E SE faipati ‵soko mai te Tusi Tapu e uiga ki te agelu telā e igoa ki a Mikaele. Kae kafai e fakasino atu te Tusi Tapu ki a ia, e isi faeloa ne ana mea e fai. I te tusi ko Tanielu, e taua atu a Mikaele ki agelu ma‵sei; i te tusi ko Iuta, e kinau a ia mo Satani; kae i te Fakaasiga, e taua atu a ia ki te Tiapolo mo ana temoni. Mai te ‵lago atu ki te pulega a Ieova kae taua atu ki fili o te Atua, e fetaui ‵lei a amioga a Mikaele mo te uiga o tena igoa—“Ko oi e Pelā mo te Atua?” Kae ko oi la a Mikaele?

I nisi taimi, e uke a igoa o tino taki tokotasi. E pelā mo Iakopo ne fakaigoa ki a Isalaelu, mo te apositolo ko Petelu, ne fakaigoa foki ki a Simona. (Kenese 49:1, 2; Mataio 10:2) E fakaasi mai foki i te Tusi Tapu me i a Mikaele ko te suā igoa o Iesu Keliso, i te taimi ne nofo atu ei a ia i te lagi mo te taimi ne toe foki atu ei a ia ki ei mai tua o tena nofoga i te lalolagi nei. Ke na onoono nei tatou ki fakamatalaga i te Tusi Tapu kolā e fakamaoni mai i ei te manatu tenā.

Te Agelu Pule. E fakasino atu te Muna a te Atua ki a Mikaele e pelā me ko “te agelu pule.” (Iuta 9) Onoono la me e taku a Mikaele ki te agelu pule. E fakamaoni mai i ei me e tokotasi fua te vaegā agelu penā. A te ‵tonuga loa, a te tugāpati ko te “agelu pule” e fakasino sāle atu fua i te Tusi Tapu ki se agelu e tokotasi, kae e se ki agelu e tokouke. E se gata i ei, e fetaui ‵lei te tulaga o Iesu mo te tulaga o te agelu pule. E fai mai te 1 Tesalonia 4:16 e uiga ki a Iesu i te taimi ko oti ne toetu aka ei a ia, penei: “Ko te Aliki eiloa e vau mai te lagi mo tena leo e kalaga sāle o fakatonu,  mo te leo foki o te agelu pule.” Kae e fakaasi mai me i te leo o Iesu e fai pelā mo te leo o te agelu pule. Tela la, e fakaasi mai i te tusi siki tenei me i a Iesu ko Mikaele, te agelu pule.

Te Takitaki Kautau. E fakaasi mai i te Tusi Tapu me i a “Mikaele mo ana agelu ne taua mo te talako mo ana agelu.” (Fakaasiga 12:7) Tela la, a Mikaele ko te Takitaki o se kautau o agelu fakamaoni. E fakaasi mai foki i te Fakaasiga me i a Iesu ko te Takitaki o se kautau o agelu fakamaoni. (Fakaasiga 19:14-16) Kae ne faipati mai foki te apositolo ko Paulo e uiga ki “te Aliki ko Iesu . . . mo ana agelu ‵malu.” (2 Tesalonia 1:7) Tela la, e faipati te Tusi Tapu e uiga ki a Mikaele mo “ana agelu” mo Iesu mo “ana agelu.” (Mataio 13:41; 16:27; 24:31; 1 Petelu 3:22) Ona ko te mea e se fakaasi mai i te Muna a te Atua me e lua a kautau o agelu fakamaoni i te lagi—e tasi e takitaki ne Mikaele kae e tasi e takitaki ne Iesu—se mea ‵lei ke fakaiku aka ne tatou me i a Mikaele ko Iesu Keliso eiloa i tena ‵malu faka-te-lagi. *