Iosua 5:1-15
5 I te taimi eiloa ne ‵logo ei a tupu katoa o tino Amoli+ i te feitu ki togala* o te Iolitana mo tupu katoa o tino Kanana+ kolā e ‵nofo pili ki te tai i te faka‵masaga ne Ieova a vai o te Iolitana i mua o tino Isalaelu ke oko ki te taimi ko palele ei latou ne olo atu ki te suā feitu o te vaitafe, ne loto vāi‵vai latou,+ kae ne galo atu i ei te lotou loto ‵toa ona ko tino Isalaelu.+
2 I te taimi tenā ne fai atu a Ieova ki a Iosua: “Faite ne koutou ne naifi fatu kae toe pilitome+ a tāgata Isalaelu, i te lua o taimi.”
3 Tenā ne faite ei ne Iosua a naifi fatu kae pilitome a tāgata Isalaelu i Kipea-alalota.*+
4 Tenei te pogai ne pilitome ei ne Iosua a latou: A tāgata Isalaelu katoa kolā ne tiaki ne latou a Aikupito, ko tāgata katoa o te taua,* ko oti ne ‵mate atu i te koga lavaki i te lotou malaga mai tua o te tiakinaga ne latou a Aikupito.+
5 A tāgata katoa kolā ne tiaki ne latou a Aikupito ne pilitome katoa, kae ko tāgata katoa kolā ne fa‵nau i te koga lavaki mai tua o te tiakinaga ne latou a Aikupito ne seki pilitome.
6 Ne sa‵sale a tino Isalaelu i tausaga e 40+ i te koga lavaki ke oko ki te taimi ne ‵mate atu ei a te fenua kātoa, ko tāgata o te taua kolā ne tiaki ne latou a Aikupito kae seki faka‵logo ki te leo o Ieova.+ Ne tauto a Ieova ki a latou me ka se talia ne ia ke lavea ne latou te fenua+ ne tauto a ia ki olotou tupuga ke tuku mai ki a tatou,+ se fenua telā e ‵tafe i ei a susu mo hani.+
7 Ne fai ei ne ia ke sui latou ne olotou tama tāgata.+ Ne pilitome ne Iosua a latou konei me ne seki pilitome i te taimi ne faima‵laga ei.
8 I te otiga ne pilitome ne latou a te fenua kātoa, ne ‵nofo eiloa latou i te koga tenā ke oko ki te taimi ko ‵lei ei latou.
9 Fai atu ei a Ieova ki a Iosua: “I te aso nei ko oti ne ave kea‵tea ne au a te masiasi o Aikupito mai i a koe.” Tenā ne fakaigoa ei a te koga tenā ki a Kilikala*+ ke oko mai ki te aso nei.
10 Ne ‵nofo eiloa a tino Isalaelu i Kilikala, kae ne fakamanatu ne latou te Paseka i te po 14 o te masina,+ i te afiafi po, i koga laugatasi o Ieliko.
11 Kae ne kamata o ‵kai latou ki fuataga o te fenua i te aso mai tua o te Paseka, ki falaoa sē faka‵fete+ mo saito tao, i te aso eiloa tenā.
12 Ne seki toe ai ne manai ne maua mai tua ifo o te aso ne kamata ei o ‵kai latou ki fuataga o te fenua; ne seki toe ai ne manai mō tino Isalaelu,+ kae ne kamata o ‵kai latou ki fuataga o te fenua o Kanana i te tausaga tenā.+
13 I te taimi ko pili atu ei a Iosua ki Ieliko, ne kilo aka ana mata kae lavea ne ia se tagata+ e tu mai i ana mua mo se pelu i tena lima.+ Ne sasale atu a Iosua ki te tagata tenā kae fesili atu: “A koe e kau ki a matou io me kau ki omotou fili?”
14 Kae ne tali atu tou tagata: “Ikai, kae ko au ne vau e pelā me se pelenise* o te kautau a Ieova.”+ Ne totuli ifo a Iosua mo ana mata e punou ki te laukele kae ifo ki lalo kae fai atu ki a ia: “Ne a pati a toku aliki e manako o fai ki tena tavini?”
15 Ne tali atu a te pelenise o te kautau a Ieova ki a Iosua: “Tapale ou taka mai ou vae, me i te koga e tu ei koe se koga tapu.” Ne fai eiloa ne Iosua a te mea tenā.+
Fakamatalaga mai lalo
^ Epelu, “te feitu e tafa ki te tai.”
^ Tena uiga “Mauga o Muāpa‵kili.”
^ Io me “ko tāgata kolā ko mafai o ‵kau ki te taua.”
^ Tena uiga “Fakateka; Fakateka Kea‵tea.”
^ Io me “takitaki.”
