Isaia 44:1-28
44 “Fakalogo mai, e Iakopo taku tavini,Mo koe e Isalaelu telā ne filifili ne au.+
2 Konei a pati ne fai mai ne Ieova,Te Atua telā ne faite ne ia koe mo te Atua telā ne fakafoliga ne ia koe,+Telā ne fesoasoani atu ki a koe mai te moegatama:*
“Sa mataku, e taku tavini ko Iakopo,+Mo koe e Iesuluna,*+ telā ne filifili ne au.
3 Me ka ‵ligi atu ne au a vai ki te tino fiainu*+Mo tamā vaitafe e ‵tafe malosi ki luga i laukele ma‵lō.
Ka ‵ligi atu ne au a toku agaga ki luga i au tama*+Mo aku fakamanuiaga ki luga i tino ne ‵tupu mai i a koe.
4 Kae ka ‵somo aka latou e pelā me ‵somo aka i va o mouku lanu launiu,+E pelā mo lakau ko popula i tafa o tamā vaitafe.
5 Ka fai mai se tokotasi: “Au e o Ieova.”+
A te suā tino e taku a ia ki te igoa o Iakopo,Kae ko te suā tino ka tusi i luga i tena lima: “E o Ieova.”
Kae ka fakaaoga ne ia te igoa o Isalaelu.’
6 Konei a pati a Ieova ne fai mai,Ko te Tupu o Isalaelu+ mo te Atua telā e toe ‵togi mai ne ia a ia,+ ko Ieova o kautau:
‘Au ko te tino muamua kae ko au foki ko te tino fakaoti.+
E seai aka foki se isi Atua kae na ko au.+
7 Ko oi te tino e ‵pau mo au?+
Fai ke kalaga mai kae fakamatala mai kae fakamaoni mai ki a au!+
Mai te taimi ne faka‵mautakitaki ei ne au a tino mai i aso mua eiloa,Fai ke fakamatala mai ne latou a mea ka oko maiMo mea kolā ka ‵tupu.
8 Sa ma‵taku,Kae sa ‵poi i te ma‵taku.+
E a, e seki fakailoa kae folafola atu muamua ne au te mea tenei ki a koutou taki tokotasi?
A koutou ko aku molimau.+
E a, e isi aka foki se isi Atua io me ko au fua?
Ikai, e seai se isi Kaupapa;+ e iloa ne au me e seai.’”
9 A tino katoa kolā e faite ne latou a tupua e iku atu ki te seai,Kae ko mea e fakapelepele ne latou ka se aoga.+
E pelā me ko olotou molimau, e se lavea ne latou* se mea kae seai se lotou mea e iloa,+Tela la, a latou kolā ne faite ne latou a mea konā ka fakamasiasigina.+
10 Ko oi ka faite ne ia se atua io me fai se tupua fitiTelā e seai ne mea aoga e maua mai i ei?+
11 Kiloke! Ana taugasoa katoa ka fakamasiasigina!+
A tufuga faite mea ne tino ola fua.
Fai ke maopoopo katoa latou kae ke ‵tu i olotou tulaga.
Ka pole‵pole latou kae ka masiasi fakatasi.
12 A te tino faite mea ki fiti e fakaaoga tena mea faigaluega ke tuku atu te fiti i luga i malala ‵ka.
E fakafoliga ne ia ki samala,Kae fakagalue ne ia ki tena lima malosi.+
Ka oti ko fiakai ei a ia kae fanaifo tena malosi;E seai ne vai e inu ki ei kae gasolo o fi‵ta.
13 A te tino faite mea ki lakau e ‵futi tena uka e fua ei a mea kae fakamailoga te ata ki te penisina lanu kula.
E galue a ia ki ei mai te fakaaogaga o se tofi lakau kae fakamailoga ne ia ki se mea faigaluega.
E fakafoliga ne ia ki se tagata,+Ki te gali o te tagata,Ke tuku i loto i tena fale.+
14 E isi se tino e galue i te ‵katiga ki lalo o lakau ko alasi.
E filifili ne ia se vaegā lakau, se oka,Kae tuku ne ia ke ola aka kae malosi atu i nisi lakau o te vao.+
E ‵toki ne ia te lakau ko te laulele, kae fai ne te vaiua ke ola aka.
15 Ka oti, ko fai ei pelā me se fafie ke tafu ne te tagata ki ei se afi.
E fakaaoga ne ia se vaega i ei ke fakavelavela ki ei a ia;E faka‵ka ne ia se afi kae tao ki ei a falaoa.
Kae e faite foki ne ia ki ei se atua kae tapuaki atu ki ei.
E faite ne ia se tupua faite ki ei, kae ifo ki lalo i ana mua.+
16 A te āfa o te lakau e ‵ka i te afi;Mai te āfa tenā e tao ki ei a ‵kano o manu e kai a ia ki ei, makona ei a ia.
E fakavelavela foki a ia ki ei kae fai aka:
“Aa! Ko oko eiloa au i te mafanafana i te taimi e onoono ei au ki te afi.”
17 Kae ko te ‵toega o te lakau e fai ne ia ki ei se atua, se tupua faite.
E ifo a ia ki ei kae tapuaki atu ki ei.
E ‵talo a ia ki ei kae fai atu:
“Fakasao mai au, me i a koe ko toku atua.”+
18 E seai se lotou mea e iloa, e seai se mea e malamalama i ei,+Me i olotou mata ko oti ne faka‵piki ke ‵mau kae e seai ne olotou mea e lavea,Kae e seai foki se malamalama i olotou loto.
19 E seai se tino e mafaufau aka i tena lotoIo me isi se iloaga io me malamalama kae fai aka:
“A te āfa o te lakau ne faka‵ka ne au ki ei te afi,Kae mai i ana malala ‵ka ne tao ne au ki ei a falaoa mo ‵kano o manu mo ‵kai.
E a, e ‵tau o fai ne au te ‵toega o te lakau e pelā me se mea fakatakalialia?+
E a, e ‵tau o tapuaki au ki se potu laupapa mai i se lakau?”
20 E kai a ia ki lefu.
A tena loto faka‵se tino ne takitaki ‵se ei a ia.
E se mafai ne ia o fakasao a ia, io me fai aka:
“E a, e seai se loi i toku lima fakaatamai?”
21 “Ke masaua a mea konei, e Iakopo, mo koe e Isalaelu,Me i a koe ko taku tavini.
Ne fakafoliga ne au koe, kae ko koe ko taku tavini.+
Ka se puli eiloa koe i a au, e Isalaelu.+
22 Ka ‵solo kea‵tea ne au a amioga solitulafono a koe e pelā eiloa me se kaumana+Mo au agasala e pelā eiloa me se kaumana matolu.
Foki mai ki a au, me ka toe ‵togi mai ne au a koe.+
23 Ka‵laga fia‵fia, koutou e te lagi,Me i a Ieova ko oti ne gasuesue!
Ka‵laga mo te manumalo, koutou e koga ‵poko o te lalolagi!
Ka‵laga mo te fia‵fia, koutou e mauga,+Koutou e togavao mo koutou katoa e lakau!
Me i a Ieova ko oti ne toe ‵togi mai ne ia a Iakopo,Kae ka fakaasi atu ne ia tena gali i luga i Isalaelu.”+
24 Konei a pati ne fai mai ne Ieova, te Atua telā e toe ‵togi mai ne ia koe,+Telā ne fakafoliga ne ia koe i te taimi ne nofo ei koe i te moegatama:
“Au ko Ieova, telā ne faite ne ia a mea katoa.
Ne ‵fola ne au a te lagi i a au eiloa,+Kae ‵fola ne au te lalolagi.+
Ko oi ne ‵kau fakatasi mo au?
25 Ko fakaseaoga ne au a fakailoga a tino e fai‵pati ki mea sē aoga,*Kae ko au ko te Atua telā e fai ne ia a tino fakataulaitu ke fai pelā me ne tino fakavale‵vale;+Ko te Atua telā e faka‵numi ne ia a tāgata ‵potoKae ‵fuli te lotou iloaga ki te valea;+
26 Ko te Atua telā e fakataunu ne ia a pati a tena taviniKae fakataunu katoatoa ne ia a valoaga a ana avefekau;+Ko te Atua telā e fai atu e uiga ki Ielusalema, ‘Ka ‵nofo a tino i ei,’+Kae ki fakai o Iuta, ‘Ka toe faite aka a fakai konā,+Kae ka toe faka‵lei ne au ana mea ne fakamasei’;+
27 Ko te Atua telā e fai atu ki vai ‵poko, ‘‵Miti aka,Kae ka faka‵masa ne au ou vaitafe katoa’;+
28 Ko te Atua telā e fai atu e uiga ki a Kulesa,+ ‘A ia ko taku tausi mamoe,Kae ka fai katoatoa ne ia a mea katoa e loto au ki ei’;+Ko te Atua telā e fai atu e uiga ki Ielusalema, ‘Ka toe faite aka a ia,’Kae e uiga ki te faletapu, ‘Ka fakatakato tou fakavae.’”+
Fakamatalaga mai lalo
^ Io me “mai te fanaumaiga.”
^ Tena uiga “Tino Fai Mea Tonu,” se tofi fakaaloalogina o Isalaelu.
^ Io me “laukele fiainu.”
^ Epelu, “fanau.”
^ Telā ko tupua faite.
^ Io me “ko pelofeta ‵loi.”
