puli i a latou a toku igoa ona ko Paala.+
28 A te pelofeta telā e isi sena moemiti ke fakamatala mai tena moemiti, kae ko te tino e nofo mo aku muna e ‵tau o fakamatala mai ne ia aku muna mo te ‵tonu.”
“Se a te mea e ‵pau ei te kausaito mo te saito?” ko te folafolaga a Ieova.
29 “E a, e se ‵pau taku muna mo se afi,”+ ko te folafolaga a Ieova, “kae e pelā me se samala telā e tuki ne ia a te kaupapa?”+
30 “Ko ‵teke atu nei au ki pelofeta,” ko te folafolaga a Ieova, “kolā ne kaisoa ne latou aku muna mai te suā tino.”+
31 “Ko ‵teke atu nei au ki pelofeta,” ko te folafolaga a Ieova, “ko latou kolā e fakaaoga olotou gutu ke fai atu, ‘Ne folafola mai a ia!’”+
32 “Ko ‵teke atu nei au ki pelofeta o moemiti ‵loi,” ko te folafolaga a Ieova, “kolā e fakamatala olotou moemiti kae takitaki ‵se oku tino ona ko olotou loi mo olotou pati fakamata‵mata.”+
“Kae ne seki uga atu ne au latou io me fakatonu atu ki a latou. Tela la, ka seai ne mea aoga e maua ne tino konei mai i a latou,”+ ko te folafolaga a Ieova.
33 “Kae kafai e fesili atu a tino konei io me se pelofeta io me se faitaulaga ki a koe, ‘Se a te amoga ‵mafa* a Ieova?’ e ‵tau o tali atu koe ki a latou, ‘“Ko koutou te amoga ‵mafa! Kae ka ‵pei kea‵tea ne au koutou,”+ ko te folafolaga a Ieova.’
34 E pelā mo te pelofeta io me ko te faitaulaga io me ko tino kolā e fai mai, ‘Tenei te amoga ‵mafa* a Ieova!’ Ka saga atu au ki te tagata tenā mo tena kāiga.
35 Konei a pati e fai atu ne koutou taki tokotasi ki otou tuakoi mo otou taina, ‘Se a te tali mai i a Ieova? Kae ne a muna a Ieova ne fai mai?’
36 Kae e se ‵tau o toe taku atu ne koutou a te amoga ‵mafa* a Ieova, me i te amoga ‵mafa* ko pati eiloa a tino taki tokotasi, kae ko oti ne ‵fuli ne koutou a pati a te Atua ola, ko Ieova o kautau, te ‵tou Atua.
37 “Konei a pati ka fai atu ne koe ki te pelofeta, ‘Se a te tali ne tuku atu ne Ieova ki a koe? Kae ne a pati a Ieova ne fai?
38 Kae kafai e fai atu faeloa koe, “Te amoga ‵mafa* a Ieova!” konei a pati a Ieova ne fai mai: “Ona ko au pati ne fai, ‘Tenei te amoga ‵mafa* a Ieova,’ mai tua o taku faiatuga, ‘E se ‵tau mo koe o fai aka: “Tenei te amoga ‵mafa* a Ieova!”’
39 kiloke! ka sau aka ne au koe kae ‵pei kea‵tea mai i oku mua, ko koe fakatasi mo te fakai telā ne tuku ne au ki a koe mo ou tupuga.
40 Kae ka aumai ne au ki luga i a koe a te luma se-gata-mai mo te masiasi se-gata-mai, telā ka se toe fakapuli atu.”’”+
Fakamatalaga mai lalo
^ Epelu, “somo.”
^ Io me “aposetate.”
^ Epelu, “fakamalosi a lima o.”
^ Io me “E faka‵fonu ne latou koe ki fakamoemoega sē aoga.”
^ Io me “fekau ‵mafa.” A te pati Epelu e lua ana uiga: “se fakamasinoga ‵mafa mai i te Atua” io me “se mea ‵mafa.”
^ Io me “fekau ‵mafa.”
^ Io me “fekau ‵mafa.”
^ Io me “fekau ‵mafa.”
^ Io me “fekau ‵mafa.”
^ Io me “fekau ‵mafa.”
^ Io me “fekau ‵mafa.”
