Ielemia 3:1-25
3 E fesili mai a tino: “Kafai e ‵tuli kea‵tea ne se tagata tena avaga kae tiaki ne tou fafine a ia kae avaga ki te suā tagata, e mata, e ‵tau o toe foki atu a tou tagata ki te fafine tenā?”
E a, e seki fakalailaigina katoatoa a te laukele tenā?+
“Ko oti ne fai ne koe a faifaiga talitāgata mo ou taugasoa e tokouke,+
Kae nei la, e a, e ‵tau o toe foki mai koe ki a au?” ko te folafolaga a Ieova.
2 “Kilo aka ou mata ki mauga e seai ne lakau i ei kae onoono atu ki ei.
Kofea a koga ne seki pukemālō ne koe a tino i ei?
Ne sagasaga koe i tafa o auala o faka‵tali ki a latou,
E pelā me se tino maumausolo i te koga lavaki.
Ne fakalailai faeloa ne koe te fenua
Ki au faifaiga talitāgata mo au amioga ma‵sei.+
3 Tela la, ko oti ne taofi aka a vaiua,+
Kae ko seai foki ne vaiua i te tau e ‵somo aka ei a lau o lakau.
E matafatu koe e pelā me se fafine avaga telā e fai a faifaiga talitāgata;
Ko seai eiloa se ma i a koe.+
4 Kae nei ko kalaga mai koe ki a au,
‘Toku tamana, a koe ko toku taugasoa mai te taimi koi talavou ei au!+
5 E a, e ‵tau o tumau te kaitaua o se tino ki te se-gata-mai,
Io me ita fakamoemoe faeloa?’
E fai ne koe a pati konei,
Kae e fai faeloa ne koe a mea ma‵sei katoa kolā e mafai ne koe o fai.”+
6 I aso o te Tupu ko Iosia,+ ne fai mai a Ieova ki a au: “‘Ne lavea ne koe a faifaiga sē fakamaoni ne fai ne Isalaelu? Ko oti ne fanaka a ia ki luga i mauga ma‵luga katoa kae ki lalo o so se lakau ola ‵lei o fai ana faifaiga talitāgata.+
7 Mai tua o ana faifaiga katoa konei, ne fai atu faeloa au ki a ia ke foki mai ki a au,+ kae ne seki foki mai eiloa a ia; kae ko Iuta ne kilokilo atu faeloa ki tena taina faitogafiti.+
8 I te laveaga ne au a te mea tenā, ne uga ne au kea‵tea te tino sē fakamaoni, ko Isalaelu, mo se pepa fakatalitonu o te ‵talaga o te avaga+ ona ko tena mulilua.+ Kae ko tena taina faitogafiti ko Iuta ne seki mataku; ne fano foki a ia kae fai a faifaiga talitāgata.+
9 Ne manatu māmā a ia ki ana faifaiga talitāgata, kae ne fakalailai faeloa ne ia te laukele kae mulilua mo fatu mo lakau.+
10 Faitalia eiloa a mea katoa konei, a tena taina faitogafiti ko Iuta ne seki foki mai ki a au mo tena loto kātoa, kae ne fakaloiloi mai fua,’ ko te folafolaga a Ieova.”
11 Tenā ne fai mai ei a Ieova ki a au: “Ko oti ne fakaasi mai ne te tino sē fakamaoni ko Isalaelu me e sili atu tena amiotonu i lō te tino faitogafiti ko Iuta.+
12 Fano o folafola atu a pati konei ki te feitu ki mātū:+
“‘“Foki mai, e te tino ‵teke ko Isalaelu,” ko te folafolaga a Ieova.’+ ‘“Au ka se kilo ifo mo te kaitaua ki a koe,+ me i a au e fakamaoni,” ko te folafolaga a Ieova.’ ‘“Ka se tumau toku kaitaua ki te se-gata-mai.
13 Fakaasi ‵tonu mai fua tau mea ‵se, me ko oti ne ‵teke atu koe ki a Ieova tou Atua. Ne tumau eiloa koe i te talia valevale o tino ‵fou* mai lalo o so se lakau ola ‵lei, kae e se fakalogo koe ki toku leo,” ko te folafolaga a Ieova.’”
14 “‵Foki mai, koutou e tama ‵teke,” ko te folafolaga a Ieova. “Me ko fai au mo fai te otou matai tonu;* kae ka puke ne au koutou, e tokotasi mai i se fakai kae tokolua mai i se kāiga, kae ka aumai ne au koutou ki Siona.+
15 Kae ka tuku atu ne au ki a koutou ne tausi mamoe kolā e fai a mea e loto au ki ei,*+ kae ka fagai ne latou koutou ki te iloaga mo te ‵loto o te malamalama.
16 Ka tokouke koutou kae ka ‵fua mai ne koutou a fuataga i te laukele i aso konā,” ko te folafolaga a Ieova.+ “Ka se toe fai mai latou, ‘Te pusa o te feagaiga a Ieova!’ Ka se sae aka te mea tenā i te loto, io me ka se toe masaua ne latou io me sē sologa ki ei, kae ka se toe faite eiloa ne latou.
17 I te taimi tenā ka taku ne latou a Ielusalema ko te nofogaaliki o Ieova;+ kae ko atufenua katoa ka fakamaopoopo fakatasi mai ki te igoa o Ieova i Ielusalema,+ kae ka se toe tau‵tali atu latou mo te loto ma‵keke i olotou loto ma‵sei.”
18 “I aso konā ka sa‵sale fakatasi latou, te kāiga o Iuta i tafa o te kāiga o Isalaelu,+ kae ka o‵mai fakatasi latou mai te fenua i te feitu ki mātū ki loto i te fenua telā ne tuku atu ne au ki otou tupuga e pelā me se tofi.+
19 Kae ne mafaufau aka au, ‘Ne tuku ne au koe fakatasi mo tama tāgata kae tuku atu ki a koe te laukele ‵lei, te ‵toe tofi gali eiloa i atufenua katoa!’+ Ne mafaufau foki au me ka kalaga mai koe ki a au, ‘Toku Tamana!’ kae ka se ‵fuli kea‵tea koe mai te tautali mai i a au.
20 ‘E tonu, e pelā mo te fafine avaga faitogafiti e tiaki ne ia tena avaga, e penā foki koe, e te kāiga o Isalaelu, ko oti ne fakatogafiti ne koe au,’+ ko te folafolaga a Ieova.”
21 E lagona atu se leo i luga i tamā mauga e seai ne lakau i ei,
Ko te tagi mautuutu mo te fakamolemole a tino Isalaelu,
Me ko oti ne faka‵segina te lotou auala;
Ko oti ne fakapuli ne latou a Ieova te lotou Atua.+
22 “‵Foki mai, koutou e tama ‵teke.
Ka faka‵lei aka ne au te tulaga ‵teke o koutou.”+
“Konei matou! Ko o‵mai matou ki a koe,
Me i a koe, e Ieova, ko te motou Atua.+
23 E tonu, a tamā mauga mo te ‵numi i luga i mauga ne mea sē ‵tonu.+
E tonu, a te fakaolataga o Isalaelu e maua i a Ieova te ‵tou Atua.+
24 Kae ko te mea fakamasiasi* ko oti ne fakaseai ne ia a galuega ‵mafa a omotou tupuga talu mai taimi koi talavou ei matou,+
Ko olotou lafu mamoe mo olotou lafu pulumakau,
Ko olotou tama tāgata mo olotou tama fāfine.
25 Fai ke ta‵kato matou ki lalo mo te masiasi,
Kae ke ufi matou ne te motou masiasi,
Me ko oti ne agasala matou ki a Ieova te motou Atua,+
Ko matou mo omotou tamana talu mai taimi koi talavou ei matou ke oko mai ki te aso nei,+
Kae ne seki faka‵logo matou ki te leo o Ieova te motou Atua.”
Fakamatalaga mai lalo
^ Io me “atua fakaa‵tea.”
^ Io me kāti, “tau avaga tagata.”
^ Epelu, “toku loto.”
^ Io me “te atua fakamasiasi.”
