Te Tusi a Ioane 15:1-27
15 “Au ko te vine tonu, kae ko toku Tamana ko te tino galue i vine.
2 E ‵kati ne ia kea‵tea mai i a au a kaula katoa kolā e se ‵fua mai, kae velevele* ne ia a kaula kolā e ‵fua mai ei a fuataga, ko te mea ke ‵fua malosi.+
3 A koutou ko leva ne ‵ma ona ko pati kolā ko oti ne fai atu ne au ki a koutou.+
4 Ke tumau koutou i te ‵kau fakatasi mo au, kae ka tumau au i te ‵kau fakatasi mo koutou. E pelā eiloa mo te kaula telā e se mafai o fua mai i a ia eiloa ne fuataga seiloga ke ‵piki ‵mau ki te vine, e penā foki koutou māfai e se tumau i te ‵kau fakatasi mo au.+
5 Au ko te vine, kae ko koutou ko kaula. So se tino e tumau i te ‵kau fakatasi mo au, kae ko au e ‵kau fakatasi mo ia, a te tino tenā e fua malosi mai;+ me e seai eiloa se mea e mafai ne koutou o fai e aunoa mo au.
6 Kafai e se tumau se tino i te ‵kau fakatasi mo au, ka ‵pei a ia kea‵tea e pelā me se kaula ko pakupaku. Kae ka fakaputu ne tāgata a kaula konā kae ‵pei atu ki te afi ke ‵sunu i ei.
7 Kafai e tumau koutou i te ‵kau fakatasi mo au kae tumau foki aku muna i a koutou, fakatagi mai la ki so se mea e ma‵nako koutou ki ei kae ka maua ne koutou.+
8 E faka‵malugina toku Tamana i te mea tenei, māfai e ‵fua malosi mai faeloa koutou kae e fakatalitonu atu i a koutou ko oku soko.+
9 E pelā eiloa mo te Tamana e alofa mai ki a au,+ kae ko au e alofa ki a koutou; ke tumau i toku alofa.
10 Kafai e faka‵logo koutou ki aku fakatonuga, ka tumau koutou i toku alofa, e pelā eiloa mo au ne fakalogo ki fakatonuga a te Tamana kae tumau i tena alofa.
11 “Ne faipati atu ne au a mea konei ki a koutou ko te mea ke maua i loto i a koutou a te fiafia tenei i a au kae ke katoatoa foki te otou fia‵fia.+
12 Tenei taku fakatonuga, ke fakatau a‵lofa koutou e pelā eiloa mo au ne alofa ki a koutou.+
13 E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa.+
14 A koutou ko oku taugasoa māfai e fai ne koutou a mea kolā e fakatonu atu ne au ki a koutou.+
15 Ko se toe taku ne au koutou ne pologa, me i te pologa e se iloa ne ia a mea e fai ne tena matai. Kae ko taku ne au koutou ne taugasoa, me ko oti ne fakaasi atu ne au ki a koutou a mea katoa kolā ne lagona ne au mai toku Tamana.
16 Ne seki filifili ne koutou au, kae ne filifili ne au koutou, kae ne ‵tofi ne au koutou ke olo ko te mea ke ‵fua mai faeloa ne fuataga kae ke tumau otou fuataga; ko te mea ke tuku atu ne te Tamana so se mea telā e fakatagi atu ei koutou i toku igoa.+
17 “E fakatonu atu ne au a mea konei ki a koutou, ko te mea ke fakatau a‵lofa koutou.+
18 Kafai e takalia‵lia te lalolagi ki a koutou, e iloa ne koutou me ne takalia‵lia muamua mai ki a au kae koi tuai o takalia‵lia atu ki a koutou.+
19 Kafai koutou ne vaega o te lalolagi, e fia‵fia eiloa te lalolagi ki a koutou me ko fai koutou mo ana tino. Kae ona ko koutou e se ne vaega o te lalolagi,+ kae ko oti ne filifili ne au koutou mai te lalolagi, tenei te pogai e takalia‵lia ei te lalolagi ki a koutou.+
20 Masaua aku pati ne fai atu ki a koutou: e se sili atu te pologa i tena matai. Kafai ne fakasaua mai latou ki a au, ka fakasaua atu foki ki a koutou;+ kafai ne faka‵logo latou ki aku muna, ka faka‵logo foki ki otou muna.
21 Kae ka fai ne latou a mea katoa konei o ‵teke ki a koutou ona ko toku igoa, me e se iloa ne latou a te Atua telā ne uga mai ne ia au.+
22 Moi ne seki vau au kae faipati atu ki a latou, penei ko seai ne olotou agasala.+ Kae nei la ko seai se lotou fakamasakoga e uiga ki olotou agasala.+
23 So se tino e takalialia ki a au e takalialia foki ki toku Tamana.+
24 Moi ne seki fai ne au i a latou a galuega kolā e seki fai aka eiloa ne se isi tino, penei e se agasala latou;+ kae nei la ko oti ne lavea ne latou au kae takalia‵lia mai ki a au e pelā foki mo toku Tamana.
25 Kae ne tupu a te mea tenei ke fakataunu ei a pati kolā ne tusi i te lotou Tulafono: ‘Ne takalia‵lia mai a latou ki a au e aunoa mo se pogai.’+
26 Kafai e oko mai te fesoasoani telā ka uga mai ne au ki a koutou mai te Tamana, ko te agaga o te munatonu+ telā ka tuku mai ne te Tamana, ka molimau atu eiloa a ia e uiga ki a au;+
27 kae ko koutou, ka molimau+ foki ki ei, me ne ‵nofo fakatasi faeloa koutou mo au mai te kamataga o taku taviniga.
Fakamatalaga mai lalo
^ Eleni, “faka‵ma.”
