Malaki 3:1-18
3 “Kiloke! Ko uga atu ne au taku avefekau, kae ka fakaavanoa* ne ia se auala i oku mua.+ Kae ko te Aliki tonu telā e ‵sala koe ki ei ka vau fakavave ki tena faletapu;+ kae ko te avefekau o te feagaiga, telā e fiafia koe ki ei, ka ulu mai ki loto. Kiloke! Ka vau eiloa a ia,” ko muna a Ieova o kautau.
2 “Kae ko oi e mafai o kufaki ne ia te aso o tena oko mai, kae ko oi e mafai o tu i te taimi e sae mai ei a ia? Me ka fai a ia e pelā mo te afi a te tino ‵sunu aulo* kae pelā mo te sopu+ a tāgata ‵ta gatu.
3 Kae ka sagasaga a ia pelā me se tino e ‵sunu kae faka‵ma siliva+ kae ka faka‵ma ne ia a tama tāgata a Levi; kae ka faka‵ma ne ia latou e pelā mo aulo mo siliva, kae ki a Ieova, ka fai eiloa latou e pelā me ne tino e ofo atu a taulaga i te amiotonu.
4 Kae ko te ofoatuga o taulaga i Iuta mo Ielusalema ka fakafiafia eiloa ki a Ieova, e pelā mo aso taumua.+
5 “Au ka fakapilipili atu ki a koe o fakamasino, kae ka fai fakavave taku molimau o ‵teke a tino fai tapune,+ o ‵teke a tino mulilua, o ‵teke a latou kolā e tauto fakaloiloi,+ o ‵teke a latou kolā e fakaloiloi a tino ga‵lue,+ te fafine telā ko mate tena avaga, mo te tamaliki telā ko seai sena tamana,+ kae ‵teke atu foki a latou kolā e ita ma fesoasoani atu ki te tino fakaa‵tea.+ A latou konei ne seki ma‵taku ki a au,” ko muna a Ieova o kautau.
6 “Me i a au ko Ieova; au e se mafuli.+ Kae ko koutou ko tama tāgata a Iakopo; a koutou e seki oko atu ki te otou gataga.
7 Mai i aso o otou tupuga ne ‵fuli kea‵tea koutou mai i aku tulafono fo‵liki kae seki tausi ne koutou.+ Toe ‵foki mai ki a au, kae ka foki atu au ki a koutou,”+ ko muna a Ieova o kautau.
Kae fai mai koutou: “E mafai pefea o ‵foki atu matou?”
8 “E mata, e mafai ne se tino o kaisoa a mea a te Atua? Kae ko koutou ko kaisoa ne koutou aku mea.”
Kae fai mai koutou: “I te auala fea ne kaisoa ei ne matou au mea?”
“I te tasi-vae-sefulu mo meaalofa.
9 A koutou ko oti eiloa ne fakamalaia, me ko kaisoa ne koutou aku mea—ao, ko fai ne te fenua kātoa te mea tenā.
10 Aumai te tasi-vae-sefulu kātoa ki loto i fale ‵teu koloa,+ ko te mea ke isi ne meakai i toku fale;+ kae tofotofo mai au, fakamolemole, i te feitu tenei,” ko muna a Ieova o kautau, “ke onoono aka me ka ‵tala mai ne au a ‵pui o vai o te lagi+ kae ‵ligi atu ki luga i a koutou a fakamanuiaga ke oko eiloa ki te taimi ko seai se mea koi manakogina.”+
11 “Kae ka ‵liko ne au a manu fakamasei mea ona ko koutou, kae ka se fakamasei ne latou a fuagalakau o tou fenua, io me ka se toe fai pelā me ka se ‵fua a vine i otou laukele,”+ ko muna a Ieova o kautau.
12 “A fenua katoa ka taku ne latou koutou me e fia‵fia,+ me ka fai koutou e pelā me se fenua o te fiafia,” ko muna a Ieova o kautau.
13 “A pati ‵teke a koutou ki a au ko oko eiloa i te ‵mafa,” ko muna a Ieova.
Kae fai mai koutou: “I te auala fea ne fai‵pati ‵teke ei matou ki a koe i a matou eiloa?”+
14 “E fai mai koutou, ‘E seai se aoga ke tavini atu ki te Atua.+ Ne a mea aoga ne maua ne tatou e auala i te tausiga o ‵tou tiute ki a ia kae e auala i te sa‵sale mo te fanoa‵noa i mua o Ieova o kautau?
15 Nei la, e taku ne matou a tino fakamata‵mata me ne tino fia‵fia. A latou foki kolā e fai amioga ma‵sei e manuia.+ E loto ma‵losi latou o tofotofo a te Atua kae ‵sao latou mai i ei.’”
16 I te taimi tenā, a latou kolā e ma‵taku ki a Ieova ne fai‵pati te suā tino ki te suā tino, ko tino taki tokotasi mo olotou taugasoa, kae ko Ieova ne saga atu faeloa ki a latou kae fakalogologo. Kae e isi se tusi o fakamasauaga ne tusi i ana mua+ mō latou kolā e ma‵taku ki a Ieova mo latou kolā e mafaufau ‵loto ki tena igoa.+
17 “Kae ka fai latou mo oku,”+ ko muna a Ieova o kautau, “i te aso e fai ei ne au latou mo fai oku tino fakapito.*+ Ka fakaasi atu ne au te alofa atafai ki a latou, e pelā eiloa mo se tagata e fakaasi atu te alofa atafai ki tena tama tagata telā e tavini atu ki a ia.+
18 Kae ka toe lavea ne koe te ‵kese o te tino amiotonu mo te tino amio masei,+ te tino e tavini atu ki te Atua mo te tino e se tavini atu ki a ia.”
Fakamatalaga mai lalo
^ Io me “fakatoka.”
^ E se fakasino atu fua te tugapati Epelu ki te faka‵māga o aulo, kae e aofia foki i ei a nisi fiti.
^ Io me “kope tāua.”
