Te Tusi a Ioane 16:1-33
16 “Ne faipati atu ne au a mea konei ki a koutou ke mo a ma pa‵kū koutou.
2 Ka faka‵tea koutou ne tino mai te sunako.+ E tonu, ka oko mai te itula ka mafau‵fau aka ei a tino katoa kolā e tamate ne latou koutou+ me ko oti ne ofo atu ne latou se taviniga tapu ki te Atua.
3 Kae ka fai eiloa ne latou a mea konei me e se iloa ne latou te Tamana e pelā foki mo au.+
4 Kae ko faipati atu ne au a mea konei ki a koutou me kafai ko oko mai te itula ka ‵tupu ei a mea konā, ko masaua ei ne koutou me ko oti ne faipati atu ne au ki a koutou a mea konā.+
“Ne seki faipati atu muamua ne au a mea konei ki a koutou me i a au ne ‵nofo mo koutou.
5 Kae nei la au ka fano ki te Atua telā ne uga mai ne ia au;+ kae e seai eiloa se tino i a koutou ne fesili mai ki a au, ‘A koe e fano ki fea?’
6 Kae ona ko te mea ne faipati atu ne au a mea konei ki a koutou ko fanoa‵noa ei otou loto.+
7 E ui i ei, e fai atu ne au ki a koutou te mea tonu, Au e fano kea‵tea mō te ‵lei o koutou. Me kafai e se fano au kea‵tea, ka se mafai eiloa o fanaifo ki a koutou a te fesoasoani.+ Kae kafai e fano au, ko uga mai ei ne au ki a koutou.
8 Kae kafai e oko mai a te fesoasoani tenā ka tuku atu ne ia se fakamaoniga mautinoa ki te lalolagi e uiga ki te agasala, te amiotonu, mo te faiga o fakamasinoga:
9 te mea muamua ko te agasala,+ me e seki fakaasi mai ne latou te fakatuanaki ki a au;+
10 ka oti ko te amiotonu, me i a au ka fano ki te Tamana kae ka se toe lavea ne koutou au;
11 ka oti ko te fakamasinoga, me ko oti ne fakamasino aka a te pule o te lalolagi tenei.+
12 “E uke a mea koi fia fai atu ne au ki a koutou, kae e se mafai o malamalama koutou i ei i te taimi nei.
13 Kae kafai e oko mai a te fesoasoani tenā, ko te agaga o te munatonu,+ ka takitaki ne ia koutou ki mea ‵tonu katoa, me ka se faipati eiloa a ia ki ana pati, kae ko mea kolā e lagona ne ia ka faipati ne ia, kae ka folafola atu ne ia ki a koutou a mea kolā ka oko mai.+
14 Ka faka‵malu ne ia au,+ me ka maua ne ia a mea mai i a au kae ka folafola atu ne ia a mea konā ki a koutou.+
15 A mea katoa a te Tamana i a aku.+ Tenā te pogai ne fai atu ei au me ne maua ne ia a mea mai i a au kae folafola atu ne ia a mea konā ki a koutou.
16 E se leva nei ko se toe lavea ei au ne koutou,+ kae e se leva foki ka toe lavea ne koutou au.”
17 Ne fai aka ana nisi soko i a latou eiloa; “Se a te uiga o ana pati konei ne fai mai ki a tatou, ‘E se leva nei ko se toe lavea au ne koutou, kae e se leva foki ka toe lavea ne koutou au,’ mo ana pati foki, ‘me i a au ka fano ki te Tamana’?”
18 Tenā ne fai aka ei latou: “Se a te uiga o ana pati, ‘e se leva nei’? E se iloa ne tatou a te mea e faipati a ia ki ei.”
19 Ne iloa ne Iesu me ne fia fesili atu latou ki a ia, fai atu ei a ia ki a latou: “E a, e fakatau fesilisili koutou e uiga ki te mea tenei ona ko au ne fai atu: ‘E se leva nei ko se toe lavea au ne koutou, kae e se leva foki ka toe lavea ne koutou au’?
20 Au e fai ‵tonu atu ki a koutou, a koutou ka ‵tagi kae ‵tagi mautuutu, kae ko te lalolagi ka fia‵fia; ka fanoa‵noa koutou kae ka ‵fuli te otou fanoa‵noa ki te fia‵fia.+
21 Kafai ko fanau se fafine, e fanoanoa a ia me ko oko mai tena itula, kae kafai ko oti ne fanau mai ne ia te tamaliki, ko puli ei i a ia te logo‵mae ona ko te fiafia me ko oti ne fanau mai se tino ki te lalolagi.
22 E penā foki koutou, ko fanoa‵noa nei koutou; kae ka toe lavea ne au koutou ko ‵fonu otou loto i te fia‵fia,+ kae e seai se tino ka ave ne ia kea‵tea te otou fiafia.
23 I te aso tenā, ka seai eiloa se fesili e ‵sili mai ne koutou ki a au. Au e fai ‵tonu atu ki a koutou, kafai e fakatagi atu koutou ki te Tamana mō so se mea,+ ka tuku atu eiloa ne ia ki a koutou a te mea tenā i toku igoa.+
24 Ke oko mai ki te taimi nei, e seki fakatagi atu eiloa koutou ki se mea i toku igoa. Fakatagi atu kae ka maua ne koutou, ko te mea ke katoatoa te otou fia‵fia.
25 “Ko oti ne faipati atu ne au a mea konei i tala fakatusa. Ka oko mai te taimi ka se toe faipati atu ei au i tala fakatusa, kae ka faipati ‵tonu atu ne au ki a koutou a mea e uiga ki te Tamana.
26 I te aso tenā ka fakatagi atu koutou ki te Tamana i toku igoa, kae e se fai atu au ki a koutou me ka fakatagi atu au ki te Tamana e uiga mō koutou.
27 Me e alofa eiloa te Tamana ki a koutou, ona ko koutou ne a‵lofa mai ki a au,+ kae e tali‵tonu i a au ne vau e pelā me ko te sui o te Atua.+
28 Au ne vau e pelā me ko te sui o te Tamana kae ne vau ki te lalolagi. Nei la, ka tiaki ne au te lalolagi o fano ki te Tamana.”+
29 Ne fai atu ana soko: “Kiloke! Nei la, ko faipati ‵tonu mai eiloa koe, kae ko se fakaaoga a tala fakatusa.
30 Ko iloa nei ne matou me e iloa ne koe a mea katoa, kae e se manakogina ke fakafesili koe ne se tino. Ona ko te mea tenei ko tali‵tonu ei matou i a koe ne vau mai te Atua.”
31 Ne tali atu a Iesu ki a latou: “E a, ko tali‵tonu nei koutou?
32 Kiloke! Ka oko mai te itula, e tonu, ko oti eiloa ne oko mai, kae ka mafuta valevale koutou taki tokotasi ki otou fale kae ka tiaki ne koutou au ke nofo tokotasi i konei.+ Kae ko au e se nofo tokotasi me i te Tamana e fakatasi mai ki a au.+
33 Ne faipati atu ne au a mea konei ki a koutou ko te mea ke maua ne koutou a te filemu+ e auala i a au. Ka maua ne koutou a fakalavelave i te lalolagi nei, kae ke loto ‵toa! Ko oti ne fakatakavale ne au te lalolagi nei.”+
