Ne oko atu a Iesu mo ana soko ki Petesaita. Ne avatu ne tino se tagata ‵kivi ki a ia kae akai atu latou ke puke atu a ia o faka‵lei aka te tagata tenā.

Ne puke atu a Iesu ki tena lima kae ne ‵taki atu ne ia ki tua o te fa‵kai. I te otiga ne puaki atu ki ana mata, ne fesili atu a Iesu ki a ia: “E isi sau mea e lavea?” Ne tali atu te tagata: “E lavea ne au a tino, kae e foliga mai e pelā me ne lakau e oloolo sāle.” (Maleko 8:23, 24) A te fakapatele atu o ana lima ki mata o te tagata tenā, ne faka‵kite i ei ne Iesu ana mata. Telā ne uga atu ei ne ia te tagata telā ko mafai nei o lavea faka‵lei ne ia a mea, ke toe foki ki tena fale kae fakatonu atu ke mo a ma ulu atu ki loto i te fa‵kai.

I konā loa, ne toe faima‵laga atu a Iesu mo ana soko ki feitu ki matū o kogā koga o Kaisaleia Filipi. E tai ‵mao eiloa te auala ne ‵kake ei ki luga, kāti se 25 maila. E nofo loa ki te 1,150 futu te maluga o te fa‵kai mai luga i te tai fakatasi mo te Mauga o Helemoni, telā e fanaka ki te feitu ki matū-saegala mo kiona i tena taulu. Kāti ne fakamāumāu a nai aso i te faiga o te malaga tenā.

I te faigā malaga tenā, ne fanatu tokotasi keatea a Iesu o ‵talo. Ko toe iva io me e sefulu masina a koi tuai o mate a Iesu, kae ne manavase tou tagata ki ana soko. Ne fatoa tiakina a ia ne tino e tokouke, kae e foliga mai me ko ‵segi kae fanoa‵noa a nisi tino. Kāti e fia iloa ne latou a te pogai ne ‵teke atu a ia ki taumafaiga a tino ke fai a ia mo fai te tupu, io me ko te pogai ne seki tuku atu ne ia se fakailoga ke fakaasi atu me ko oi tonu eiloa a ia.

I te okoatuga o soko ki te koga ne ‵talo ei a ia, ne fesili atu a Iesu: “Ne a muna a tino me ko oi te Tama a te tagata?” Ne tali atu latou: “E fai mai a nisi tino me ko Ioane te Papatiso, kae ko nisi tino ko Elia, kae e fai mai foki a nisi tino me ko Ielemia io me se tokotasi o pelofeta.” E tonu, ne ma‵natu aka a tino me i a Iesu se tino e tokotasi mai i tāgata konā, telā ne toe fakatu aka. Ke iloa aka olotou mafaufauga, ne fesili atu a Iesu ki ana soko: “Kae ko koutou la, se a te otou mau me ko oi au?” Se mea vave o tali atu a Petelu: “A koe ko te Keliso, ko te Tama a te Atua ola.”—Mataio 16:13-16.

Ne fai atu a Iesu me e mafai o fiafia a Petelu ona ko te mea ne fakaasi atu ne te Atua te mea tenei ki a ia, kae toe fai atu: “A koe ko Petelu, kae i luga i te papa tenei ka fakatu ne au i ei taku fakapotopotoga, kae ka se mafai o fakatakavale a te fakapotopotoga tenā ne te Tānuga.” Ne fakauiga a Iesu me ka fakatu aka ne ia se fakapotopotoga kae ka se mafai eiloa ne te Tanuga o taofi fakapagota ana tino māfai e tumau latou i te lotou olaga fakamaoni i te lalolagi nei. Ne tauto atu a ia ki a Petelu: “Ka tuku atu ne au ki a koe a kī o te Malo o te lagi.”—Mataio 16:18, 19.

Ne seki tuku atu ne Iesu a te tulaga muamua ki a Petelu i te kau apositolo, kae e seki fai foki a ia mo fai te fakavae o te fakapotopotoga. A Iesu ko te Papa telā ka fakatu aka i ei te fakapotopotoga. (1 Kolinito 3:11; Efeso 2:20) Kae ne maua ne Petelu a kī e tolu. Ka maua ne ia a te tauliaga ke ‵tala mai i ei te avanoaga ke ulu atu a potukau o tino ki te Malo o te lagi.

Ne fakaaoga ne Petelu a te kī muamua i te Penitekoso  33 T.A., ke fakaasi atu ei ki tino Iutaia mo tino mai fenua fakaa‵tea kolā ne ‵fuli ki te lotu Iutaia kae ko maua ne latou te loto salamō, a mea kolā e ‵tau o fai ne latou ke fakaolagina latou. Ne fakaaoga ne ia te lua o kī ke ‵tala aka ei te avanoaga mō tino Samalia kolā ne tali‵tonu ke ulu atu ki te Malo o te Atua. Kae i te 36 T.A. ne fakaaoga ei ne Petelu a te tolu o kī ke fakaoko atu foki te avanoaga tenā ki tino sē pilitome mai Fenua Fakaa‵tea, ko Konelio mo nisi tino.—Galuega 2:37, 38; 8:14-17; 10:44-48.

I te faiga o te sau‵talaga tenei, ne manava‵se a apositolo o Iesu i te taimi ne ‵valo mai ei ne ia ana logo‵maega mo te mate telā ko pili o fepaki mo ia i Ielusalema. Ona ko te sē maina i a Iesu ka toe fakatu aka ki te ola faka-te-lagi, ne ‵taki atu keatea ne Petelu a Iesu kae ‵liko atu ki a ia, ana muna: “Ke alofa koe ki a koe eiloa, e te Aliki; ke mo a eiloa ma tupu te mea tenei ki a koe.” Ne fulitua Iesu ki a ia, kae tali atu: “Fano keatea mai i a au, e Satani! Ko fai koe mo fai se fakalavelave ki a au, me i a koe e se mafaufau e pelā mo te Atua kae e pelā mo tāgata.”—Mataio 16:22, 23.

Ko kalaga atu nei a Iesu ki nisi tino i tafa o ana apositolo kae fakamatala atu ne ia me ka se faigofie a te fai mo fai sena soko. Ana muna: “So se tino e fia tautali mai i a au, ke se toe mafaufau ki a ia eiloa, kae ke amo tena lakau fakasaua kae tumau i te tautali mai i a au. Me ko so se tino e manako o fakasao tena ola, ka se maua ne ia kae ko so se tino e galo tena ola ona ko au mo te tala ‵lei ka maua ne ia.”—Maleko 8:34, 35.

E tonu, e ‵tau o loto ‵toa a soko o Iesu kae fakaasi atu te alofa sē fakapito, ko te mea ke fiafia atu a Iesu ki a latou. Ne fai atu a Iesu: “Me ko so se tino telā e mā i a au mo aku pati i te kautama mulilua kae agasala tenei, ka mā foki a te Tama a te tagata i a ia i te taimi e vau ei a ia i te ‵malu o tena Tamana fakatasi mo ana agelu tapu.” (Maleko 8:38) Ao, kafai ko vau a Iesu, “ka toe taui atu ne ia ki tino taki tokotasi e ‵tusa mo olotou faifaiga.”—Mataio 16:27.