Nsɛnkyerɛwfo a wofi aman pii so abɔ amanneɛ sɛ bere a Russia aban mpanyimfo kɔhwehwɛɛ nkurɔfo afie mu wɔ Kirov mantam mu no, wokohuu nneɛma bi a wɔkyerɛ sɛ ɛyɛ “akode,” na wɔkaa sɛ ɛyɛ Yehowa Adansefo dea. Nanso ofie a wɔkyerɛ sɛ wohuu “akode” wom no, ɛnyɛ Yehowa Danseni biara dea. Na nneɛma a wɔkyerɛ sɛ ɛyɛ “akode” no yɛ nneɛma dedaw bi a awe awu a wɔde dii ako wɔ Wiase Ko II no mu. Ná ɛyɛ topae nketewa mmienu a wɔde nsa tow ne topae baako a wɔde hyɛ fam. Ofiewura no yere na ɔyɛ Yehowa Danseni, na na onnim mpo sɛ ne kunu wɔ nneɛma bi a ɛte saa wɔ fie hɔ.

Nneɛma no wura no, bere bi na ɔka Russiafo kuw bi a agye din a wɔfrɛ no “Poisk” ho. Ná wɔn adwuma ne sɛ wɔhwehwɛ asraafo a wokunkum wɔn wɔ Wiase Ko II no amu sɛnea ɛbɛyɛ a wobetumi asie wɔn yiye. Mpɛn pii no sɛ wɔreyɛ saa adwuma no a, na wɔtaa nya tete nneɛma a wɔde dii ako te sɛ akode ahorow a nnɛ wɔmfa nni dwuma bio no.

Yehowa Adansefo yɛ nnipa a wɔpɛ asomdwoe pa ara, nanso Russia aban mpanyimfo rebɔ mmɔden biara sɛ wɔnam atosɛm so bɛsɛe din pa a wɔwɔ no. Wei ma yɛkae asɛm a Yesu kae yi. Ɔkaa sɛ asɔretiafo ‘bedi atoro aka asɛmmɔne biara ato’ n’asuafo no so.—Mateo 5:11.