Numela 35:1-34
35 Ne faipati atu a Ieova ki a Mose i te koga laugatasi o Moapi i tafa o te Iolitana+ i Ieliko, ana muna:
2 “Fakatonu atu ki tino Isalaelu me e ‵tau o tuku atu ne latou ki tino Levi ne fakai ke ‵nofo latou i ei mai tofi kolā ka maua ne latou,+ kae e ‵tau foki o tuku ne latou ki tino Levi ne laukele moukuā i tafatafa o fakai konā.+
3 Ka ‵nofo latou i fakai konā, kae ko laukele moukuā e tuku mō olotou lafu manu, olotou kope mo olotou nisi manu katoa.
4 A laukele moukuā o fakai kolā ka tuku atu ne koutou ki tino Levi, e ‵tau o 1,000 kupita* mai te ‵pui o te fakai o fano ki tua i ana feitu katoa.
5 E ‵tau o fua ne koutou mai tua o te fakai e 2,000 kupita i te feitu ki saegala, e 2,000 kupita i te feitu ki saute, e 2,000 kupita i te feitu ki togala, kae 2,000 kupita i te feitu ki mātū, kae e ‵tau o tu te fakai i te kogaloto. E fai a mea konei mo fai a laukele moukuā o olotou fakai.
6 “A fakai kolā ka tuku ne koutou ki tino Levi ne fakai faka‵lafi e 6,+ kolā ka tuku ne koutou mo tele+ ki ei te tino ne mate i ei te suā tino, e pelā foki mo nisi fakai aka e 42.
7 E ‵tau o tuku atu ne koutou ki tino Levi e 48 fakai fakatasi mo olotou laukele moukuā.+
8 A fakai ka tuku atu ne koutou ko laukele kolā ne maua ne tino Isalaelu.+ Mai potukau kolā e tokouke e ‵tau o uke a mea e puke ne koutou mai i ei, kae mai potukau kolā e mu‵tana e ‵tau o mu‵tana a mea e puke ne koutou mai i ei.+ Ka tuku atu eiloa ne potukau takitasi a nisi fakai o latou ki tino Levi e ‵tusa mo te lasi o te lotou tofi ne maua.”
9 Ne toe faipati atu a Ieova ki a Mose, ana muna:
10 “Faipati ki tino Isalaelu kae fai atu ki a latou, ‘A koutou ka olo ki te suā feitu o te Iolitana ki te fenua o Kanana.+
11 E ‵tau o fili ne koutou a fakai kolā e ‵lei ki a koutou mo fai a fakai faka‵lafi kolā e ‵tau o tele+ ki ei se tino telā ne tamate ne ia te suā tino i se auala fakafuasei.
12 Ka fai a fakai konei mo fai ne koga e faka‵lafi ki ei koutou mai te tino telā e taui ne ia te toto,+ ko te mea ke se mate a te tino ne mate i ei te suā tino ke oko ki te taimi e fai ei tena fakamasinoga i mua o te fakapotopotoga.+
13 Ka fakaaoga a fakai faka‵lafi e ono kolā ne tuku mai ne koutou mō te pogai eiloa tenei.
14 Ka tuku atu ne koutou e tolu fakai i te feitu tenei o te Iolitana+ kae tolu fakai i te fenua o Kanana+ mo fai a fakai faka‵lafi.
15 Ka fai a fakai e ono konei mo fai ne koga e faka‵lafi ki ei a tino Isalaelu, te tino fakaa‵tea,+ mo te tino telā e ‵nofo tasi latou, ke tele ki ei so se tino telā ne tamate ne ia te suā tino i se auala fakafuasei.+
16 “‘Kae kafai ne ‵pago ne ia se isi tino ki se fiti kae mate te tino tenā, a ia se tino tatino. E ‵tau eiloa o tamate te tino tatino tenā.+
17 Kae kafai ne ‵pago ne ia ki se fatu telā e mafai o mate i ei se tino kae mate eiloa te tino tenā, a ia se tino tatino. E ‵tau eiloa o tamate te tino tatino tenā.
18 Kae kafai ne ‵pago ne ia ki se mea ne faite mai i se lakau telā e mafai o mate i ei se tino kae mate eiloa te tino tenā, a ia se tino tatino. E ‵tau eiloa o tamate a te tino tatino tenā.
19 “‘A te tino telā e taui ne ia te toto ko te tino telā ka tamate ne ia te tino tatino. Kafai e maua ne ia te tino tatino e ‵tau eiloa o tamate ne ia.
20 Kafai ne mate se tino me ne ‵tule ne ia ona ko tena takalialia, io me ne pei ne ia ki se mea ona ko tena ita fakamoemoe,+
21 io me fakaoko ana lima ona ko tena takalialia ki ei, kae mate te tino tenā, a te tino telā ne ta ne ia e ‵tau eiloa o tamate. A ia se tino tatino. A te tino telā e taui ne ia te toto e ‵tau o tamate ne ia te tino tatino māfai e maua ne ia.
22 “‘Kae kafai se mea ne tupu fakafuasei kae e se ona ko te takalialia telā ne ‵tule ei ne ia te tino tenā io me pei ne ia se mea ki ei e aunoa mo te ita fakamoemoe,+
23 io me kafai ne seki lavea ne ia a te tino tenā kae tuku atu se fatu ke siga a ia i ei kae ko ia e sē se fili io me salasala ki se mea ke fakapakia ei te tino tenā, kae ne mate te tino tenā,
24 e ‵tau o fakamasino ne te fakapotopotoga a te tino ne tamate ne ia te tino tenā mo te tino telā e taui ne ia te toto, e ‵tusa eiloa mo tulafono fakavae konei.+
25 E ‵tau o fakasao ne te fakapotopotoga a te tino ne mate i ei te suā tino mai lima o te tino telā e taui ne ia te toto kae fakafoki atu ki te fakai faka‵lafi telā ne tele a ia ki ei, kae e ‵tau o nofo a ia i ei ke oko ki te taimi e mate ei te faitaulaga sili telā ne faū ki te sinu tapu.+
26 “‘Kae kafai e tiakina ne te tino ne mate i ei te suā tino a te fakai faka‵lafi telā ne tele a ia ki ei
27 kae maua a ia ne te tino telā e taui ne ia te toto i tua o te fakai faka‵lafi kae tamate ne ia te tino ne mate i ei te suā tino, e se agasala a ia i te toto o te tino tenā.
28 Me e ‵tau o nofo a te tino tenā i tena fakai faka‵lafi ke oko ki te taimi e mate ei te faitaulaga sili. Kafai ko oti ne mate te faitaulaga sili ko mafai ei o foki atu a te tino ne mate i ei te suā tino ki tena fakai tonu.+
29 Ka fai a mea konei e pelā me ne tulafono fakavae mo fai otou fakamasinoga i otou kautama katoa i so se koga e ‵nofo koutou i ei.
30 “‘So se tino e tamate ne ia se tino e ‵tau eiloa o tamate e pelā me se tino tatino+ mai i fakamatalaga a nisi molimau;+ kae e se ‵tau o tamate se tino ona ko te fakamatalaga a se molimau fua e tokotasi.
31 E se ‵tau o talia ne koutou se togiola mō te ola o se tino tatino telā e ‵tau o tamate, me e ‵tau eiloa o tamate a ia.+
32 E se ‵tau o talia ne koutou se togiola mō se tino telā ne tele ki te fakai faka‵lafi, ko te mea ke mafai o foki a ia ki tena fenua kae seki mate a te faitaulaga sili.
33 “‘E se ‵tau o fakalailai ne koutou te fenua e ola koutou i ei, me e fakalailai ne te toto a te fenua,+ kae e mafai o seai se faka‵māga mō te toto telā ko oti ne maligi i luga i te fenua kae na ko te toto o te tino telā ne fakamaligi ne ia.+
34 E se ‵tau o fakalailai ne koutou a te fenua e ‵nofo koutou i ei, telā e nofo au i ei; me i a au ko Ieova e ‵nofo fakatasi mo tino Isalaelu.’”+
