Kenese 47:1-31
47 Ne fanatu a Iosefa ki te Falao kae fai atu:+ “A toku tamana mo oku taina ko oti ne o‵mai fakatasi mo olotou lafu mamoe mo olotou lafu manu mo olotou mea katoa mai te fenua o Kanana, kae ko ‵nofo nei i te kogā fenua o Kosena.”+
2 Ne puke ne ia ana taina e tokolima o fakafetaui atu ki te Falao.+
3 Ne fai atu te Falao ki ana taina: “Ne a otou galuega?” Ne tali atu latou ki te Falao: “Au tavini ne tausi mamoe, ko matou mo omotou tupuga katoa.”+
4 Tenā ne fai atu ei latou ki te Falao: “A matou ne o‵mai o ‵nofo e pelā me ne tino fakaa‵tea i te otou fenua+ me ko seai ne laukele moukuā mo fagai a manu a au tavini, me ko oko eiloa i te masei o te oge i te fenua ko Kanana.+ Tela la, fakamolemole talia mai aka ke ‵nofo au tavini i Kosena.”+
5 Muna a te Falao ki a Iosefa: “Ko oti ne oko mai tou tamana mo ou taina ki a koe i konei.
6 A koe ko te pule o te fenua o Aikupito. Tuku a tou tamana mo ou taina ke ‵nofo i te ‵toe koga ‵lei o te fenua.+ Fai ke ‵nofo latou i Kosena, kae kafai e isi ne tāgata ma‵losi i a latou ko ‵tofi la ne koe ke pule i aku manu.”
7 Tenā ne puke mai ei ne Iosefa a tena tamana ko Iakopo o fakafetaui atu ki te Falao, kae ne fakamanuia ne Iakopo a te Falao.
8 Ne fesili atu a te Falao ki a Iakopo: “Ko fia ou tausaga?”
9 Ne tali atu a Iakopo ki te Falao: “Ko ‵tusa nei mo te 130 a tausaga o toku olaga maumausolo.* E mutana kae faiga‵ta a tausaga ne ola ei au,+ kae e se leva e pelā mo tausaga ne ola ei oku tupuga e pelā me ne tino maumausolo.”*+
10 Oti aka, fakamanuia atu ei a Iakopo ki te Falao kae fano.
11 Ne faka‵nofo ne Iosefa a tena tamana mo ana taina i Aikupito kae tuku atu se vaega o te fenua ki a latou, i te ‵toe koga ‵lei eiloa o te fenua, ko te kogā fenua o Lamese,+ e pelā eiloa mo te fakatonuga a te Falao.
12 Kae ne avatu faeloa ne Iosefa a meakai* ki tena tamana, ana taina mo te kāiga kātoa o tena tamana, e ‵tusa mo te aofaki o olotou tama‵liki.
13 Ko seai ne meakai* i te fenua kātoa, me ko oko eiloa i te masei o te oge, kae ne vāi‵vai malosi a tino i te fenua o Aikupito mo te fenua o Kanana ona ko te oge.+
14 Ne ‵tae ne Iosefa a tupe katoa ne maua ne ia i te fenua o Aikupito mo te fenua o Kanana mai tino kolā ne olo atu o ‵togi olotou meakai,+ kae ne avatu faeloa ne Iosefa a tupe konā ki te palesi o te Falao.
15 Fakamuli ifo, ne palele a tupe i te fenua o Aikupito mo te fenua o Kanana, kae ne olo atu a tino Aikupito katoa ki a Iosefa kae fai atu: “Tuku mai ne omotou meakai! Kaia e ‵tau ei o ‵mate matou i ou mua ona ko te mea ko seai ne omotou tupe?”
16 Kae ne fai atu a Iosefa: “Kafai ko seai ne otou tupe, aumai otou manu, kae ka avatu ne au a meakai ke fesuiaki mo otou manu.”
17 Tenā ne kamata ei o avatu ne latou olotou manu ki a Iosefa, kae ne tuku atu faeloa ne Iosefa a meakai ke fesuiaki mo olotou solofanua, lafu mamoe, lafu manu mo asini, kae ne avatu faeloa ne ia a meakai ki a latou ke fesuiaki mo olotou manu katoa i te tausaga tenā.
18 I te fakaotiga o te tausaga tenā, ne toe olo atu latou ki a ia i te suā tausaga kae fai atu: “E fakaasi ‵tonu atu ne matou ki a koe, e te motou aliki, me ko oti ne tuku atu ne matou ki te motou aliki a tupe mo manu katoa. Ko seai eiloa ne omotou mea koi ‵toe nei kae na ko omotou foitino mo omotou manafa.
19 Kaia e ‵tau ei o ‵mate matou i ou mua kae tiaki atu omotou manafa? ‵Togi ne koe matou mo omotou manafa ki meakai, kae ka fai matou mo fai a pologa a te Falao, kae ko omotou manafa ka tuku ma ia. Tuku mai ne omotou fuaga ko te mea ke ola matou kae e se ‵mate, kae ke mo a foki ma tuku tiaki omotou manafa.”
20 Tenā ne ‵togi ei ne Iosefa a manafa katoa i Aikupito ma te Falao me ko oti ne fakatau atu ne tino Aikupito katoa olotou manafa, me ko oko eiloa i te masei o te oge; kae ne fai a te fenua kātoa ma te Falao.
21 Tenā ne ave ei ne ia a tino katoa ke ‵nofo i loto i fakai, mai te feitu e tasi o te kogā fenua o Aikupito ke oko ki te suā feitu.+
22 Ko manafa fua o faitaulaga ne seki ‵togi ne ia,+ me ne maua ne faitaulaga olotou pauna mai i te Falao kae ne ola latou mai i olotou pauna kolā ne tuku atu ne te Falao. Tenā te pogai ne seki fakatau atu ei ne latou olotou manafa.
23 Ne fai atu a Iosefa ki tino: “Kiloke, ko oti ne ‵togi ne au koutou mo otou manafa ma te Falao. Konei la fuaga ma koutou, e ‵tau o ‵toki ne koutou a fuaga konei i manafa katoa.
24 Kafai ko ‵fua mai, tuku atu te tasi-vae-lima ki te Falao,+ kae puke ne koutou te fa-vae-lima e pelā me ne fuaga ke ‵toki i manafa konā, mo meakai ma koutou mo tino i otou fale mo otou tama‵liki ke ‵kai ki ei.”
25 Ne fai atu latou: “Ko oti ne fakaola ne koe matou.+ Ke fai ne matou a te mea telā e fiafia ki ei te motou aliki, kae ka fai matou mo fai a pologa a te Falao.”+
26 Tenā ne fai ei ne Iosefa se tulafono telā koi fakaaoga eiloa i aso nei i te fenua o Aikupito, ke avatu te tasi-vae-lima ki te Falao. Ko manafa fua o faitaulaga ne seki puke ne te Falao ma ia.+
27 Ne ‵nofo eiloa a tino Isalaelu i te fenua o Aikupito, i te kogā fenua o Kosena,+ ne ‵nofo latou i ei kae ne gasolo aka faeloa o uke olotou mea kae tokouke foki latou.+
28 Ne nofo a Iakopo i te fenua o Aikupito i tausaga e 17, kae ne oko atu a tausaga o te olaga kātoa o Iakopo ki te 147.+
29 I te taimi ko pili ei o mate a Isalaelu,+ ne kalaga atu a ia ki tena tama tagata ko Iosefa kae fai atu penei: “Kafai e fiafia mai koe ki a au, fakamolemole tuku tou lima mai lalo o toku kauaga kae tauto mai, kae fakaasi mai tou alofa fakamaoni mo te fakamaoni ki a au. Fakamolemole, ke mo a eiloa ma tanu ne koe au i Aikupito.+
30 Kafai au e mate, e ‵tau o ave ne koe au kea‵tea mo Aikupito o tanu i te tanuga ne tanu ei oku tupuga.”+ Ne fai atu a Iosefa: “Ka fai eiloa ne au a te mea e manako koe ki ei.”
31 Tenā ne fai atu ei a ia: “Tauto mai ki a au.” Kae ne tauto atu a Iosefa ki a ia.+ Tenā ne punou ifo ei a Isalaelu o ‵talo i te ulu o tena moega.+
Fakamatalaga mai lalo
^ Io me “ola e pelā me se tino fakaa‵tea.”
^ Io me “ola e pelā me se tino fakaa‵tea.”
^ Epelu, “falaoa.”
^ Epelu, “falaoa.”
