NEW YORK​—December 2017 no, Sestroretskiy Ɔmansin Kɔɔto no sii gyinae sɛ Russia aban no begye Yehowa Adansefo kan adwumayɛbea ti a ɛwɔ Russia no. Nanso Adansefo no ampene so na wɔyɛɛ appeal. Yawda, May 3, 2018 no, Saint Petersburg Kuropɔn Kɔɔto no bɛsan atena asɛm no so. Sɛ wodi asɛm no tia Adansefo no a, wɔn adan 14 a ɛwɔ faako no, Ɔman no betumi agye a wɔntwentwɛn so koraa. Baabi a adan no wɔ no, ne kɛse bɛyɛ ahama 25 (25 acres) na sɛ wɔretwa bo ato so a ɛbɛyɛ dɔla ɔpepem 31.8 anaa rubles ɔpepepem 2 (Russiafo sika a wodi na wɔfrɛ no rubles).

Bere a Sestroretskiy Ɔmansin Kɔɔto no dii asɛm no bere a edi kan wɔ December 2017 no, adanse a ɛkyerɛ sɛ Adansefo no adan (adwumayɛbea ti) no yɛ Watch Tower Bible and Tract Society of Pennsylvania (WTPA) dea no, kɔɔto no annye antom. WTPA yi yɛ adwumakuw bi a ɛwɔ United States na wɔmfa adwuma a wɔyɛ no mpɛ mfaso. Afe 2000 mu no, Yehowa Adansefo a wɔwɔ Russia yɛɛ adan no ho nkrataa wɔ WTPA din mu, na wɔde hyɛɛ mmara ase. Efi saa bere no, WTPA atua adan no ho tow bɛyɛ dɔla ɔpepem 3 ama Russia Man no. Bɛboro mfe 17 ni na Russia aban no agye atom sɛ wɔyɛɛ adan no ho nkrataa wɔ mmara kwan so ansa na wɔde rema WTPA, nanso seesei ɔmansin kɔɔto no agye agyinam sɛ saa nhyehyɛe a wɔne WTPA yɛe no, na mmara mma kwan. Ɛno nti kɔɔto no de too gua sɛ Adansefo no adwumayɛbea ti a ɛwɔ Russia no, ɛnyɛ WTPA dea na mmom ɛyɛ Adansefo a wɔwɔ Russia no ara dea. Esiane sɛ Asɛnnibea Kunini no baraa Adansefo no wɔ 2017 na wɔkaa sɛ wɔbɛtɔn adan no ne ɛho biribiara nti, sɛ Adansefo no anni nkonim wɔ appeal no mu a, Russia aban no betumi agye adan no a ɔrentwentwɛn so koraa.

Wobedi asɛm no bere a abɔ anɔpa 11:30 wɔ Saint Petersburg Kuropɔn Kɔɔto, ul. Basseynaya, 6, St. Petersburg, Russia.

Wopɛ Sɛ Wubisa Asɛm a Frɛ:

David A. Semonian, Office of Public Information, +1-845-524-3000