Te Tusi a Ioane 21:1-25
21 I te otiga o te mea tenei, ne toe fakaasi* atu a Iesu ki te kau soko i te Tai o Tipelia. Ne fakaasi atu a ia i te auala tenei.
2 Ne ‵nofo fakatasi i konā a Simona Petelu, Toma (telā e taku ki te Masaga),+ Natanielu+ mai Kana i Kalilaia, ko tama tāgata a Sepetaio,+ mo nisi soko e tokolua.
3 Ne fai atu a Simona Petelu ki a latou: “Au ka fano o faiika.” Ne fai atu latou ki a ia: “A matou e olo atu i a koe.” Ne ‵sopo latou ki te pōti olo ei latou. Kae i te po kātoa tenā e seai eiloa se lotou ika ne maua.+
4 Kae i te tafataeao ‵malu ne takatutu a Iesu i te tafatai, kae ne seki iloa ne ana soko me ko Iesu tenā.+
5 Tenā ne fai atu ei a Iesu ki a latou: “Aku tama, e isi ne otou meakai?”* Ne tali atu latou: “E seai!”
6 Ana muna ki a latou: “‵Pei ifo te tili i te feitu fakaatamai o te pōti kae ka maua ne koutou ne ika i ei.” Tenā ne ‵pei ifo ei te lotou tili, kae ne seki mafai ne latou o ‵futi aka ona ko te uke o ika.+
7 Kae ko te soko telā ne alofa a Iesu ki ei,+ ne fai atu ki a Petelu: “Ko te Aliki tenei!” I te lagonaga ne Simona Petelu me ko te Aliki tenā, ne pei tena tilima, me e seai sena gatu, kae eva ki lalo i te tai.
8 Kae ne olo atu a nisi soko i te tamā pōti o ‵futi aka te tili e ‵fonu i ika, me e se ‵mao malosi latou mai te fenua, kāti e 300 futu* te ‵mao.
9 I te lotou okoga ki uta, lavea ei ne latou a te afi malala mo ika e tafola i luga i ei mo falaoa.
10 Ne fai atu a Iesu ki a latou: “Aumai ne ika mai otou ika konā ne maua.”
11 Ne sopo a Simona Petelu ki te pōti kae ‵futi aka te tili e ‵fonu i ika ki uta, e 153 te aofaki o latou. E tiga eiloa te uke o ika, ne seki masae te tili.
12 Ne fai atu a Iesu ki a latou: “O‵mai o ‵kai.” E seai eiloa se soko ne lava tena loto toa ke fesili atu ki a ia: “Ko oi koe?” me ne iloa ne latou i a ia ko te Aliki.
13 Ne vau a Iesu, puke ki falaoa kae tuku atu ki a latou, kae e penā foki a ika.
14 Tenei te tolu o taimi+ ne fakasae atu ei a Iesu ki ana soko mai tua o tena fakatuakaga mai te mate.
15 I te otiga a latou ne ‵kai, fai atu ei a Iesu ki a Simona Petelu: “Simona te tama a Ioane, e a, e sili atu tou alofa ki a au i lō mea konei?” Ne tali atu a ia: “Ao, e te Aliki, e iloa ne koe i a au e alofa malosi ki a koe.” Muna a Iesu ki a ia: “Fagai aku tamā mamoe.”+
16 Ne toe fai atu a Iesu ki a ia i te lua o taimi: “Simona te tama a Ioane, a koe e alofa mai ki a au?” Ne tali atu a ia: “Ao, e te Aliki, e iloa ne koe i a au e alofa malosi ki a koe.” Muna a Iesu ki a ia: “Tausi aku tamā mamoe.”+
17 Ne toe fai atu a Iesu ki a ia i te tolu o taimi: “Simona te tama a Ioane, a koe e alofa mai ki a au?” Ne seki fiafia a Petelu me ne fesili fakatolu atu a Iesu ki a ia: “A koe e alofa mai ki a au?” Ana muna ki a ia: “Te Aliki, e iloa ne koe a mea katoa; e iloa ne koe i a au e alofa malosi ki a koe.” Ne fai atu a Iesu ki a ia: “Fagai aku tamā mamoe.+
18 Au e fai ‵tonu atu ki a koe, kae koi tamaliki koe, e fakapei eiloa ne koe ou gatu kae fano sāle ki so se koga e manako koe ki ei. Kae kafai ko toeaina koe ka ‵fola atu ou lima kae ka fakapei ou gatu ne se isi tagata kae ka ‵taki atu koe ki te koga telā e se manako koe ki ei.”
19 Ne fai ne ia a pati konei ke fakaasi atu ei te vaegā mate telā ka mate a ia i ei, kae ka faka‵malu ei te Atua. I te otiga o ana pati konei, fai atu ei ki a Petelu: “Tautali mai faeloa i a au.”+
20 Ne mafuli aka a Petelu kae lavea ne ia te soko telā ne alofa a Iesu ki ei+ e tautali atu i a lāua, ko te tino telā ne fakapale atu ki ana fatafata i te ‵kaiga i te afiafi, kae fai atu: “Te Aliki, ko oi te tino ka fakatogafiti ne ia koe?”
21 Tela la, i te laveaga ne Petelu a ia, fai atu ei ki a Iesu: “Te Aliki, kae pefea a te tagata tenei?”
22 Ne fai atu a Iesu ki a ia: “Kafai ko toku loto ke tumau a ia ke oko ki te taimi e toe foki mai ei au, se a tau fekau i ei? Tautali mai fua koe i a au.”
23 Ne ‵logo fakamuli a taina i te tala me i te soko tenā ka se mate. Kae ne seki fai atu a Iesu ki te soko tenā me i a ia ka se mate eiloa, kae ne fai atu penei: “Kafai ko toku loto ke tumau a ia ke oko ki te taimi e toe foki mai ei au, se a tau fekau i ei?”
24 Tenei eiloa te soko+ telā e molimau mai e uiga ki mea konei kae ne tusi mai foki ne ia a mea konei, kae e iloa ne tatou me i tena molimau e tonu eiloa.
25 E tonu, e uke ‵ki eiloa a nisi mea kolā ne fai ne Iesu, kae i taku faka‵tau moi ne tusi fakalikiliki katoa ki lalo ka se ofi a peluga tusi katoa konā i te lalolagi.+
