Kenese 46:1-34
46 Ne puke ne Isalaelu ana mea katoa kae fano. I tena okoatuga ki Pelesepa,+ ne ofo atu ne ia a taulaga ki te Atua o tena tamana ko Isaako.+
2 Tenā ne faipati atu ei a te Atua ki a Isalaelu e auala i se fakaasiga i te po, ana muna: “Iakopo, Iakopo!” kae ne tali atu tou tagata: “Tenei au!”
3 Ne fai atu a ia: “Au ko te Atua tonu, ko te Atua o tou tamana.+ Sa mataku o fano ki Aikupito, me ka fai ne au a koe mo fai se fenua lasi ‵ki+ i konā.
4 Ka olo fakatasi tāua ki Aikupito, kae ka toe fakafoki mai ne au a koe mai i konā,+ kae ka tuku ne Iosefa tena lima i luga i ou mata.”*+
5 Mai tua i ei kae tiaki ne Iakopo a Pelesepa, kae ne avatu ne ana tama tāgata a ia,* mo olotou tama‵liki mo olotou avaga i luga i ka kolā ne aumai ne te Falao ke avatu i ei latou.
6 Ne ave ne latou olotou lafu manu mo olotou mea katoa kolā ne maua i te fenua o Kanana. Kae ne oko atu latou ki Aikupito, ko Iakopo mo ana tama katoa.
7 Ne aumai ne ia ki Aikupito ana tama tāgata mo ana mokopuna tāgata, ana tama fāfine mo ana mokopuna fāfine—ko ana kāiga katoa.
8 Konei a igoa o tama tāgata a Isalaelu kolā ne olo ki Aikupito,+ telā ko Iakopo mo ana tama tāgata: a te toekimua a Iakopo ko Leupena.+
9 A tama tāgata a Leupena ko Hanoka, Palu, Eselona mo Kami.+
10 A tama tāgata a Simeona+ ko Iemuelu, Iamina, Ohata, Iakini, Sioala mo Saula+ te tama tagata a te fafine Kanana.
11 A tama tāgata a Levi+ ko Kelesona, Koate mo Melali.+
12 A tama tāgata a Iuta+ ko Elu, Onanu, Sela,+ Falesa+ mo Tila.+ Kae ko Elu mo Onanu ne ‵mate i te fenua o Kanana.+
A tama tāgata a Falesa ko Eselona mo Hamula.+
13 A tama tāgata a Isakala ko Toula, Puava, Iope mo Similona.+
14 A tama tāgata a Sepulona+ ko Seleti, Eloni mo Ialeli.+
15 Konei a tama tāgata a Lea i a Iakopo kolā ne fa‵nau i Patana-alama, fakatasi mo tena tama fafine ko Tina.+ A te aofaki katoa o ana tama tāgata mo ana tama fāfine e toko 33.
16 A tama tāgata a Kato+ ko Sifono, Haki, Suni, Esepono, Elite, Alota mo Aleli.+
17 A tama tāgata a Asela+ ko Imina, Isiva, Isivi mo Pelia, kae ko te lotou tuagane ko Siela.
A tama tāgata a Pelia ko Hepela mo Malakielu.+
18 Konei a tama tāgata a Selepa,+ te tavini fafine telā ne tuku atu ne Lapana ki tena tama fafine ko Lea. A te aofaki o tino katoa ne ‵tupu mai i a Selepa mo Iakopo e toko 16.
19 A tama tāgata a Lasela, te avaga a Iakopo, ko Iosefa+ mo Peniamina.+
20 A tama a Iosefa kolā ne fa‵nau i Aikupito ko Manase+ mo Efalaima,+ ko ana tama i a Asenati+ te tama fafine a Potifele te faitaulaga o Onu.*
21 A tama tāgata a Peniamina+ ko Pela, Pekali, Asapelu, Kela,+ Namanu, Ei, Lose, Mepimu, Hupima+ mo Ati.+
22 A te aofaki o tino katoa ne ‵tupu mai i a Lasela mo Iakopo e toko 14.
23 A te tama tagata* a Tanu+ ko Husima.+
24 A tama tāgata a Nafatali+ ko Iaseeli, Kuni, Ieseli mo Silema.+
25 Konei a tama tāgata a Pila te tavini fafine telā ne tuku atu ne Lapana ki tena tama fafine ko Lasela. A te aofaki o tino katoa ne ‵tupu mai i a Pila mo Iakopo e tokofitu.
26 A tino katoa ne ‵mai i te gafa o Iakopo kolā ne olo fakatasi mo ia ki Aikupito, e ‵tusa mo te toko 66, e se aofia i ei a avaga a tama a Iakopo.+
27 E tokolua a tama tāgata a Iosefa ne fa‵nau i Aikupito. E ‵tusa mo te toko 70+ a tino katoa mai te kāiga o Iakopo ne olo atu ki Aikupito.
28 Ne uga ne Iakopo a Iuta+ ke mua o fakailoa atu ki a Iosefa i a ia ko fanatu i tena auala ki Kosena. I te taimi ne oko atu ei latou ki te kogā fenua o Kosena,+
29 ne fakatoka ne Iosefa tena kaliota kae fanatu o fakafetaui ki tena tamana ko Isalaelu i Kosena. I te taimi ne fetaui ei lāua ne ‵sai atu a Iosefa ki a ia* kae tagi i se taimi leva.
30 Tenā ne fai atu ei a Isalaelu ki a Iosefa: “I te taimi nei au ko toka o mate; ko oti ne lavea ne au ou mata kae ko iloa foki ne au i a koe koi ola.”
31 Ne fai atu a Iosefa ki ana taina mo te kāiga o tena tamana: “Au ka fano o fakailoa ki te Falao+ a te mea tenei, ‘Ko oti ne o‵mai ki a au oku taina mo te kāiga o toku tamana kolā ne ‵nofo i te fenua o Kanana.+
32 A tāgata konei ne tausi mamoe+ kae ne tino fagai manu foki,+ kae ne aumai katoa ne latou olotou lafu mamoe mo lafu manu mo olotou mea katoa.’+
33 Kafai e ‵kami koutou ne te Falao kae fesili atu, ‘Ne a otou galuega?’
34 e ‵tau o fai atu koutou, ‘Au tavini ne tino fagai manu mai te taimi koi fo‵liki ei ke oko mai ki te taimi nei, ko matou mo omotou tupuga,’+ ko te mea ke mafai o ‵nofo koutou i te kogā fenua o Kosena,+ me i tino Aikupito e takalia‵lia ki tausi mamoe.”+
Fakamatalaga mai lalo
^ Tena uiga, ke ‵pono ne ia māfai ko mate a Iakopo.
^ Epelu, “Isalaelu.”
^ Telā ko Heliopolisi.
^ Epelu, “tama tāgata.”
^ Epelu, “ne ‵sai atu ki tena ua.”
