Wɔabɔ Dennis Christensen sobo sɛ ɔyɛ nsɛmmɔnedifo. Enti wofii ase dii n’asɛm February 26, 2018 wɔ Zheleznodorozhniy Ɔmantam Asɛnnibea a ɛwɔ Oryol no. Owura Christensen akyitaafo pii baa asɛnnibea hɔ. Denmark aban no nanmusini a ɔwɔ Moscow, Jeanne Christina Demirci nso twaa kwan fii Moscow baa Oryol betiee asɛm no bi. Bere a Ɔtemmufo Aleksey Rudnev tenaa asɛm no so no, edii dɔnhwerew baako pɛ. Asɛm a na kwaadubɔfo no de abɛto asɛnnibea no anim no, Owura Christensen ne ne mmaranimfo no srɛe sɛ wɔmma wɔn bere kakra na wɔmfa nhwɛ ɛho nkrataa no mu. Ɔtemmufo no penee so ma wɔyɛɛ saa. Ansa na wɔrebefi ase adi asɛm no, na Sovetskiy Ɔmantam Asɛnnibea no atiatia Owura Christensen fahodi so pa ara; kwaadubɔfo no nsɛm a ɛyɛ nkratafa 2,500 a ɛwɔ Russia kasa mu no, wɔmaa no nnawɔtwe mmienu pɛ sɛ ɔmfa nhwɛ mu. Ɔtemmufo Rudnev tuu asɛm no hyɛɛ da sɛ wɔbɛsan atena so April 3, 2018, anɔpa 10:30. Yɛrekasa yi, Owura Christensen da so ara da afiase a wonsii no pi sɛ wɔredi n’asɛm.