Tanielu 12:1-13
12 “I te taimi tenā, ka tu aka ei a Mikaele,*+ te pelenise sili+ telā e tu mō ou tino. Kae ka isi se taimi o te puapuaga telā e seki tupu aka eiloa talu mai te taimi ne kamata ei o isi se fenua. Kae i te taimi tenā a ou tino ka ‵sao,+ ko tino katoa kolā e tusi olotou igoa i te tusi.+
2 Kae ko tino e tokouke kolā e ‵moe i te ‵pefu o te lalolagi ka ala aka, a nisi ki te ola se-gata-mai kae ko nisi ki te masiasi mo te fakatakalialia ki te se-gata-mai.
3 “Kae ko latou kolā e malamalama tonu ka maina e pelā mo te vanimonimo o te lagi, kae ko latou kolā e aumai ne latou a tino e tokouke ki te amiotonu ka maina e pelā mo fetū, ki te se-gata-mai, se-gata-mai eiloa.
4 “E pelā mo koe e Tanielu, ‵funa aka a pati konei, kae ‵pono faka‵mau te tusi ke oko ki te taimi o te gataga.+ E tokouke a tino ka olo valevale,* kae ko te iloaga tonu ka gasolo aka eiloa o lasi.”*+
5 Tenā ne kilo atu ei au, Tanielu, kae lavea ne au a nisi tino e tokolua e ‵tu mai i konā, e tokotasi i te kaugutu tenei o te vaitafe kae tokotasi i te suā kaugutu o te vaitafe.+
6 Tenā ne fai atu ei te tino e tokotasi ki te tagata e pei ki gatu lino,+ telā e tu i luga i vai o te vaitafe: “Ka pefea te leva kae oko mai a te gataga o mea fakaofoofogia konei?”
7 Tenā ne lagona ei ne au te tagata e pei ki gatu lino, telā e tu i luga i vai o te vaitafe, i te taimi ne sisi aka ei tena lima fakaatamai mo tena lima fakamaui ki te lagi kae tauto atu e auala i te Atua telā e ola ki te se-gata-mai:+ “Ka fai eiloa penā mō se taimi ne filifilia, taimi e lua* ne filifilia, mo te āfa taimi.* I te taimi eiloa e gata ei te ofa likilikiga o te malosi o tino tapu,+ ka palele atu ei a mea katoa konei.”
8 E pelā mo au, ne lagona ne au, kae ko au e se malamalama;+ tenā ne fai atu ei au: “Toku aliki, se a te ikuga o mea konei?”
9 Ana muna: “Tanielu, fano, me i muna konei e ‵funa kae ‵pono faka‵mau ke oko eiloa ki te taimi o te gataga.+
10 E tokouke a tino ka faka‵ma eiloa latou kae faka‵kena eiloa latou kae ka tofotofo aka.+ Kae ko tino amio ma‵sei ka fai a mea ma‵sei, kae e seai se tino amio masei ka malamalama; kae ko latou kolā e ‵loto te lotou malamalama ka maina i ei.+
11 “Kae mai te taimi ne ave kea‵tea ei a te taulaga+ e ‵tau o ofo atu i aso takitasi kae ko te mea fakatakalialia telā e māfua i ei te fakamaseiga ko tuku ki tena koga tonu,+ ka isi ne aso e 1,290.
12 “E fiafia a te tino telā e tumau i te nofo fakatalitali kae oko atu ki aso e 1,335!
13 “Kae pelā mo koe, ke tumau koe ke oko ki te gataga. A koe ka malōlō, kae ka tu aka koe ki luga ke maua tou vaega i te fakaotiga o aso.”+
Fakamatalaga mai lalo
^ Tena uiga “Ko oi e Pelā mo te Atua?”
^ Io me “sukesuke faka‵lei ki ei [telā ko te tusi].”
^ Io me “ka salalau.”
^ Epelu, “ne taimi.”
^ Telā ko te tolu mo te āfa taimi.
