Te Tusi a Ioane 8:12-59
8 12 Kae ne fai atu foki a Iesu ki a latou, ana muna: “Au ko te mainaga o te lalolagi.+ So se tino e tautali mai i a au ka se mafai eiloa o sasale i te pouliga, kae ka maua ne ia te mainaga+ o te ola.”
13 Tenā ne fai atu ei a te kau Falesaio ki a ia: “E molimau koe ki a koe eiloa; a tau molimau e se tonu.”
14 Ne tali atu a Iesu ki a latou: “Kafai foki e molimau au ki a au eiloa, e tonu loa taku molimau, me e iloa ne au te koga ne vau ei au mo te koga ka fano au ki ei.+ Kae e se iloa ne koutou te koga ne vau ei au mo te koga ka fano au ki ei.
15 A koutou e fakamasino e ‵tusa mo mea faka-te-foitino;+ kae e seai eiloa se tino e fakamasino ne au.
16 Kafai e fai ne au te fakamasinoga, e tonu eiloa taku fakamasinoga, me e se ko au fua tokotasi, kae ko te Tamana telā ne uga mai ne ia au e fakatasi mai ki a au.+
17 Kae e tusi mai foki i te otou Tulafono: ‘A te molimau a tino e tokolua e tonu.’+
18 Au ko te tino telā e molimau e uiga ki a au, kae ko te Tamana telā ne uga mai ne ia au e molimau foki ki a au.”+
19 Kae ne fai atu latou ki a ia: “Tefea tou Tamana?” Ne tali atu a Iesu: “E se iloa ne koutou au io me ko toku Tamana.+ Moi ne iloa ne koutou au, e iloa foki ne koutou toku Tamana.”+
20 Ne faipati ne ia a pati konei i te koga ‵teutupe+ kae koi akoako atu a ia i te faletapu. Kae ne seki puke a ia ne se tino me e seki oko ki tena taimi tonu.+
21 Ne toe fai atu a ia ki a latou: “Au ka fano kea‵tea, ka salasala koutou ki a au, kae ka ‵mate koutou i otou agasala.+ Ko te koga e fano au ki ei e se mafai ne koutou o ‵mai ki ei.”+
22 Tenā ne kamata ei o fai atu a tino Iutaia: “E a, ka tamate ne ia a ia eiloa? Me e fai mai a ia, ‘Ko te koga e fano au ki ei e se mafai ne koutou o ‵mai ki ei.”
23 Ne fai atu a ia ki a latou: “A koutou ne tino i lalo nei; au se tino mai i luga.+ A koutou ne tino o te lalolagi nei; kae ko au e sē se tino mai te lalolagi nei.
24 Tenā te pogai e fai atu ei au ki a koutou: Ka ‵mate koutou i otou agasala. Me kafai e se tali‵tonu koutou i a au ko te tino tenā, ka ‵mate eiloa koutou i otou agasala.”
25 Ne fai atu latou ki a ia: “Ko oi la koe?” Ne fai atu a Iesu ki a latou: “Kaia e faipati atu ei au ki a koutou?
26 E uke a mea e fia faipati atu ne au e uiga ki a koutou kae e uke foki a mea e ‵tau o fakamasino ne au. Se mea tonu me i te Atua telā ne uga mai ne ia au e tonu, kae ko mea eiloa kolā ne lagona ne au mai i a ia e faipati atu ne au i te lalolagi.”+
27 Ne seki maina latou me ne faipati a ia ki a latou e uiga ki te Tamana.
28 Tenā ne fai atu ei a Iesu: “Kafai ko oti ne sisi aka ne koutou te Tama a te tagata,+ ko iloa ei ne koutou i a au ko ia+ kae seai se mea e fai ne au i toku loto eiloa,+ kae ko mea fua kolā e akoako mai ne te Tamana ki a au e faipati ne au.
29 Kae ko te Atua telā ne uga mai ne ia au e fakatasi mai ki a au; e seki tuku tiaki ne ia au, me fai faeloa ne au a mea kolā e fiafia a ia ki ei.”+
30 Kae koi faipati a ia ki mea konei, ne fakatuanaki a tino e tokouke ki a ia.
31 Ne fai atu a Iesu ki tino Iutaia kolā ne tali‵tonu ki a ia: “Kafai e tumau koutou i aku muna, ko oku soko ‵tonu koutou,
32 kae ka iloa ne koutou te munatonu,+ kae ko te munatonu ka fakasaoloto ne ia koutou.”+
33 Ne tali atu latou ki a ia: “A matou ko fanau a Apelaamo kae ne seki ‵nofo pologa eiloa matou ki se tino. E mafai la pefea o fai mai koe, ‘Ka fakasaoloto koutou’?”
34 Ne tali atu a Iesu ki a latou: “Au e fai ‵tonu atu ki a koutou, so se tino e fai ne ia te agasala ko te pologa eiloa a te agasala.+
35 E se gata i ei, a te pologa e se tumau i loto i te kaufale ki te se-gata-mai; kae ko te tama e tumau ki te se-gata-mai.
36 Tela la, kafai e fakasaoloto koutou ne te Tama, ka saoloto tonu eiloa koutou.
37 E iloa ne au i a koutou ko fanau a Apelaamo. Kae ko koutou e lamalama ke tamate au, me e se talia ne koutou aku muna.
38 E faipati ne au a mea kolā ko oti ne lavea ne au i te taimi ne fakatasi ei au mo toku Tamana,+ kae ko koutou e fai ne koutou a mea kolā ne lagona ne koutou mai te otou tamana.”
39 Ne tali atu latou ki a ia: “A te motou tamana ko Apelaamo.” Muna a Iesu ki a latou: “Kafai koutou ko fanau a Apelaamo,+ ke fai la ne koutou a galuega a Apelaamo.
40 Kae nei ko lamalama koutou ke tamate au, te tagata telā ne fai atu ne ia ki a koutou a te mea tonu telā ne lagona ne au mai te Atua.+ Ne seki fai ne Apelaamo a te mea tenei.
41 E fai ne koutou a galuega a te otou tamana.” Olotou muna ki a ia: “A matou e seki fa‵nau mai i amioga ma‵sei;* e tokotasi te motou Tamana, ko te Atua.”
42 Ne fai atu a Iesu ki a latou: “Moi fai te otou Tamana ko te Atua, penei ko a‵lofa mai koutou ki a au,+ me i a au ne vau mai te Atua kae tenei au ko nofo atu i konei. Ne seki vau au i a au eiloa, kae ko au ne uga mai ne te Atua.+
43 Kaia e se maina ei koutou i aku pati? Me e se mafai o faka‵logo koutou ki aku muna.
44 A koutou ko fanau a te otou tamana ko te Tiapolo, kae e fai ne koutou a mea e manako ki ei te otou tamana.+ A ia se tino tatino i te kamataga,+ kae ne seki tumau i te munatonu, me e seai se munatonu i loto i a ia. Kafai e faipati a ia ki te loi, ko ana pati eiloa konā, me i a ia se tino loi kae ko te tamana foki o te loi.+
45 Kae ko au e faipati ki te mea tonu, kae e se tali‵tonu koutou ki a au.
46 Ko oi te tino i a koutou e mafai o fai mai i a au e agasala? Kafai e faipati au ki te mea tonu, kaia e se tali‵tonu ei koutou ki a au?
47 A te tino telā e vau mai te Atua e fakalogo ki muna a te Atua.+ Tenei te pogai e se faka‵logo ei koutou, i a koutou ne seki o‵mai mai te Atua.”+
48 Ne tali atu a tino Iutaia ki a ia: “E a, e se ‵tonu omotou muna konei, ‘A koe se tino Samalia+ kae e isi se temoni i a koe’?”+
49 Ne tali atu a Iesu: “E seai se temoni i a au, kae e āva au ki toku Tamana, kae ko koutou e se āva mai ki a au.
50 Kae ko au e se ‵sala ki oku tavaega;+ e isi se Tino e manako o tuku mai ne ia ki a au kae ko ia foki ko te famasino.
51 Au e fai ‵tonu atu ki a koutou, so se tino e fakalogo ki aku pati, ka se lavea eiloa ne ia te mate.”+
52 Ne fai atu a tino Iutaia ki a ia: “Nei la, ko iloa eiloa ne matou me e isi se temoni i a koe. Ko mate a Apelaamo e pelā foki mo te kau pelofeta, kae e fai mai koe, ‘So se tino e fakalogo ki aku pati, ka se tami eiloa ki te mate.’
53 E a, e sili atu koe i te motou tamana ko Apelaamo telā ko mate? Ko ‵mate atu foki a pelofeta. Kae ko oi la koe?”
54 Ne tali atu a Iesu: “Kafai e faka‵malu ne au a au eiloa, e seai se aoga o toku ‵malu. Ko toku Tamana e faka‵malu ne ia au,+ ko te tino telā e fai mai koutou me ko te otou Atua.
55 E se iloa ne koutou a ia,+ kae e iloa ne au a ia.+ Kafai e fai atu au me e se iloa ne au a ia, ka fai eiloa au e pelā mo koutou, se tino loi. Kae e iloa ne au a ia kae e fakalogo foki au ki ana muna.
56 Ne fiafia malosi a Apelaamo te otou tamana kae ne fakamoemoe a ia o kilo ki toku aso, kae ne lavea ne ia kae fiafia.”+
57 Tenā ne fai atu ei a tino Iutaia ki a ia: “E seki kātoa tou 50 tausaga, kae e fai mai koe me ko oti ne lavea ne koe a Apelaamo?”
58 Ne fai atu a Iesu ki a latou: “Au e fai ‵tonu atu ki a koutou, kae koi tuai o fanau mai a Apelaamo, kae ko leva au ne ola.”+
59 Ne puke ne latou a fatu ke peipei a ia, kae ne ‵muni a Iesu fano ei ki tua mo te faletapu.
