Kwasida anwummere, September 30, 2018 no, ahum bi a wɔfrɛ no Trami tui wɔ Japan anafo fam. Na mframa no ano yɛ den pa ara na ɛmaa osu nso tɔɔ denneennen. Ahum no de n’ani kyerɛɛ atifi fam, na eduu Dwoda October 1 no, na adu Tokyo. Eduu hɔ no na ano abrɛ ase kakra. Nnipa mmiɛnsa wui, 200 nso pirapirae na afie bɛboro ɔpepem 1 mpem 300 na ɛsɛe wɔn anyinam ahoɔden.

Amanneɛbɔ a efi amansin so ahwɛfo hɔ kyerɛ sɛ baabi a ɛhɔ sɛee pa ara ne Okinawa Supɔw no so; ɛwɔ Japan anafo fam. Nhwehwɛmu a wodii kan yɛe wɔ amansin mmiɛnsa a ɛwɔ Okinawa no kyerɛ sɛ yɛn nuanom no biara anwu nanso wɔn mu nkron pirapirae. Ahum no sɛee anuanom afie 120 ne Ahenni Asa 5 wɔ Okinawa Supɔw no so. Ahum no bɔ faa Japan mmeae ahorow enti ɛmaa Ahenni Asa 41 nso sɛee kakra.

Amansin so ahwɛfo ne anuanom a wɔyɛ adwuma wɔ Adansi Dwumadibea no gu so reyɛ nhwehwɛmu ahu sɛnea ahum no aka anuanom na wɔahu mmoa ne Kyerɛwnsɛm mu awerɛkyekye a wobehia.

Anuanom a ahum yi ne atoyerɛnkyɛm afoforo a asisi wɔ Japan ama wɔn ho aka no, yɛkae wɔn daa wɔ yɛn mpaebɔ mu. Yɛwɔ awerɛhyem sɛ yɛn soro Agya no bɛkɔ so akyekye wɔn werɛ na wama wɔagyina pintinn.—2 Tesalonikafo 2:17.