Kenese 38:1-30
-
Iuta mo Tamala (1-30)
38 Ne tiaki ne Iuta ana taina i te taimi tenā kae fakatu aka tena faleie i tafa o te tagata Atulama e igoa ki a Hila.
2 Ne lavea ne Iuta i konā a te tama fafine a te tagata Kanana+ e igoa ki a Sua. Ne puke ne ia tou fafine mo fai tena avaga kae ‵moe fakatasi lāua,
3 faitama ei tou fafine. Fakamuli ifo, ne fanau ne ia se tamaliki tagata kae fakaigoa ne ia ki a Elu.+
4 Ne toe faitama tou fafine kae fanau ne ia se tamaliki tagata, fakaigoa ei ne ia ki a Onanu.
5 Ne toe fanau foki ne ia se tamaliki tagata kae fakaigoa ne ia ki a Sela. Ne nofo atu a Iuta i Akasipa+ i te taimi ne fanau ei ne tou fafine a te tamaliki tenā.
6 Fakamuli ifo, ne fakaavaga ne Iuta a tena toekimua ko Elu, kae ko te igoa o tena avaga ko Tamala.+
7 Kae ko Elu, te toekimua a Iuta, ne seki fiafia ki ei a Ieova; tenā ne tamate ei a ia ne Ieova.
8 Ona ko te mea tenā, ne fai atu a Iuta ki a Onanu: “‵Moe fakatasi mo te avaga a tou taina kae fai tou tiute ki te fafine tenā i a koe ko te taina o tena avaga, kae ke fa‵nau mai ne tama‵liki ma tou taina.”+
9 Kae ne iloa ne Onanu me ka se fai a tama‵liki konā mo fai ana tama.+ Tela la, i te taimi ne ‵moe ei a ia mo te avaga a tena taina ne fakasali ne ia ana vai ki te laukele ko te mea ke seai ne tama‵liki ma tena taina.+
10 A te mea telā ne fai ne ia e masei i te kilokiloga a Ieova, tela la, ne tamate foki ne ia a Onanu.+
11 Ne fai atu a Iuta ki a Tamala te avaga a tena tama tagata: “Foki o nofo i te fale o tou tamana e pelā me se fafine ko mate tena avaga, ke oko ki te taimi e matua ei taku tama tagata ko Sela,” me ne fai ifo a ia ki a ia eiloa: ‘Kāti ka mate foki a ia e pelā mo ana taina.’+ Tenā ne fano ei a Tamala o nofo i te fale o tena tamana.
12 Ne ‵teka atu a aso e uke kae mate te avaga a Iuta, te tama fafine a Sua.+ I te otiga eiloa a aso fanoanoa o Iuta, fano ei ki ana tino ‵vele fulufulu mamoe i Timenata+ fakatasi mo tena taugasoa ko Hila, te tagata Atulama.+
13 Kae ne fakailoa atu ki a Tamala: “A te tamana o tau avaga ko fano ki Timenata o ‵vele a fulufulu o ana mamoe.”
14 Tenā ne tapale ei ne ia ana gatu kolā e ‵pei sāle ki ei a fāfine ko ‵mate olotou avaga, ‵pono ana mata ki se veli kae ufi tena foitino ki se laugatu, sagasaga ifo ei i te mataloa o te fakai o Enaima, telā e tu i te auala ki Timenata, me ne iloa ne ia i a Sela ko matua kae seki tuku atu eiloa mo fai tena avaga.+
15 I te taimi ne lavea ei ne Iuta tou fafine ne leake tou tagata me se fafine talitāgata me ko oti ne pulou ne ia ana mata.
16 Ne mafuli atu a ia ki tou fafine i tafa o te auala kae fai atu ki a ia: “Fakamolemole talia mai ke ‵moe tāua,” me seki iloa ne tou tagata i te fafine tenā ko te avaga a tena tama tagata.+ Kae ne fai atu tou fafine: “Se a te mea ka tuku mai ne koe māfai e ‵moe tāua?”
17 Ne fai atu tou tagata: “Ka avatu ne au ki a koe se tamā kouti mai taku lafu.” Muna a tou fafine: “E mata, e isi se fakamaoniga e tuku mai ne koe ke oko ki te taimi e aumai ei ne koe te kouti?”
18 Ne toe fai atu tou tagata: “Se a te fakamaoniga e ‵tau o tuku atu ne au ki a koe?” kae ne fai atu tou fafine: “Ko tou mama fakamailoga+ mo tena uka mo tou tokotoko tenā i tou lima.” Ne tuku atu ne ia a mea konā ki tou fafine, ‵moe ei lāua, kae ne faitama tou fafine i a ia.
19 Oti aka, tu ei tou fafine o fano, kae ne tapale tena veli kae toe pei tena gatu telā e ‵pei sāle ki ei a fāfine ko ‵mate olotou avaga.
20 Ne uga atu ne Iuta a tena taugasoa mai Atulama+ ke avatu te tamā kouti ko te mea ke toe faka‵foki mai a mea kolā ne tuku atu e pelā me ne fakamaoniga ki tou fafine, kae ne seki maua eiloa ne ia a tou fafine.
21 Ne fesili atu a ia ki tāgata i te koga tenā, ana muna: “Tefea te fafine talitāgata o te faletapu telā ne nofo i tafa o te auala i Enaima?” Kae ne fai atu latou: “E seki ai eiloa se fafine talitāgata o te faletapu kai nofo i te koga tenei.”
22 Oti aka loa, foki atu ei a ia ki a Iuta kae fai atu: “E seki maua ne au tou fafine, kae ne fai mai foki a tāgata i te koga tenā, ‘E seki ai eiloa se fafine talitāgata o te faletapu kai nofo i te koga tenei.’”
23 Muna a Iuta: “Tuku ei ke puke ma ia a mea konā, ko te mea ke mo a ma manatu fatauva mai a tino ki a tāua. Me ko oti eiloa ne avatu ne au te tamā kouti tenei kae ne seki maua ne koe a ia.”
24 Kāti i se tolu masina mai tua ifo, ne fakailoa atu ki a Iuta: “A Tamala te avaga a tau tama tagata ne fai pelā me se fafine talitāgata, kae nei ko faitama foki a ia i ana amioga konā.” Ne fai atu a Iuta: “Puke mai tou fafine o ave o ‵sunu.”+
25 I te taimi ne puke mai ei tou fafine kae avatu tena fekau ki te tamana o tena avaga: “Au ne faitama i te tagata telā i a ia a mea konei.” Kae ne toe fai atu tou fafine: “Fakamolemole iloilo aka me i a ai a mea konā, ko te mama fakamailoga mo tena uka mo te tokotoko.”+
26 Tenā ne iloilo ei ne Iuta a mea konā kae fai atu: “E sili atu te amiotonu o tou fafine i lō au, me ne seki tuku atu ne au ke avaga a ia mo taku tama ko Sela.”+ Kae ne seki toe ‵moe fakatauavaga eiloa a ia mo tou fafine mai tua ifo.
27 I te taimi ko pili ei o fanau tou fafine, e isi se masaga i loto i tena moegatama.
28 I te taimi ne fanau ei a ia, ne tō mai ki tua te lima o se tamaliki, puke fakavave ei ne te fafine fakafanau se filo lanu kula kae ‵sai ki tena lima, ana muna: “Tenei te tamaliki ne tō muamua mai ki tua.”
29 Kae i te taimi ne toe ‵futi ei te lima o te tamaliki tenā ki loto, kae tō mai tena taina ki tua, kae ne poi te fafine fakafanau kae fai aka penei: “Kaia ne ulu ‵kini mai ei koe penei ki tua mo te manava o tou mātua?” Tenā ne fakaigoa ei a ia ki a Falesa.*+
30 Oti aka, tō mai ei tena taina ki tua telā ne ‵sai tena lima ki te filo lanu kula, kae ne fakaigoa a ia ki a Tila.+
Fakamatalaga mai lalo
^ Tena uiga “Masae,” kāti e fakasino atu ki te masaega māfai ko fanau.
