Wɔbɔɔ Irina Zakharchenko ne Valida Jabrayilova sobo sɛ wɔkyekyɛ nyamesom nhoma bere a Aban no mmaa wɔn kwan. Enti Aban no tiatiaa wɔn fahodi so de wɔn guu afiase abosome 11. Wɔ February 2017 no, Azerbaijan Asɛnnibea Kunini no de too gua sɛ sobo a wɔbɔɔ mmaa mmienu no nni nnyinaso, enti wɔatwa asɛm no mu. Nanso sɛ wɔbɛpata wɔn oo, wɔrempata wɔn oo, asɛnnibea nkumaa no nhwɛ nsi ho gyinae. Asɛnnibea kumaa bi a ɛwɔ Azerbaijan sii gyinae sɛ wontua mpata sika mma Irina Zakharchenko ne Valida Jabrayilova. Wɔ April 16, 2018 no, Azerbaijan Asɛnnibea Kunini no nso gye toom sɛ ɛsɛ sɛ wotua mpata sika ma wɔn.

Bere a wotwaa sobo a wɔde bɔɔ wɔn no nyinaa mu no, Ms. Zakharchenko ne Ms. Jabrayilova a wɔyɛ Yehowa Adansefo no de asɛm no kɔɔ kɔɔto sɛ wɔnhwɛ mma atumfoɔ no mpata wɔn esiane ateetee a wɔde wɔn afa mu nti. Wei nti wɔ August 2017 no, ɔmansin kɔɔto bi de too gua sɛ wontua mpata sika mma mmaa mmienu no, nanso ɔman no Asoɛe a Ɛhwɛ Sikasɛm So no kaa sɛ ɔmpene gyinaesi a ɛte saa so enti ɔbɛyɛ appeal. Wɔ November 2017 mu no, appeal kɔɔto no dii asɛm no tiaa ɔman no Asoɛe a Ɛhwɛ Sikasɛm So no, na wogyee gyinae a ɔmansin kɔɔto no sii toom. Nanso ɔman no Asoɛe a Ɛhwɛ Sikasɛm So no bo anwo asɛm no so koraa na ɛsan de asɛm no kɔdan Asɛnnibea Kunini no wɔ February 2018 sɛ wɔmmɔ appeal kɔɔto no gyinaesi no ngu. Nanso Asɛnnibea Kunini no ampene so, na ɛkaa sɛ gyinae a appeal kɔɔto no sii no yɛ ne kwan so, enti wontua mpata sika mma mmaa mmienu no.

Mpata sika a wobetua ama Ms. Zakharchenko ne Ms. Jabrayilova akyi no, Asɛnnibea Kunini no san gye toom sɛ atumfoɔ no yɛɛ ade traa so teetee mmaa mmienu a wɔn ho nni asɛm yi tiatiaa wɔn fahodi so.