Sakalia 12:1-14
12 Se folafolaga:
“Ko te fekau a Ieova e uiga ki Isalaelu,” ko te folafolaga a Ieova,Ko te Atua telā ne ‵fola ne ia te lagi,+Telā ne fakatakato ne ia te fakavae o te lalolagi,+Kae ne faite ne ia te agaga* o te tagata i loto i a ia.
2 “Au tenei ko fai ne au se ipu* ma Ielusalema telā e fai ei a tino katoa kolā e ‵pili mai ke takasē‵se; kae ka nikoi i ei a Iuta e pelā foki mo Ielusalema.+
3 I te aso tenā ka fai ne au a Ielusalema ke pelā me se fatu ‵mafa* ki tino katoa. A latou katoa kolā e sau ne latou ka pa‵kia malosi;+ kae ko atufenua katoa o te lalolagi ka maopoopo fakatasi o taua atu ki a ia.+
4 I te aso tenā,” ko te folafolaga a Ieova, “ka ‵ta ne au a solofanua katoa ki te mataku kae ko olotou tino faka‵tele ki te fakavalevale. Ka pula ‵toka atu oku mata ki te kāiga o Iuta, kae ka fai ne au ke ‵kivi a mata o solofanua katoa a tino.
5 Kae ko ulualiki* o Iuta ka fai aka i olotou loto, ‘A tino e ‵nofo i Ielusalema e fai mo fai te motou malosi telā e maua mai i a Ieova o kautau te lotou Atua.’+
6 I te aso tenā ka fai ne au a ulualiki o Iuta e pelā me se ulo ‵vela i luga i fafie kae se molisulu ‵ka i se laina o saito ko oti ne ‵kati,+ kae ka ‵sunu ne latou a tino katoa i olotou tafa i te feitu fakaatamai mo te feitu fakamaui;+ kae ka toe ‵nofo a tino Ielusalema i te lotou koga, i Ielusalema.+
7 “Kae ko Ieova ka fakasao muamua ne ia a Iuta, ko te mea ke se sili atu a te gali o te kāiga o Tavita mo te gali o tino e ‵nofo i Ielusalema i lō Iuta.
8 I te aso tenā a Ieova ka fai pelā me se ‵pui e fakatamilo i tino e ‵nofo i Ielusalema;+ i te aso tenā, a te tino telā e siga* i a latou ka pelā mo Tavita, kae ko te kāiga o Tavita ka pelā mo te Atua, e pelā mo te agelu a Ieova telā e fanatu i olotou mua.+
9 I te aso tenā ka fakaseai eiloa ne au a atufenua katoa kolā e ‵teke ki Ielusalema.+
10 “Ka ‵ligi atu ne au ki luga i te kāiga o Tavita mo tino e ‵nofo i Ielusalema a te agaga o te taliaga mo ‵talo fakamolemole, kae ka ‵kilo atu latou ki te tino telā ne velo ne latou,+ kae ka ‵tagi paka‵laga latou ona ko ia e pelā eiloa māfai e ‵tagi paka‵laga latou ki se tama tagata e tokotasi eiloa; kae ka ‵tagi fanoa‵noa latou ona ko ia e pelā eiloa māfai e ‵tagi fanoa‵noa latou ki se toekimua tagata e tokotasi eiloa.
11 I te aso tenā, a te ‵tagi pakalaga i Ielusalema ka lasi eiloa e pelā mo te ‵tagi pakalaga i Hatatalimoni i te Vanu o Mekito.+
12 Kae ko te fenua ka ‵tagi paka‵laga, ko kāiga takitasi i a latou eiloa; ko te kāiga o Tavita i a latou eiloa, mo olotou fāfine i a latou eiloa; ko te kāiga o Natano+ i a latou eiloa, mo olotou fāfine i a latou eiloa;
13 ko te kāiga o Levi+ i a latou eiloa, mo olotou fāfine i a latou eiloa; ko te kāiga o tino Simei+ i a latou eiloa, mo olotou fāfine i a latou eiloa;
14 mo kāiga katoa kolā e ‵toe mai, ko kāiga takitasi i a latou eiloa, mo olotou fāfine i a latou eiloa.
Fakamatalaga mai lalo
^ Io me “mānava.”
^ Io me “pōla.”
^ Io me “amoga ‵mafa.”
^ A te ulualiki se aliki o se matakāiga.
^ Io me “toe tino vāi‵vai.”
