Levitiko 8:1-36
-
Te faka‵sopoga o faitaulaga mai i a Alona (1-36)
8 Ne toe faipati atu a Ieova ki a Mose, ana muna:
2 “Puke a Alona fakatasi mo ana tama tāgata,+ mo gatu katoa,+ te sinu mo faū a tino,+ te pulumakau tagata o te taulaga mō agasala, ko mamoe e lua, mo te kete o falaoa sē faka‵fete,+
3 kae fakamaopoopo mai a te fakapotopotoga o tino katoa ki te mataloa o te faleie o maopoopoga.”
4 Tenā ne fai ei ne Mose a mea katoa ne fakatonu atu ne Ieova ki a ia, kae ne maopoopo mai a te fakapotopotoga o tino katoa ki te mataloa o te faleie o maopoopoga.
5 Ne fai atu a Mose ki te fakapotopotoga: “Konei a fakatonuga ne fai mai ne Ieova ke fai ne tatou.”
6 Ne aumai ne Mose a Alona mo ana tama tāgata ke pili mai kae fakakou‵kou a latou ki vai.+
7 Oti aka, fakapei atu ei ne ia te gatu+ o Alona, fusi atu tena fusi,+ fakapei atu tena gatu ‵loa e seai ne lima,+ kae tuku atu te efota+ ki luga i a ia kae ‵sai ke ‵mau ki te fusi+ o te efota telā ne ‵laga.
8 Oti aka, tuku atu ei ne ia ki luga i a ia a te ufi fatafata+ kae tuku atu te Ulima mo te Tumema+ ki loto i te ufi fatafata.
9 Tenā ne tuku atu ei ne ia te pulou laugatu+ ki luga i tena ulu, kae faka‵piki atu te mea malipolipo aulo i te feitu ki mua o te pulou laugatu, ko te fakailoga tapu o te tukuatuga,*+ e ‵tusa mo te fakatonuga a Ieova ne fai ki a Mose.
10 Tenā ne puke ei ne Mose te sinu mo faū a tino kae faū a te faleie tapu mo mea katoa i loto i ei,+ kae fakatapu atu a mea konā.
11 Oti aka, fakamotimoti ei ne ia ne mu sinu fakafitu taimi ki luga i te fatafaitaulaga kae faū te fatafaitaulaga mo ana meāfale katoa mo te pesini mo tena tulaga ko te mea ke fakatapu a mea konā.
12 Fakamuli loa, ‵ligi ei ne ia ne mu sinu ki luga i te ulu o Alona kae faū a ia ko te mea ke fakatapu a ia.+
13 Tenā ne aumai ei ne Mose a Alona mo ana tama tāgata ke pili mai kae fakapei atu ki gatu ‵loa kae fusi olotou fusi kae fakapulou atu foki olotou pulou,+ e ‵tusa mo te fakatonuga a Ieova ne fai ki a Mose.
14 Ne aumai ne ia te pulumakau tagata o te taulaga mō agasala kae tuku atu ne Alona mo ana tama tāgata olotou lima ki luga i te ulu o te pulumakau o te taulaga mō agasala.+
15 Ne tamate ne Mose a te manu tenā kae puke ne ia ne toto+ ki tena matikao lima kae nani ki ei a suki o te fatafaitaulaga i feitu katoa, kae faka‵ma ne ia te fatafaitaulaga mai agasala, kae ko te ‵toega o toto ne ‵ligi ne ia ki lalo i te fatafaitaulaga, ko te mea ke fakatapu kae fai te faka‵māga i luga i ei.
16 Mai tua i ei, ne puke ne Mose a gako katoa i luga i gakau, ko gako i te ate, mo nonu e lua mo gako i ei, kae ‵sunu ne ia ko te mea ke au i luga i te fatafaitaulaga.+
17 Tenā ne ‵sunu ei ne ia a te pulumakau kātoa, ana pa‵kili, ana ‵kano mo ana fekau i tua o te fakai,+ e ‵tusa mo te fakatonuga a Ieova ne fai ki a Mose.
18 Ne aumai ne ia te mamoe o te taulaga ‵sunu ke pili mai, kae ko Alona mo ana tama tāgata ne tuku atu olotou lima ki luga i te ulu o te mamoe.+
19 Tenā ne tamate ei ne Mose a te mamoe kae fakamatulutulu atu a toto ki luga i feitu katoa o te fatafaitaulaga.
20 Ne katikati ne Mose a te mamoe ki vaega fo‵liki, kae ‵sunu ne ia te ulu, vaega fo‵liki mo gako* ko te mea ke au.
21 Ne ‵fulu ne Mose a gakau mo vae ki vai, kae ‵sunu ne ia a te mamoe kātoa ko te mea ke au i luga i te fatafaitaulaga. A te mea tenā se taulaga ‵sunu telā e manogi gali. Se taulaga e ofo atu i luga i te afi ki a Ieova, e ‵tusa mo te fakatonuga a Ieova ne fai ki a Mose.
22 Tenā ne aumai ei ne ia te lua o mamoe, ko te mamoe o te fakasopoga,+ kae ko Alona mo ana tama tāgata ne tuku atu olotou lima ki luga i te ulu o te mamoe.+
23 Ne tamate ne Mose a te mamoe kae puke ne ia ne mu toto mai i ei kae nani atu ki te feitu ki lalo o te taliga fakaatamai o Alona, mo te matikao matua o tena lima fakaatamai mo te matikao matua o tena vae fakaatamai.
24 Oti aka, aumai ei ne Mose a tama tāgata a Alona ki mua kae nani atu ne mu toto ki feitu ki lalo o olotou taliga fakaatamai mo matikao ma‵tua o olotou lima fakaatamai mo matikao ma‵tua o olotou vae fakaatamai; kae fakamatulutulu ne Mose a te ‵toega o toto ki feitu katoa o te fatafaitaulaga.+
25 Tenā ne puke ei ne ia a gako, ko gako i te felo, ko gako katoa i luga i gakau, ko gako i te ate, ko nonu e lua mo gako i ei mo te vae fakaatamai.+
26 Ne tapale ne ia mai te kete o falaoa sē faka‵fete i mua o Ieova e tasi te falaoa pukupuku sē faka‵fete, e tasi te falaoa pukupuku ne palu mo sinu,+ kae tasi te falaoa manifinifi.+ Ne tuku ne ia a mea konā ki luga i gako mo te vae fakaatamai.
27 Oti aka, tuku atu ei ne ia a mea katoa konā ki luga i alofilima o Alona mo alofilima o ana tama tāgata kae kamata o fakagasuesue ne latou ki mua mo tua e pelā me se taulaga fakagasuesue i mua o Ieova.
28 Tenā ne puke ei ne Mose a mea konā mai i olotou lima kae ‵sunu ne ia ko te mea ke au i luga i te fatafaitaulaga mai luga o te taulaga ‵sunu. Ne fai a mea konā e pelā me se taulaga mō te fakasopoga telā e manogi gali.* Se taulaga e ofo atu i luga i te afi ki a Ieova.
29 Tenā ne puke ei ne Mose a te fatafata kae fakagasuesue ne ia ki mua mo tua e pelā me se taulaga fakagasuesue i mua o Ieova.+ Ne fai a te vaega mai te mamoe o te fakasopoga mo fai te tusaga o Mose, e ‵tusa mo te fakatonuga a Ieova ne fai ki a Mose.+
30 Kae ne puke ne Mose ne mu sinu mai te sinu mo faū+ a tino mo ne mu toto i luga i te fatafaitaulaga kae fakamotimoti atu ki luga i a Alona mo ana gatu mo ana tama tāgata mo gatu o ana tama tāgata kolā ne ‵nofo mo ia. Mai te faiga tenā ne fakatapu ei ne ia a Alona mo ana gatu mo ana tama tāgata+ mo olotou gatu.+
31 Tenā ne fai atu ei a Mose ki a Alona mo ana tama tāgata: “Saka+ a ‵kano konā i te mataloa o te faleie o maopoopoga, kae ka kai ne koutou i konā fakatasi mo falaoa i loto i te kete o te fakasopoga, e ‵tusa mo te fakatonuga ne tuku mai ki a au, ‘Ka ‵kai a Alona mo ana tama tāgata ki mea konei.’+
32 So se mea e ‵toe mai i ‵kano mo te falaoa e ‵tau o ‵sunu ne koutou ki te afi.+
33 E se ‵tau mo koutou o ulu ki tua mo te mataloa o te faleie o maopoopoga i aso e fitu, ke oko ki te aso e palele ei te otou fakasopoga, me e fitu aso ka fai i ei te otou faka‵sopoga e pelā me ne faitaulaga.*+
34 Ne fakatonu mai a Ieova ke fai ne tatou a mea kolā ne fai ne tatou i te aso nei ko te mea ke fai se faka‵māga mō koutou.+
35 Ka ‵nofo koutou i te mataloa o te faleie o maopoopoga i ao mo po i aso e fitu+ kae fai te otou tiute ki a Ieova,+ ko te mea ke se ‵mate koutou; me tenā te fakatonuga ne tuku mai ki a au.”
36 Kae ne fai eiloa ne Alona mo ana tama tāgata a mea katoa kolā ne fakatonu atu ne Ieova e auala i a Mose.
Fakamatalaga mai lalo
^ Io me “te kalauna tapu.”
^ Io me “ko gako i nonu.”
^ Io me “fakamalie loto; logomalie.” Epelu, “logotonu.”
^ Epelu, “faka‵fonu otou lima.”
