June 26, 2018 no, mpanyimfo bi a wɔwɔ Thailand Aban Nanmusifo dwumadibea a ɛwɔ Peru kɔsraa Yehowa Adansefo adwumayɛbea a ɛwɔ Peru ahenkurow Lima. Adansefo no reboa Thailandfo a wɔakyere wɔn agu afiase wɔ Peru no. Enti mpanyimfo yi kɔɔ hɔ sɛ wɔrekɔda yɛn nuanom no ase.

Afe 2007 mu hɔ na Yehowa Adansefo a wɔwɔ Peru fii ase de Bible no kyerɛkyerɛɛ nneduafo a wɔwɔ Peru afiase. Efi afe 2013 reba no, afiase baako a wɔkɔ de, na Thailandfo nso wɔ hɔ. Ɔdɔ a na Adansefo no yi no adi kyerɛ wɔn a wogu afiase no kaa aban nanmusifo abadiakyiri no koma ma enti ɔne ɛhɔ Betel no dii nkitaho sɛ wɔpɛ sɛ wɔbɛsra wɔn.

Mpanyimfo a wɔkɔsraa Betel no bi ne aban nanmusifo panyin Owura Angkura Kulvanij, ɔkyerɛwfo panyin Owura Pathompong Singthong, ne ɔkyerɛwfo abadiakyiri Awuraa Pradthana Pongudom. Peru Baa Dwumadibea Boayikuw mufo na wɔde mpanyimfo no kyinkyinii Betel hɔ. Nsrahwɛ no maa mpanyimfo no huu dwumasono a anuanom reyɛ de akyerɛ nhoma ahorow ase akɔ kasa afoforo mu; kurom hɔfo kasa ahorow nkron nso ka ho.

Ɔsom a obi wom anaa amammerɛ biara okura mu no, sɛ Adansefo a wɔwɔ Peru reyɛ ahiafo ne wɔn a wɔn asɛm yɛ mmɔbɔ mmoa a, wɔma ebi so wɔn so. Wei nti Thailand Aban Nanmusifo Dwumadibea no akyerɛw krataa kɔ baa dwumadibea hɔ de “akyerɛ ho anisɔ.” Wɔsan nso kamfoo “Yehowa Adansefo baa dwumadibea a ɛwɔ Peru no sɛ wɔreboa ama Thailand nneduafo no haw so atew na wɔn asetena atu mpɔn.”

Yɛn nuanom a wɔwɔ Peru suahu yi ma yehu sɛ, sɛ yɛkɔ so ka asɛmpa a ɛwɔ Bible mu no kyerɛ nnipa ahorow nyinaa a, etumi sow aba pa.—1 Korintofo 9:22.