IMATAUPU e lua mai mua atu, e tokofia a tino ne toe‵tu kolā ne fai‵tau tatou ki ei?— E tokolima. E tokofia tama‵liki?— Tokotolu. Kae ko te tokofa se tamataene. Se a tau faka‵tau ki te mea e fakaasi mai i te mea tenei?—

Ia, e fakaasi mai i ei me e alofa te Atua ki tamaliki. Kae ka faka‵tu aka ne ia a nisi tino foki e tokouke. E mata, ka faka‵tu aka fua ne te Atua a latou kolā ne fai ne latou a mea ‵lei?— Kāti la e mafau‵fau tatou penā. Kae ne seki tauloto ne tino e tokouke a te munatonu e uiga ki a Ieova te Atua mo tena Tama. Tela la, ne fai ne latou a mea ma‵sei ona ko te mea ne akoako atu ki a latou a mea ‵se. Se a tau faka‵tau me faka‵tu mai ne Ieova a vaegā tino penā?—

E fai mai te Tusi Tapu: “Ka toe‵tu mai a tino amio‵tonu mo tino amio sē ‵tonu.” (Galuega 24:15) Kaia ka toe‵tu aka ei a tino amio sē ‵tonu, io me ko latou kolā ne seki fai ne latou te mea tonu?— Ona ko te mea ne seki maua ne latou se avanoaga ke tauloto e uiga ki a Ieova mo mea e manako a ia ke fai ne tino.

 Se a tau faka‵tau me ka faka‵tu aka māfea a tino?— Mafaufau ki te taimi ne mate ei a Lasalo kae tauto atu a Iesu ki tena tuagane ko Maleta: “Ka toetu mai tou tuagane.” Ne tali atu a Maleta: “E iloa ne au me ka toetu mai a ia i te toe‵tuga i te aso fakaoti.” (Ioane 11:23, 24) Se a te mea e fakauiga ki ei a Maleta i te taimi ne fai atu ei a ia me ka toetu aka a Lasalo i “te aso fakaoti”?—

Ia, ko oti ne lagona ne Maleta a te folafolaga a Iesu: ‘A tino katoa i tanuga ka ulu mai ki tua.’ (Ioane 5:28, 29) Tela la, a “te aso fakaoti” ko te taimi telā ka toe‵tu mai ei a tino katoa kolā e masaua ne te Atua. A te aso tenei e sē se aso telā e 24 itula. E ‵tusa loa mo te afe tausaga te leva. I te aso tenei, e fai mai te Tusi Tapu, ‘Ka fakamasino ne te Atua a tino o te lalolagi.’—Galuega 17:31; 2 Petelu 3:8.

Mafaufau ki te gali o te aso tenei! I loto i te afe tausaga kātoa tenei, ka toe‵tu mai a te fia miliona o tino e tokouke kolā ko oti ne ‵mate. E taku ne Iesu ki te Palataiso a te koga telā ka toe‵tu aka latou ke ‵nofo i ei. Ke onoono aka tatou me ka tu i fea a te Palataiso kae ka pefea foki te olaga i ei.

E nofo pelā ki se tolu itula mai mua o mate a Iesu i luga i se lakau fakasaua, ne faipati ei a ia e uiga ki te Palataiso ki se tagata ne tautau i luga i se lakau i ana tafa. Ka tamate eiloa te tagata mō ana amioga solitulafono ne fai. Kae i te taimi ne kilokilo atu ei a te tagata solitulafono tenei ki a Iesu kae lagona ne ia a pati ne fai atu e uiga ki a Ia, ne kamata o talitonu tou tagata ki a Iesu. Tela la, ne fai atu te tagata solitulafono:  “Masaua mai au māfai e oko koe ki tou Malo.” Ne tali atu a Iesu: “Au e fai ‵tonu atu ki a koe i te aso nei, ka ‵nofo fakatasi eiloa tāua i te Palataiso.”—Luka 23:42, 43.

Se a te mea ne fakauiga ki ei a Iesu i ana pati konei? Tefea te Palataiso?— Mafaufau e uiga ki ei. Tefea te koga ne tu muamua i ei a te Palataiso?— Masaua, ne tuku atu ne te Atua ki te tagata muamua, ko Atamu, mo tena avaga se palataiso ke ‵nofo i ei i te lalolagi eiloa tenei. Ne fakaigoa ki te fatoaga o Etena. E isi ne manu i te fatoaga tenā, kae ne seki fakalogo‵mae atu latou ki se tino. Kae e isi ne lakau i ei mo fuataga gali ‵ki e uke, e pelā foki mo se vaitafe lasi. Ne fai eiloa mo fai se koga tafasili i te gali ke ‵nofo i ei!—Kenese 2:8-10.

Tela la, kafai e fai‵tau tatou e uiga ki te tagata solitulafono tenā ka nofo atu i te Palataiso, e ‵tau o fakaataata ne tatou i ‵tou mafaufau a te lalolagi tenei ka fai mo fai se koga gali ke ‵nofo i ei. E mata, ka nofo mai eiloa a Iesu i te lalolagi nei fakatasi mo te tagata solitulafono i te Palataiso?— Ikai. E iloa ne koe me kaia ka se nofo atu ei a ia i konā?—

Ona ko te mea ka pule mai a Iesu i te lagi e pelā me ko te Tupu ki luga i te Palataiso i te lalolagi nei. Tela la, ka ‵nofo fakatasi a Iesu mo te tagata tenā i te auala tenei me ka fakatu aka ne Iesu a ia mai te mate kae tausi atu ki ana manakoga. Kae kaia ka talia ei ne Iesu se tino amio solitulafono muamua ke nofo i te Palataiso?— Ke onoono aka tatou me e mafai o malamalama tatou i te pogai.

 A koi tuai o faipati atu te tagata solitulafono ki a Iesu, e mata, ne iloa ne ia a fuafuaga a te Atua?— Ikai, e seki iloa ne ia. Ne fai ne ia a mea ma‵sei ona ko te mea ne seki iloa ne ia te munatonu e uiga ki te Atua. I te Palataiso, ka akoakogina a ia e uiga ki fuafuaga a te Atua. Ko maua ei ne ia a te avanoaga ke fakamaoni aka me e alofa tonu a ia ki te Atua mai i te faiga o Tena loto.

E mata, ka ‵nofo atu i te Palataiso i te lalolagi nei a tino katoa kolā ka toe‵tu?— Ikai. E iloa ne koe me se a te pogai?— Ona ko te mea ka toe‵tu aka a nisi tino ke ‵nofo fakatasi mo Iesu i te lagi. Ka pule latou fakatasi mo ia e pelā me ne tupu ki luga i te lalolagi Palataiso. Ke onoono aka tatou ki pogai e tali‵tonu ei tatou ki te mea tenei.

I te po mai mua o mate a Iesu, ne fai atu a ia ki ana apositolo: ‘E uke a koga e mafai o ‵nofo i ei i te fale o toku Tamana kae ka fano au o fakatoka se koga mō koutou.’ Telā ne tauto atu ei a Iesu ki a latou: “Ka toe  foki mai au o puke koutou, ko te mea ke ‵nofo foki koutou i te koga telā e nofo au i ei.”—Ioane 14:2, 3.

Tefea te koga ne fanatu ki ei a Iesu mai tua o tena toetuga?— Ao, ne toe foki atu a ia ki te lagi ke ‵nofo fakatasi mo tena Tamana. (Ioane 17:4, 5) Tela la, ne tauto atu a Iesu ki ana apositolo mo nisi soko me ka toe faka‵tu aka ne ia latou ko te mea ke mafai o ‵nofo fakatasi latou i te lagi. Ne a mea ka fai ne latou i konā fakatasi mo Iesu?— E fai mai te Tusi Tapu me i ana soko kolā ka aofia i “te toe‵tuga muamua” ka ‵nofo atu i te lagi kae pule ifo ki luga i te lalolagi e pelā me ne “tupu fakatasi mo ia i te 1,000 tausaga.”—Fakaasiga 5:10; 20:6; 2 Timoteo 2:12.

E tokofia ka aofia i “te toe‵tuga muamua” kae pule fakatasi mo Iesu e pelā me ne tupu?— Ne fai atu a Iesu ki ana soko: “Sa ma‵taku e taku mamoe foliki, me ko oti ne talia ne te otou Tamana ke tuku atu ki a koutou a te Malo.” (Luka 12:32) A te “lafu mamoe foliki” tenei, kolā ka toe‵tu aka ke ‵nofo fakatasi mo Iesu i tena Malo faka-te-lagi, se aofaki mautinoa. E fakaasi mai ne te Tusi Tapu me e toko “144,000” ka toe‵tu aka mai te lalolagi.—Fakaasiga 14:1, 3.

E tokofia ka ‵nofo i te Palataiso i te lalolagi nei?— E se fai mai i te Tusi Tapu. Ne fai atu te Atua ki a Atamu mo Eva ke fai lā tama‵liki kae faka‵fonu ki ei te lalolagi i te taimi ne ‵nofo atu ei lāua i te fatoaga o Etena. E tonu, ne fakata‵mala lāua o fai te mea tenā. Kae ne fakamautinoa aka ne te Atua me e fakataunu eiloa tena fuafuaga ke faka‵fonu te lalolagi ki tino ‵lei.—Kenese 1:28; Isaia 45:18; 55:11.

Mafaufau ki te gali ka maua ne tatou māfai ko ‵nofo atu i te Palataiso! Ka fai eiloa te lalolagi kātoa mo fai se malae tafao. Ka maua atu i ei a manu eva mo nisi manu mo lakau mo pulalakau ‵gali valevale. Ka se toe ai se tino e logo‵mae ona ko te masaki, io me ka toe mate se tino. A tino katoa ka fai mo taugasoa o tino katoa. Kafai e fia ola tatou i te Palataiso, tenei eiloa te taimi ke fakatokatoka faka‵lei ki ei.