Te Tusi a Maleko 6:1-56
6 Ne tiaki ne ia te koga tenā kae fanatu ki tena fenua,+ kae ne tau‵tali atu ana soko i a ia.
2 I te okoga ki te Sapati, ne kamata o akoako atu a ia i loto i te sunako, kae ne ofo eiloa te tokoukega o tino kolā ne lagona ne latou a ia kae fai aka: “Ne maua i fea ne te tagata tenei a mea konei?+ Kae kaia ne tuku atu ei te poto tenei ki a ia, ke fai ne ia a galuega ‵mana konei?+
3 E se ko ia tenei te kamuta,+ te tama tagata a Malia+ kae ko te taina o Iakopo,+ Iosefa, Iuta mo Simona?+ Kae e a, e se ko ana tuagane konei e ‵nofo mo tatou?” Tenā ne kamata ei latou o se fia‵fia ona ko ia.
4 Kae ne fai atu a Iesu ki a latou: “A te pelofeta e se ‵malu i tena fenua tonu mo ana kāiga mo tena fale.”+
5 Ne seki mafai ne ia o fai se galuega ‵mana i konā kae na ko te fakaeke atu fua o ana lima ki nai tino ma‵saki o faka‵lei latou.
6 E tonu, ne ofo a ia i te sē lava o te lotou fakatuanaki. Kae ne malaga fakatamilo atu a ia i fakai fo‵liki o akoako atu i ei.+
7 Ne fakamaopoopo mai ne ia te toko Sefululua kae kamata o uga atu latou taki tokolua+ kae tuku atu foki ki a latou te ‵mana ke pule atu ki luga i agaga ma‵sei.+
8 Ne fakatonu atu foki a ia ki a latou ke seai se mea e ave i te malaga kae na ko te tokotoko fua—e seai se falaoa, e seai se taga meakai, e seai ne tupe* i olotou taga tupe+—
9 kae ke fai olotou taka, kae ke mo a ma pei ne gatu* e lua.
10 E se gata i ei, ne fai atu a ia ki a latou: “I so se fale e ulu koutou ki ei, ‵nofo i konā ke oko eiloa ki te taimi e tiaki ei ne koutou te koga tenā.+
11 Kae i so se koga e se talia ei koutou io me e se fia faka‵logo atu ki a koutou, tuetue atu la a ‵pefu i otou vae māfai e olo koutou kea‵tea, ke fai mo molimau ki a latou.”+
12 Tenā ne olo ei latou o talai ko te mea ke sala‵mo a tino,+
13 kae ne afuli ne latou kea‵tea a temoni e uke+ kae milimili a tino ma‵saki e tokouke ki te sinu kae faka‵lei latou.
14 Ne logo te Tupu ko Helota me ko lauiloa valevale te igoa o Iesu i koga katoa, kae ne fai aka a tino penei: “A Ioane te Papatiso ko oti ne toe fakatu aka mai te mate, kae tenā eiloa te pogai e fai ei ne ia a galuega ‵mana konā.”+
15 Kae e fai mai a nisi tino: “A ia ko Elia.” Kae ko nisi tino e fai mai: “A ia se pelofeta e pelā me se tino e tokotasi o te kau pelofeta i aso mua.”+
16 Kae i te lagonaga ne Helota a te mea tenei, fai aka ei ana muna: “A Ioane telā ne ‵kati ne au tena ua, ko ia tenā ko oti ne toe fakatu aka.”
17 Me ko Helota eiloa ne uga ne ia a tino ke puke fakapagota a Ioane kae ‵pei ki te falepuipui ona ko Helotia, te avaga a tena taina ko Filipo, telā ko avaga mo ia.+
18 Me ne fai sāle atu a Ioane ki a Helota: “E se talia i te tulafono ke fai te avaga a tou taina mo fai tau avaga.”+
19 Tela la, ne ita fakamoemoe faeloa a Helotia ki a Ioane kae fia tamate ki ei, kae ne seki mafai ne ia.
20 Me ne puipui ne Helota a Ioane ona ko tena mataku me e iloa ne ia i a Ioane se tagata amiotonu kae ‵malu.+ I tena otiga ne fakalogologo ki a Ioane, ne se iloa ne Helota me se a tena mea ka fai ki a Ioane, kae ne fakalogologo atu faeloa a ia ki ei mo te fiafia.
21 Kae ne maua ne tou fafine te avanoaga i te faiga o te ‵kaiga o te aso fanau+ o Helota i te afiafi mō ana ofisa ma‵luga mo takitaki o tena kautau mo toe tāgata ma‵luga i Kalilaia.+
22 Ne fanatu eiloa te tama fafine a Helotia o saka kae ne fia‵fia i ei a Helota mo tino kolā ne ‵kai* fakatasi mo ia. Ne fai atu te tupu ki te tamafine tenā: “Taku mai ki a au so se mea e manako koe ki ei, kae ka tuku atu ne au ki a koe.”
23 Ao, ne tauto atu tou tagata ki a ia: “So se mea e manako koe ki ei mai i a au, ka tuku atu eiloa ne au ki a koe, ke oko ki te āfa o toku malo.”
24 Ne fano tou fafine ki tua kae fai atu ki tena mātua: “Se a te mea ka taku atu ne au?” Muna a tena mātua: “Ko te ulu o Ioane te Papatiso.”
25 Ne fanatu fakavave a ia ki te tupu kae fakaasi atu tena manakoga, ana muna: “Au e manako ke tuku mai ne koe ki a au nei eiloa te ulu o Ioane te Papatiso i luga i se telē.”+
26 E tiga eiloa ne fanoanoa malosi tou tagata i te mea tenei, ne seki manako te tupu ke se saga atu a ia ki te fakamolemole a tou fafine, ona ko tena tautoga e penā foki loa mo ana tino ‵kami.*
27 Ne uga fakavave atu ne te tupu se leoleo kae fakatonu atu ke puke mai te ulu o Ioane. Tenā ne fano ei tou tagata o ‵kati te ua o Ioane i te falepuipui
28 kae aumai tena ulu i luga i se telē. Ne tuku atu ki te tamafine, kae tuku atu ne ia ki tena mātua.
29 I te ‵logoga o ana soko i te mea tenā, olo atu ei latou o puke tena foitino kae tuku atu ki loto i se tanuga.
30 Ne maopoopo atu a apositolo ki tafa o Iesu kae fakamatala atu ki a ia a mea katoa kolā ko oti ne fai kae akoako atu ne latou.+
31 Ne fai atu a ia ki a latou: “O‵mai ‵tou olo o malō‵lo malie aka i se koga, i a tatou aka eiloa.”+ Me ne tokouke a tino ne o‵mai kae toe olo foki, ko seai ei se lotou taimi ke malō‵lo o ‵kai.
32 Olo ei latou i te pōti ki se koga e seai ne tino i ei, ko latou aka eiloa.+
33 Ne lavea kae ne iloa foki ne tino e tokouke te lotou ologa, kae ne ‵tele fakatasi atu a tino mai fakai katoa kae ne ‵mua atu i a latou.
34 I tena fanaifoga mo te pōti, ne lavea ne ia se vaitino, kae ne alofa malosi a ia ki a latou+ me ko fai latou e pelā me ne mamoe e seai se lotou tino tausi.+ Kae ne kamata o akoako atu ne ia a mea e uke ki a latou.+
35 I te okoga ki te fakaafiafi, olo atu ei ana soko ki a ia kae fai atu: “A te koga tenei e ‵mao ‵ki kae ko pili o po.+
36 Uga atu latou ke olo ki koga tai ‵pili mai mo fakai fo‵liki o ‵togi ne olotou meakai i ei.”+
37 Ne tali atu a Iesu ki a latou: “Tuku atu ne koutou ne meakai ke ‵kai ei latou.” Kae ne fai atu latou ki a ia: “E a, ka olo matou o ‵togi mai ne falaoa kolā e mafai o maua i te 200 tenali* ko tuku atu ei ke ‵kai a tino i ei?”+
38 Ana muna ki a latou: “E fia otou falaoa? Onoono aka!” I te iloaga ne latou te aofaki, fai atu ei: “E lima, mo ika e lua.”+
39 Kae ne fakatonu atu a ia ki tino katoa ke saga‵saga ki lalo i mouku i potukau.+
40 Kae ne saga‵saga latou ki lalo i potukau e taki toko 100 mo taki toko 50.
41 Ne puke ne ia a falaoa e lima mo ika e lua ne kilo aka a ia ki te lagi kae fai te fakafetai.+ Tenā ne tofitofi ei ne ia a falaoa kae kamata o tuku atu ki ana soko ke tuku atu ki mua o tino kae ne vaevae foki ne ia a ika e lua mō latou katoa.
42 Tenā ne ‵kai ei a latou katoa kae ma‵kona.
43 Ne faka‵fonu ne latou a tapola e 12 ki toegā falaoa, kae e se aofia i ei a ika kolā ne ‵toe.+
44 A latou kolā ne ‵kai ki falaoa e toko 5,000 tāgata.
45 Tenā ne fai atu ei a ia ki ana soko ke ‵sopo ki te pōti kae ke ‵mua atu ki te suā feitu ki Petesaita, ko te mea ke uga atu mua ne ia te vaitino ke olo.+
46 Kae i tena otiga ne fakatofa ki a latou, fanaka ei a ia o ‵talo i luga i se mauga.+
47 I te okoga ki te afiafi po, a te pōti e nofo loa i te kogaloto o te vai, kae ko ia tokotasi fua e ‵toe i uta.+
48 Kae i te laveaga ne ia me ko logo‵fio latou i te pūlūga o te pōti me i te matagi e ‵pono tonu mai eiloa i olotou mua, kae kāti ko te fa o ‵tuga i te po,* ne sasale atu a ia ki a latou i luga i te vai; kae e foliga mai me ka fakaseke a ia i a latou o fano.
49 I te laveaga ne latou a ia e sasale i luga i te vai, ne mafau‵fau latou penei: “A te mea tenei se aitu!” Kae ne paka‵laga latou.
50 Me ne lavea a ia ne latou katoa kae ne ma‵taku latou i ei. Kae ne faipati fakavave atu a ia ki a latou, kae fai atu: “Ke loto ‵toa koutou! Ko au fua tenei; sa ma‵taku.”+
51 Tenā ne sopo aka ei a ia ki luga i te pōti, malū ei te matagi. Ona ko te mea tenei, ne ofo ei latou,
52 me ne seki maina latou i te uiga o falaoa, kae ne tumau eiloa olotou loto i te sē malamalama.
53 I te lotou okoga ki te suā feitu, ki te fenua ko Kenesaleta, taula ei te lotou pōti i se koga e pili ki ei.+
54 Kae i te taimi eiloa ne olo ifo ei latou mo te pōti, ne lavea a ia ne tino.
55 Ne ‵tele atu latou ki kogā koga katoa o te fenua kae kamata o aumai ne latou i luga i moega a tino ma‵saki ki te koga telā ne ‵logo latou me e nofo i ei tou tagata.
56 Kae i so se fakai foliki io me ko fakai ‵lasi io me ko koga i tua o fakai e fanatu a ia ki ei, e tuku ne latou a tino ma‵saki i maketi, kae fakamolemole atu ke fakapa‵tele atu fua latou ki te fele o tena gatu.+ Kae ko latou katoa kolā ne pa‵tele ki ei ne ‵lei katoa olotou masaki.
Fakamatalaga mai lalo
^ Eleni, “kopa.”
^ Io me “se suā gatu.”
^ Io me “faka‵pale i te taipola.”
^ Io me “ko latou kolā e faka‵pale i te taipola.”
^ Telā kāti ko te 3:00 i te vaveao ke oko ki te saeakaga o te la kāti ko te 6:00 i te tafataeao.
