Kafai e fia fai koe mo taugasoa o te Atua, e ‵tau o fai ne koe te lotu telā e talia ne te Atua. Ne fai mai a Iesu me i a “latou kolā e tapuaki fakamaoni,” ka tapuaki atu ki te Atua e tusa loa mo te “munatonu.” (Ioane 4:23, 24, NW) E tasi ‵pau eiloa te auala e ‵tau ei o tapuaki atu ki te Atua. (Efeso 4:4-6) E tau atu te lotu tonu ki te ola se-gata-mai, kae e tau atu a lotu ‵se ki te fakaseaiga.—Mataio 7:13, 14.

E mafai ne koe o iloa te lotu tonu mai i te kilokilo atu ki tino kolā e ‵lotu i ei. Me i a Ieova e ‵lei, ana tino tapuaki ‵tonu e ‵tau foki o fai mo fai ne tino ‵lei. E pelā mo te lakau ko te mei telā e ‵lei e fua mai ne ia a fuāmei ‵lei, e ‵tau foki o maua a tino ‵lei i te lotu tonu.—Mataio 7:15-20.

E āva malosi a taugasoa o Ieova ki te Tusi Tapu. E iloa ne latou me ne maua te Tusi Tapu mai te Atua. E talia ne latou a muna i ei ke takitaki mai ki olotou olaga, ke faka‵lei aka olotou fakalavelave, kae ke fesoasoani mai foki ki a latou ke tau‵loto e uiga ki te Atua. (2 Timoteo 3:16) E taumafai eiloa latou ke amio e ‵tusa mo mea kolā e talai atu ne latou.

 E fakatau fakaasi atu te alofa ne taugasoa o Ieova. Ne fakaasi atu ne Iesu tena alofa ki tino i te akoako atu ki a latou e uiga ki te Atua, mo te faka‵leiga ne ia o olotou ma‵saki. E ‵tau foki mo tino kolā e ‵lotu i te lotu tonu o fakaasi atu te alofa ki nisi tino. E pelā mo Iesu, e se ti ma‵natu fātauvā latou ki tino ma‵tiva io me ko tino kolā e ‵kese olotou fenua. Ne fai atu a Iesu me ka iloa ne tino ana soko mai i te alofa telā e fakaasi atu ne latou, te suā tino ki te suā tino.—Ioane 13:35.

E fakaaloalo atu a taugasoa o te Atua ki te igoa o te Atua, ko Ieova. Kafai e ita fitifiti se tino ma fakaaogā ne ia tou igoa, e mata, ka fai te tino tenā mo fai sou taugasoa pele? Ikai! Kafai e isi se ‵tou taugasoa, e taku sāle atu ne tatou tena igoa, kae e fai atu ne tatou a tala ‵lei e uiga ki te taugasoa tenā ki nisi tino. Tela la, e ‵tau mo tino kolā e fia fai mo taugasoa o te Atua o fakaaogā tena igoa kae ke fai atu foki ki nisi tino a tala e uiga ki a Ia. E manako a Ieova ke fai tatou penā.—Mataio 6:9; Loma 10:13, 14.

E pelā mo Iesu, e akoako atu a taugasoa o te Atua ki nisi tino e uiga ki te Malo o te Atua. A te Malo o te Atua ko te pulega faka-te-lagi telā ka fai ne ia te lalolagi mo fai se palataiso. E taku atu ne taugasoa o te Atua ki nisi tino a te tala ‵lei tenā e uiga ki te Malo o te Atua.—Mataio 24:14.

E taumafai a Molimau a Ieova ke fai mo fai ne taugasoa o te Atua. E āva latou ki te Tusi Tapu kae e fakatau fakaasi atu ne latou te alofa i a latou eiloa. E fakaaogā kae fakaaloalo atu foki latou ki te igoa o te Atua kae e akoako atu latou ki nisi tino e uiga ki te Malo o te Atua. E fai ne Molimau a Ieova te lotu tonu i te lalolagi i aso nei.