Te Tusi a Ioane 20:1-31
20 I te aso muamua o te vaiaso, ne alausu a Malia te Makatala o fano ki te tanuga,+ kae koi tai pouli eiloa, kae ne lavea ne ia me ko oti ne ave kea‵tea a te fatu mai te tanuga.+
2 Ne tele atu a ia ki a Simona Petelu mo te suā soko telā ne alofa malosi a Iesu ki ei,+ kae fai atu ki a lāua: “Ko oti ne ave kea‵tea ne latou te Aliki mai te tanuga,+ kae e se iloa ne tatou te koga ne tuku ei ne latou a ia.”
3 Tenā ne olo atu ei a Petelu mo te suā soko ki te tanuga.
4 Ne kamata o ‵tele fakatasi atu a lāua, kae ne makini atu te suā soko i a Petelu, oko muamua atu ei a ia ki te tanuga.
5 Ne fatio atu a ia ki loto lavea ei ne ia a laugatu lino e tuku mai,+ kae ne seki fano a ia ki loto.
6 Ne oko atu a Simona Petelu mai i ana tua, kae ne ulu atu ki loto i te tanuga. Ne lavea ne ia a laugatu lino e tuku mai i ei.
7 A te laugatu telā ne pulou i tena ulu e se tuku fakatasi mo nisi laugatu, kae ko oti ne pelu kae tuku i se isi koga.
8 Ne ulu atu foki ki loto a te soko telā ne oko muamua ki te tanuga, kae ne lavea ne ia kae talitonu foki a ia.
9 Me ne seki malamalama latou i Tusitusiga Tapu me e ‵tau o toetu mai a ia mai te mate.+
10 Tenā ne toe ‵foki ei a soko konā ki lā fale.
11 Ne tu atu eiloa a Malia i tua i tafa o te tanuga, kae tagi i ei. Kae koi tagi a ia ne fatio atu tou fafine ki loto i te tanuga,
12 kae ne lavea ne ia a agelu+ e tokolua e ‵pei ki gatu ‵kena, e saga‵saga i te koga ne takato ei te foitino o Iesu, e tokotasi i fogaulu kae e tokotasi i mulivae.
13 Kae ne fai atu lāua ki a ia: “Te fafine, kaia e tagi ei koe?” Ne fai atu a ia ki a lāua: “Ko oti ne ave ne latou toku Aliki kea‵tea, kae e se iloa ne au te koga ne tuku ne latou a ia i ei.”
14 I te otiga o ana pati konā, mafuli aka tou fafine kae lavea ne ia a Iesu e tu mai, kae ne seki iloa ne ia me ko Iesu tenā.+
15 Ne fai atu a Iesu ki a ia: “Toku fafine, kaia e tagi ei koe? Ko oi e ‵sala koe ki ei?” Ne leake tou fafine i a ia ko te tino fai fatoaga, fai atu ei ki a ia: “Tou ‵malu, kafai ne ave kea‵tea ne koe a ia, fakaasi mai la ki a au te koga ne tuku ne koe i ei, kae ka ave ne au a ia kea‵tea.”
16 Ne fai atu a Iesu ki a ia: “Malia!” Ne toe mafuli aka tou fafine kae fai atu i te ‵gana Epelu: “Laponi!” (ko tena uiga “Te Faiakoga!”)
17 Ne fai atu a Iesu ki a ia: “Sa ‵piki mai ki a au, me i a au e seki fanaka ki te Tamana. Kae fano nei ki oku taina+ o fai atu ki a latou, ‘Au ka fanaka ki toku Tamana+ telā ko te otou Tamana, ki toku Atua+ telā ko te otou Atua.’”
18 Ne fanatu a Malia te Makatala o fakailoa atu a te tala tenā ki te kau soko: “Ko oti ne lavea ne au te Aliki!” Kae ne fai atu ne ia ki a latou a pati a Iesu.+
19 I te afiafi o te aso tenā, ko te aso muamua o te vaiaso, ne ‵loka a mataloa o te kau soko ona ko te ma‵taku i tino Iutaia. Ne fanatu a Iesu, tu i tafa o latou kae fai atu: “Ke i luga i a koutou te filemu.”+
20 I te otiga o ana pati, fakaasi atu ei ne ia ki a latou ana lima mo tena kaokao.+ Tenā ne fia‵fia malosi ei a soko i te laveaga ne latou a te Aliki.+
21 Ne toe fai atu a Iesu ki a latou: “Ke i luga i a koutou te filemu.+ E pelā eiloa mo te Tamana ne uga mai ne ia au,+ ka uga atu foki ne au koutou.”+
22 I te otiga o ana pati konei ne ‵pusi atu tena mānava ki a latou kae fai atu: “Ke talia ne koutou te agaga tapu.+
23 Kafai e fakamagalo ne koutou a agasala a se tino ka fakamagalogina eiloa; kafai e se fakamagalo ne koutou a agasala a se tino, e se fakamagalogina eiloa.”
24 Kae ko Toma,+ se tokotasi o te toko Sefululua, telā ne taku ki te Masaga, ne seki nofo i konā i te taimi ne fanatu ei a Iesu.
25 Ne fai atu a nisi soko ki a ia: “Ko oti ne lavea ne matou te Aliki!” Kae ne fai atu a ia ki a latou: “E se talitonu eiloa au seiloga ke lavea ne au i ana lima a pūga o fao kae faulu toku matikao ki ei kae faulu atu foki toku lima ki tena kaokao.”+
26 I te valu o aso mai tua ifo i ei, ne toe ‵nofo atu ana soko i loto i se fale fakatasi mo Toma. E ui eiloa ne ‵loka a mataloa, ne fanatu a Iesu, tu i olotou tafa, kae fai atu: “Ke i luga i a koutou te filemu.”+
27 Fai atu ei a ia ki a Toma: “Tuku mai tou matikao ki konei, kae onoono ki oku lima, faulu tou lima ki toku kaokao, ke na talitonu kae fakagata te fakalotolotolua.”
28 Ne tali atu a Toma ki a ia: “Toku Aliki mo toku Atua!”
29 Ne fai atu a Iesu ki a ia: “E a, e talitonu koe me ko oti ne lavea ne koe au? E fia‵fia eiloa a tino kolā e se lavea ne latou kae e tali‵tonu.”
30 E tonu, ne fai foki ne Iesu a galuega ‵mana e uke i mua o ana soko, kolā e se tusi i te peluga tusi tenei.+
31 Kae ko oti ne tusi a mea konei ki lalo ko te mea ke tali‵tonu koutou i a Iesu ko te Keliso, te Tama a te Atua, kae ona ko te otou tali‵tonu ko maua ei ne koutou a te ola e auala i tena igoa.+
