Isaia 47:1-15
47 Fanaifo ki lalo o sagasaga i te ‵pefu,E te tamafine ‵ma o Papelonia.+
Sagasaga ki lalo i te laukele telā e seai se nofogaaliki i ei,+E te tama fafine o tino Kaletaia,Me ka se toe taku a koe ne tino me e gali kae fakapelepele.
2 Puke te mea solo saito kae solo a falaoa ‵mata.
Tapale kea‵tea tou veli.
‵Tala kea‵tea tou lavalava, kae sa ‵pono ou vae.
Fano ki te suā feitu o te vaitafe.
3 A tou nofo fuafua ka tuku faka‵sau atu.
A tou masiasi ka tuku faka‵sau atu.
Ka fakaoko atu ne au te taui ma sui,+ kae ka seai se tagata e mafai o ‵pono ne ia toku auala.*
4 “A te Atua telā e toe ‵togi mai ne ia tatou—A tena igoa ko Ieova o kautau—Ko te Atua Tapu o Isalaelu.”+
5 Sagasaga filemu i konā kae fano ki te pouliga,E te tama fafine o tino Kaletaia;+Ka se toe taku ne latou koe ki te Matai Fafine* o Malo.+
6 Ne gasolo aka eiloa au o kaitaua malosi ki oku tino.+
Ne fakaseaoga ne au toku tofi,+Kae ne tuku atu ne au latou ki otou lima.+
Kae ne seki fakaasi atu ne koutou te alofa fakamagalo ki a latou.+
Ke oko ki tino ma‵tua, ne tuku atu foki ne koutou se amoga ‵mafa ki a latou.+
7 Ne fai mai koe: “Ka fai faeloa au mo Matai Fafine* ki te se-gata-mai.”+
Ne seki tausi ne koe a mea konei i tou loto;Ne seki mafaufau koe ki te auala ka iku atu ki ei te mea tenei.
8 Fakalogo mai nei ki te mea tenei, e te tino e fiafia ki fakafiafiaga,+Telā e sagasaga i te tokagamalie, kae fai aka i tena loto:
“Ko au tokotasi eiloa, e seai aka foki se isi tino.+
Ka se fai au pelā me se fafine ko mate tena avaga.
Ka se iloa lele ne au te lagonaga o te ‵mate o tama‵liki.”+
9 Kae ko mea e lua konei ka oko fakavave mai ki a koe, i te aso eiloa e tasi:+
Te ‵mate atu o tama‵liki mo te mate o te avaga.
A fakalavelave konei ka oko katoatoa atu ki a koe+Ona ko* te uke o au faifaiga faivailakau mo au pati ‵lau katoa.+
10 Ne talitonu koe ki au amioga ma‵sei.
Ne fai aka koe: “E seai se tino e lavea ne ia au.”
A tou poto mo tou iloa ko mea ne takitaki ‵se ei koe,Kae ne fai aka koe i tou loto: “Ko au tokotasi eiloa, e seai aka foki se isi tino.”
11 Kae ka oko atu a fakalavelave ki a koe,Kae seai se pati ‵lau a koe ka taofi ei a mea konā.
Ka oko atu a puapuaga ki a koe; ka se mafai ne koe o taofi aka.
A te fakamaseiga ka oko fakapoi atu ki a koe i se tulaga e seki iloa eiloa ne koe.+
12 Tela la, tumau i te faiga o au pati ‵lau mo faifaiga faivailakau e uke,+Kolā ne galue malosi koe ki ei i te taimi koi talavou ei koe.
E se taumate ka mafai o maua ne koe a mea aoga mai i ei;E se taumate e mafai o fai ne koe a tino ke ofo i ei.
13 A koe ko fi‵ta ona ko te tokouke o au tino fakatonutonu.
Fai ke ‵tu aka latou ki luga o fakasao koe,Ko latou kolā e tapuaki ki te lagi,* kolā e onoono ki fetū,+Ko latou kolā e fakaasi atu te lotou iloaga i te taimi o te masina saeE uiga ki mea kolā ka ‵tupu ki a koe.
14 Kiloke! E fai latou e pelā me ne kausaito.
Ka ‵ka latou i te afi.
E se mafai ne latou o faka‵sao a latou eiloa mai te malosi o te ulaga o te afi.
A mea konei e se ne malala ‵ka ke fakamafanafana ei,Kae ko te mea tenei e sē se afi ke sagasaga atu i mua i ei.
15 Tela la, ka fai foki penā au tino faivailakau ki a koeKo latou kolā ne galue malosi koe ki ei mai te taimi koi talavou ei koe.
Ka olo valevale latou, ko tino taki tokotasi i olotou auala.
Ka seai se tino e fakasao ne ia koe.+
Fakamatalaga mai lalo
^ Io me kāti, “kae ka se fakafetaui atu au ki se tino mo te atafai.”
^ Io me “Tupu Fafine.”
^ Io me “Tupu Fafine.”
^ Io me kāti, “Faitalia.”
^ Io me kāti, “Tino e vaevae ne latou te lagi; Tino iloilo fetū.”
