Teutelonome 7:1-26
7 “I te taimi e aumai ei koe ne Ieova tou Atua ki te fenua telā ka ulu atu koe ki ei ke puke mō koe,+ ka afuli kea‵tea foki ne ia mai ou mua:+ a tino Heti, tino Kilikase, tino Amoli,+ tino Kanana, tino Pelise, tino Hivi, mo tino Iepuse,+ ko atufenua e fitu kolā e tokouke a tino i ei kae ma‵losi atu i lō koe.+
2 A Ieova tou Atua ka tuku atu ne ia a latou ki a koe, kae ka fakatakavale ne koe latou.+ E ‵tau eiloa o fakaseai atu ne koe latou.+ E se ‵tau o fai feagaiga koe mo latou io me talia ne koe latou.+
3 E se ‵tau mo koe o avaga ki a latou. Sa tuku ne koe au tama fāfine ki olotou tama tāgata io me puke mai olotou tama fāfine ke a‵vaga mo au tama tāgata.+
4 Me ka ‵fuli kea‵tea ne latou au tama tāgata ke se tau‵tali mai i a au kae ke tavini atu ki nisi atua;+ kae ka fakaoko atu ne Ieova tena kaitaua ki a koutou, kae ta fakavave ne ia koe.+
5 “Kae tenei te mea e ‵tau o fai ne koutou ki a latou: Ofa ki lalo olotou fatafaitaulaga, tuki ki lalo olotou pou fatu tapu,+ ‵kati ki lalo olotou pou lakau tapu,*+ kae ‵sunu atu olotou tupua faite.+
6 Me i a koutou se fenua tapu ki a Ieova te otou Atua, kae ko oti ne filifili ne Ieova te otou Atua a koutou ke fai mo ana tino, ko ana tino fakapito,* mai tino katoa i luga i te lalolagi.+
7 “E se ko tena uiga me i a koutou ko toe tino tokouke eiloa ne ala ei o fakaasi atu ne Ieova tena alofa ki a koutou kae filifili ne ia koutou,+ me i a koutou ko te ‵toe fenua foliki eiloa i fenua katoa.+
8 Kae ona ko te alofa o Ieova mō koutou, kae ona foki ko te tausiga o tena tautoga telā ne tauto atu ki otou tupuga,+ ne aumai kea‵tea ei ne Ieova a koutou ki tena lima malosi, ke faka‵sao koutou mai te koga ne ‵nofo pologa koutou i ei,+ mai te malosi* o te Falao te tupu o Aikupito.
9 E iloa ‵lei ne koe me i a Ieova tou Atua ko te Atua tonu, ko te Atua fakamaoni, e tausi ki tena feagaiga kae alofa fakamaoni ki te fia afe o kautama o tino kolā e a‵lofa ki a ia kae tausi ki ana fakatonuga.+
10 Kae ko tino kolā e takalia‵lia ki a ia ka toe taui ne ia ki a latou kae fakaseai atu.+ Ka se tuai a ia i ana mea e fai ki tino kolā e takalia‵lia ki a ia. Ka avatu eiloa ne ia te taui ki a latou.
11 Tela la, fakalogo faka‵lei ki fakatonuga mo tulafono fo‵liki mo ikuga o fakamasinoga kolā e fakatonu atu ne au i te aso nei ke fakalogo koe ki ei.
12 “Kafai e tumau koutou i te faka‵logo ki ikuga o fakamasinoga konei kae tausi ne koutou kae tau‵tali i ei, ka tausi eiloa ne Ieova te otou Atua a te feagaiga mo te alofa fakamaoni telā ne tauto ei a ia ki otou tupuga.
13 Ka alofa a ia ki a koe kae fakamanuia koe kae fakatokouke ne ia koe. Ao, ka fakamanuia ne ia koe ki tama‵liki+ e tokouke e pelā foki mo fuataga o tou laukele, au fuaga saito, au uaina ‵fou, au sinu,+ ko tama a au pulumakau mo tama a au lafu mamoe, i te fenua telā ne tauto a ia ki ou tupuga ke tuku atu ki a koe.+
14 Ka fai koe mo fai te ‵toe tino manuia eiloa i tino katoa;+ e seai se tagata io me se fafine i a koutou ka seai sena tama, io me ko au lafu manu ke seai ne olotou tama.+
15 Ka ave kea‵tea ne Ieova mai i a koe a masaki katoa, kae ka se aumai ne ia ki a koe so se masaki matagā telā ne iloa ne koe i Aikupito.+ I lō te fai penā, ka avatu eiloa ne ia a mea konā ki tino katoa kolā e takalia‵lia ki a koe.
16 E ‵tau o fakaseai ne koe a fenua katoa kolā e tuku atu ne Ieova tou Atua ki a koe.+ E se ‵tau mo koe o alofa ki a latou,+ kae e se ‵tau mo koe o tavini atu ki olotou atua,+ me ka fai a te mea tenā e pelā me se malei ki a koe.+
17 “Kafai e fai aka koe i tou loto, ‘A fenua konei ko tokouke atu i a matou. E mafai pefea o afuli kea‵tea ne au latou?’+
18 e se ‵tau mo koe o mataku ki a latou.+ E ‵tau o fakamasaua ifo ne koe ki a koe eiloa a te mea ne fai ne Ieova tou Atua ki te Falao mo Aikupito kātoa,+
19 fakamasinoga ‵mafa* kolā ne lavea ne koe, mo fakailoga mo vavega+ mo te lima malosi kae mafi o Ieova tou Atua telā ne aumai ne ia koe kea‵tea.+ Tenā eiloa te mea ka fai ne Ieova tou Atua ki tino katoa kolā e mataku koe ki ei.+
20 A Ieova tou Atua ka avatu ne ia te loto vāivāi* ki a latou ke oko ki te taimi ko fakaseai atu ei a tino kolā ne ‵toe mai+ mo tino kolā ne ‵muni mai i a koe.
21 Ke mo a ma mataku koe ona ko latou, a Ieova tou Atua e fakatasi atu ki a koe,+ ko ia te Atua sili telā e ‵tau o mataku ki ei.+
22 “A Ieova tou Atua ka afuli malielie+ kea‵tea ne ia a fenua konei mai ou mua. Ka se talia eiloa ne ia ke fakaseai fakavave atu ne koe latou, ko te mea ke se gasolo o tokouke a manu fe‵kai o te fenua kae fakalavelave atu ei ki a koe.
23 A Ieova tou Atua ka tuku atu ne ia latou ki a koe kae fakatakavale katoatoa atu ke oko ki te taimi ka ‵ta fakapalele atu ei latou.+
24 Ka tuku atu ne ia olotou tupu ki ou lima,+ kae ka ‵solo kea‵tea ne koe olotou igoa mai lalo o te lagi.+ Ka seai se tino e tu o ‵teke atu ki a koe,+ ke oko ki te taimi ka fakaseai atu ei latou.+
25 E ‵tau o ‵sunu ne koutou ki te afi a fakatusa o olotou atua.+ Sa ma‵nako ki siliva mo aulo a latou io me puke a mea konā ma koe,+ ko te mea ke se maleigina koe ne mea konā, me i te mea tenā se mea fakatakalialia ki a Ieova tou Atua.+
26 E se ‵tau mo koe o aumai se mea fakatakalialia ki tou fale ko fai ei koe e pelā me se mea e ‵tau o fakamaseigina e pelā mo te mea tenā. E ‵tau o takalialia malosi koe ki ei kae ita foki ki ei, me se mea ko ‵tau o fakamaseigina.
Fakamatalaga mai lalo
^ Io me “kope tāua.”
^ Epelu, “lima.”
^ Io me “tofotofoga.”
^ Io me kāti, “pole‵pole, ma‵taku.”
