Tanielu 9:1-27
9 I te tausaga muamua o Taliu+ te tama tagata a Asuelu—se tino ne tupu mai i tino Metai, ko ia telā ne fai mo tupu i te malo o tino Kaletaia+—
2 i te tausaga muamua o tena pulega, ne iloa aka ne au, Tanielu, e auala i tusi* a te aofaki o tausaga ne fai atu ne Ieova i tena fekau ki a Ielemia te pelofeta ke fakataunu i ei te fakamaofaga o Ielusalema,+ telā e 70 tausaga.+
3 Tenā ne saga atu ei oku mata ki a Ieova te Atua tonu, kae fakatagi atu e auala i ‵talo, fakatasi mo te fakalikiliki+ mo gatu lautaga mo ‵pefu.
4 Ne ‵talo atu au ki a Ieova toku Atua kae fakatoese atu aku muna:
“Ieova te Atua tonu, te Atua sili kae fakaofoofogia, telā e tausi ki tena feagaiga kae fakaasi atu te alofa fakamaoni+ ki a latou kolā e a‵lofa ki a ia kae tausi ki ana fakatonuga,+
5 a matou ko oti ne agasala kae fai mea ‵se kae fai mea matagā kae ‵teke atu;+ kae ko matou ne faka‵seke kea‵tea mai i au fakatonuga mo au fakamasinoga.
6 Ne seki faka‵logo eiloa matou ki au tavini ko pelofeta,+ kolā ne fai‵pati i tou igoa ki omotou tupu, omotou pelenise, omotou tupuga, mo tino katoa o te fenua.
7 A te amiotonu i o koe, e Ieova, kae i o matou te masiasi e pelā mo te mea ko tupu i te aso nei, ki tino Iuta, ko tino e ‵nofo i Ielusalema, mo Isalaelu kātoa, ko tino e ‵pili mai mo tino ‵mao, i fenua katoa kolā ne fakasalalau ne koe latou ki ei me ne fai ne latou a faifaiga sē fakamaoni ki a koe.+
8 “Ieova, i o matou eiloa te masiasi, mo omotou tupu, omotou pelenise mo omotou tupuga, me ne agasala eiloa matou ki a koe.
9 A te alofa fakamagalo mo te loto fakamagalo i o Ieova te motou Atua,+ me i a matou ne ‵teke atu ki a ia.+
10 Ne seki faka‵logo eiloa matou ki te leo o Ieova te motou Atua mai te tau‵tali i ana tulafono kolā ne tuku ne ia i omotou mua e auala i ana tavini ko pelofeta.+
11 A Isalaelu kātoa ne soli ne latou tau Tulafono kae ‵fuli kea‵tea ona ko te sē faka‵logo ki tou leo, tenā ne ‵ligi mai ei ne koe ki luga i a matou a te fakamalaiaga mo pati fetū ne tusi ki lalo i te Tulafono a Mose te tavini a te Atua tonu,+ me i a matou ne agasala ki a Ia.
12 Ne fakataunu ne ia ana pati ne fai o ‵teke mai ki a matou+ mo omotou pule kolā e pule mai ki a matou,* mai te tukumaiga o te mala lasi ki luga i a matou; e seki ai eiloa se mea ke fai i lalo o te lagi e pelā mo te mea ne fai i Ielusalema.+
13 E pelā eiloa mo mea ne tusi i te Tulafono a Mose, a mala katoa konei ko oko mai ki a matou,+ kae ne seki akai atu eiloa matou ki te taliaga a Ieova te motou Atua mai te ‵fuli kea‵tea mai i omotou mea ‵se+ kae mai te fakaasiatuga o te malamalama ki tau munatonu.*
14 “Tela la, a Ieova ne onoono mai faeloa kae ne aumai ne ia te mala ki luga i a matou, me i a Ieova te motou Atua e amiotonu i ana galuega katoa e fai; kae ne seki faka‵logo matou ki tena leo.+
15 “Nei la, e Ieova te motou Atua, te Atua telā ne aumai ne ia tou fenua ki tua mo te fenua o Aikupito e auala i se lima malosi+ kae fai se igoa mō koe ke oko mai ki te aso nei,+ ko oti ne agasala matou kae fai a mea matagā.
16 Ieova, e ‵tusa eiloa mo au faifaiga amio‵tonu katoa,+ fakamolemole, ke ‵fuli eiloa kea‵tea tou ita mo tou kaitaua mai tou fakai ko Ielusalema, tou mauga tapu; ona ko omotou agasala mo mea ‵se a omotou tupuga, ko fai ei a Ielusalema mo ou tino mo fai se mea fakatakalialia ki a latou katoa i omotou tafa.+
17 Kae nei la, fakalogo mai e te motou Atua, ki te ‵talo a tau tavini mo ana fakatagi, kae fai ke maina mai ou mata ki luga i tou koga tapuaki+ telā ko maofa,+ mō te ‵lei o koe, e Ieova.
18 Tuku mai ou taliga, e toku Atua, kae fakalogologo mai! ‵Pula ou mata kae kilo mai ki te motou tulaga masei mo te fakai telā ne fakaigoa ki tou igoa; me i a matou e se fakatagi atu ki a koe ona ko te motou amiotonu kae ona ko te lasi o tou alofa fakamagalo.+
19 Ieova, fakalogo mai. Ieova, fakamagalo matou.+ Ieova, saga tonu mai kae gasuesue! Sa fakatuai, mō te ‵lei o koe, e toku Atua, me ko tou igoa eiloa ne fakaigoa ki ei tou fakai mo ou tino.”+
20 I te taimi koi faipati atu ei au kae ‵talo kae fakaasi atu taku agasala mo te agasala a toku fenua ko Isalaelu kae fakatagi atu mō te taliaga i mua o Ieova toku Atua e uiga ki te mauga tapu o toku Atua,+
21 ao, i te taimi koi faipati atu ei au i te ‵talo, ne vau ki a au a te tagata ko Kapilielu+ telā ne lavea ne au i te fakaasiga muamua,+ i te taimi ko vāivāi malosi eiloa au kāti ko te taimi e ofo atu ei a taulaga i te afiafi.
22 Kae ne tuku mai ne ia ki a au te malamalama, ana muna:
“Tanielu, au ne vau o tuku atu ki a koe te poto mo te malamalama.
23 I te taimi ne kamata ei koe o fai au fakatagi ne oko mai te fekau, kae ko vau nei au o fakailoa atu ki a koe, me i a koe se tino telā e tāua ‵ki.*+ Tela la, mafaufau ki te mea tenā kae ke malamalama i te fakaasiga.
24 “E isi ne vaiaso* e 70 ko oti ne fakatoka mō ou tino mo tou fakai tapu,+ ko te mea ke fakaseai i ei te solitulafono, ke fakagata a te agasala,+ ke fai te faka‵māga mō mea ‵se,+ ke aumai ei te amiotonu tumau,+ ke fakamailoga te fakaasiga mo te valoaga,*+ kae ke faū a te ‵Toe Potu Tafasili i te Tapu.
25 E ‵tau o iloa kae maina foki koe me mai te avatuga o te fakatonuga ke toe fakafou aka kae toe faite a Ielusalema+ ke oko ki te Mesia*+ te Takitaki,+ ka isi ne vaiaso e 7, mo vaiaso foki e 62.+ Ka toe fakafou kae toe faite te fakai, fakatasi mo se malae mo se alavai e fakatamilo i te fakai, kae ka fai eiloa i taimi o puapuaga.
26 “Kae mai tua o vaiaso e 62, ka tamate ei te Mesia,+ e aunoa mo se mea ma ia.+
“Kae ko te kautau a te takitaki telā ka vau ka fakaseai ne ia te fakai mo te koga tapu.+ Kae ko tena gataga ka auala atu i se lofiaga. Kae ke oko atu eiloa ki te gataga ka isi faeloa ne taua; kae ko te fakamaseiga ko te mea telā ko oti ne fakaiku aka.+
27 “Kae ka fai ne ia te feagaiga ke tumau tena malosi mō tino e tokouke i se vaiaso e tasi; kae i te āfa o te vaiaso, ka fakagata ei ne ia a te faiga o taulaga mo te ofoatuga o meaalofa.+
“Kae i luga i te kapakau o mea fakatakalia‵lia ka isi se tino telā e fakamāfua ne ia te fakamaofaga o mea;+ kae ke oko atu ki te fakaseaiga, ka ‵ligi eiloa ki tua a te mea telā ko oti ne fakaiku aka ki luga i te mea telā ko oti ne ofa ki lalo.”
Fakamatalaga mai lalo
^ Telā ko tusi tapu.
^ Epelu, “ko motou famasino kolā e fakamasino ne latou a matou.”
^ Io me “fakamaoni.”
^ Io me “manakogina malosi; fakatāua malosi.”
^ Epelu, “pelofeta.”
^ Telā ko vaiaso o tausaga.
^ Io me “te Tino Fakaekegina.”
