Iosua 18:1-28
18 Ne maopoopo a tino Isalaelu katoa i Sailo,+ kae ne fakatu aka ne latou i konā a te faleie o maopoopoga,+ me ko oti ne fakatakavale ne latou te fenua tenā.+
2 Kae e toe fitu a matakāiga o tino Isalaelu kolā e seki tuku ki ei olotou tofi.
3 Tenā ne fai atu ei a Iosua ki tino Isalaelu: “E pefea te leva ka fakatuai ei koutou o olo o puke a te fenua telā ko oti ne tuku atu ne Ieova te Atua o otou tupuga ki a koutou?+
4 Aumai ki a au ne tāgata e taki tokotolu mai matakāiga takitasi ke olo i loto i te fenua o fakamailoga a tuakoi e ‵tusa eiloa mo olotou tofi. Ko ‵foki mai ei latou ki a au.
5 E ‵tau mo latou o vaevae i a latou eiloa a te fenua ki vaega e fitu.+ Ka nofo eiloa a Iuta i tena kogā fenua i te feitu ki saute,+ kae ko te kaukāiga o Iosefa ka ‵nofo eiloa i te lotou kogā fenua i te feitu ki mātū.+
6 E pelā mo koutou, fakamailoga a tuakoi o te fenua ki vaega e fitu, kae aumai ki a au, ko fai ei ne au se vili+ mō koutou i mua o Ieova te ‵tou Atua.
7 Kae ko tino Levi e seai se lotou vaega i a koutou,+ me i te lotou tavini atu e pelā me ne faitaulaga a Ieova ko te lotou tofi tenā;+ kae ko Kato, Leupena mo te āfa o te matakāiga o Manase+ ko oti ne puke olotou tofi i te feitu ki saegala o te Iolitana, kolā ne tuku atu ne Mose te tavini a Ieova ki a latou.”
8 Ne fakatoka a tāgata o olo, kae ne fakatonu atu a Iosua ki tino kolā ka fakamailoga ne latou a tuakoi o te fenua: “Olo o fakamailoga a tuakoi i loto i te fenua ko ‵foki mai ei koutou ki a au, kae ka fai ne au se vili mō koutou i konei i mua o Ieova i Sailo.”+
9 Ne olo a tāgata konā i loto i te fenua kae fakamailoga ne latou a tuakoi ki fakai i vaega e fitu, kae fakamau ne latou ki loto i se tusi. Oti aka, ‵foki atu ei latou ki a Iosua i tena koga nofo i Sailo.
10 Tenā ne fai ei ne Iosua se vili mō latou i Sailo i mua o Ieova.+ I konā loa, ne vaevae ei ne Iosua a te laukele ki tino Isalaelu e ‵tusa eiloa mo olotou vaega kolā e ‵tau o maua.+
11 Ne tu te vili ki te matakāiga o Peniamina e ‵tusa eiloa mo olotou kāiga, kae ko te kogā fenua o latou e tu i te va o tino o Iuta+ mo tino o Iosefa.+
12 A te lotou tuakoi mai te feitu ki mātū e kamata mai i te Iolitana ke oko atu ki te ‵sifoga o Ieliko+ i mātū kae fanaka ki luga i te mauga ki te feitu ki togala, kae oko atu eiloa ki te koga lavaki o Petavene.+
13 Ne fanatu eiloa te tuakoi mai konā ke oko atu ki Lusā, i te ‵sifoga i te feitu ki saute o Lusā, telā ko Peteli;+ a te tuakoi e fanaifo ki lalo i Atalota-ata+ i luga i te mauga telā ko te feitu ki saute o Peta-holono i Lalo.+
14 Kae ne fakamailoga a te feitu ki togala mo fai te tuakoi kae toe mafuli o tele ki saute mai te mauga telā e saga atu ki Peta-holono i te feitu ki saute; e gata i Kiliata-paala,+ telā ko Kiliata-iealima, se fakai o Iuta. A te mea nei ko te feitu ki togala.
15 A te feitu ki saute e vau mai te mata o Kiliata-iealima, kae oko atu eiloa te tuakoi ki te feitu ki togala; e tele atu foki ki vaipuna o vai o Nefatoa.+
16 Ne fanaifo te tuakoi ki te mata o te mauga telā e saga atu ki te Vanu o te Tama tagata a Hinomo,+ telā e tu i te Vanu* o Lefaima+ ki mātū, kae fanaifo ki lalo i te Vanu o Hinomo, ki te ‵sifoga o tino Iepuse+ i saute, ke oko ki lalo i Enelokelo.+
17 Kae ne fakamailoga foki i te feitu ki mātū ke oko atu ki Enesemese ko fano ei ki Keliloa, telā e tu i te feitu ki mua o te fanakaga o Atumima,+ ko fanaifo ei ki te fatu+ o Pohana+ te tama tagata a Leupena.
18 Kae fanatu eiloa ki te ‵sifoga i te feitu ki mātū mai mua o te Alapaa ko fanaifo ei ki lalo i te Alapaa.
19 Kae toe faka‵soko atu te tuakoi ki te feitu ki mātū o te ‵sifoga o Peta-hokala,+ kae gata a te tuakoi i te pikoga ki mātū o te Tai ‵Kona*+ i te feitu ki saute o te Iolitana. Tenei te tuakoi i te feitu ki saute.
20 A te Iolitana ko tena tuakoi i te feitu ki saegala. Tenei te tofi o tino ne ‵tupu mai i a Peniamina e ‵tusa mo olotou kāiga, ko feitu katoa o te lotou tuakoi.
21 Kae ko fakai o te matakāiga o Peniamina e ‵tusa mo olotou kāiga ko: Ieliko, Peta-hokala, Emeke-kesise,
22 Peta-alapa,+ Semalaima, Peteli,+
23 Avima, Palaa, Ofala,
24 Sefalamoni, Ofeni mo Kepa+—e 12 a fakai mo olotou koga ‵nofo.
25 Kipeona,+ Lama, Pelota,
26 Mesepa, Kafila, Mosaa,
27 Lekima, Ilefeelu, Talala,
28 Sielaa,+ Haelefa, Iepuse, telā ko Ielusalema,+ Kipea+ mo Kiliata—e 14 a fakai mo olotou koga ‵nofo.
Tenei te tofi o tino ne ‵tupu mai i a Peniamina e ‵tusa eiloa mo olotou kāiga.
