Ná Gathie Barnett adi mfe nkron, na na ne nuabea Marie nso adi mfe nwɔtwe. Bere a wɔn sukuufo rekyia America frankaa no, wogyinaa hɔ komm de kyerɛe sɛ wobu nea wɔreyɛ no nanso wɔamfa wɔn ho anhyem. Wɔanso ho dae da sɛ gyidi a wɔdaa no adi no bɛma wɔakopue Asɛnnibea Kunini no anim na ayɛ asɛnni a ɛbɛsesa nneɛma. Asɛm yi sii wɔ afe 1943 mu. Ná Gathie Barnett ne ne nuabea Marie gye di sɛ Onyankopɔn nko ara na ɛsɛ sɛ wɔsom no. Ɛnyɛ wɔn nko ara na na wɔwɔ saa gyidi no. Yehowa Adansefo mmofra pii nso wɔ saa gyidi no bi na wotie wɔn ahonim a wɔde Bible atete no no.​—Asomafo Nnwuma 5:29.

Esiane akokoduru a Gathie ne Marie daa no adi nti, wɔpam wɔn fii Slip Hill Grade Sukuu a ɛwɔ West Virginia no mu. Wɔn papa de asɛm no kɔɔ asɛnnibea kosii sɛ ekopuee United States Asɛnnibea Kunini no anim. Asɛnnibea Kunini no buaa asɛm no June 14, 1943, na wɔde too gua sɛ sukuu biara ntumi nhyɛ mmofra sɛ wonkyia frankaa, na wɔmaa emu daa hɔ sɛ kyia a Yehowa Adansefo nkyia frankaa no nkyerɛ sɛ “wommu ɔman no anaa ne frankaa.” Mfe mmiɛnsa a na atwam no, na asɛm bi abɛtɔ Minersville School District ne Gobitis abusua no ntam ama United States Asɛnnibea Kunini no abu atɛn sɛ sukuu ahorow no wɔ tumi sɛ wɔhyɛ mmofra ma wokyia frankaa. Nanso West Virginia State Board of Education ne Barnette asɛm no maa kɔɔto no sesaa n’adwene. *

Atemmufo nkron a wodii asɛm no, emu nsia di maa Barnett abusua no. Bere a ɔtemmufo panyin Robert Jackson reka Asɛnnibea Kunini no gyinaesi ho asɛm no, ɔka maa emu daa hɔ fann sɛ: “Asɛntitiriw a ɛwɔ amammu mmara no mu a ɛrensesa da ne sɛ, aban panyin biara nni hɔ a obetumi ahyɛ mmara de akyerɛ nea ɛsɛ sɛ ɔmanfo yɛ wɔ amanyɔsɛm, ɔman ho dɔ, ɔsom anaa nneɛma ɛtete saa ho, na obiara ntumi nhyɛ obi sɛ ɔnyɛ biribi a ne gyidi mma no kwan.”

Yehowa Adansefo mmofra na wonyaa gyinaesi yi so mfaso pa ara, nanso ɔbenfo Andrew Koppelman a ɔkyerɛ mmara wɔ Northwestern Suapɔn mu kaa sɛ: “Ɛsɛ sɛ Amerikafo a wɔpere nnipa ahofadi da Yehowa Adansefo ase pa ara, efisɛ wɔn na wogyinaa ɔsɔretia a ano yɛ hyew ano wɔ America de pere hwehwɛɛ ahofadi a ɛnnɛ yɛn nyinaa anya so mfaso no.”

Ɛnyɛ United States kɔɔto ahorow nko ara na asɛnnibea no gyinaesi no aboa wɔn. Philip Brumley yɛ Yehowa Adansefo lɔya panyin na ɔka sɛ: “Barnettenom asɛm no de mfaso aba pa ara, efisɛ Asɛnnibea Kunini a ɛwɔ aman a edidi so yi nso agyina so abu atɛn: Argentina, Canada, Costa Rica, Ghana, India, Philippines, ne Rwanda. Europe Asɛnnibea a Ɛhwɛ Nnipa Ahofadi Ho Nsɛm So no nso de ayɛ adwuma.”

Afe 2006 mu no, wɔtoo nsa frɛɛ Gathie ne Marie ne animdefo bi kɔɔ Robert H. Jackson Center a ɛwɔ New York ma wɔbɔɔ wɔn asɛnni no ho nkɔmmɔ. Marie kaa sɛ: “Sɛnea asɛnni no kɔe no yɛɛ me dɛ pa ara, efisɛ ɛboaa mmofra a wodii yɛn akyi bae no.” Gathie nso de kaa ho sɛ: “Mekae sɛ bere bi ɔkyerɛkyerɛfo bi de me ba panyin kɔɔ ɔkyerɛkyerɛfo panyin hɔ sɛ wankyia frankaa. Ɔkyerɛkyerɛfo panyin no ka kyerɛɛ me ba no sɛ, ‘Ɛyɛ me sɛ wo tikya werɛ afi gyinae a Asɛnnibea Kunini no de too gua no.’”

Gathie asɛm a edi hɔ yi, Yehowa Adansefo nyinaa ne no yɛ adwene. Ɔkaa sɛ: “Yɛwɔ obu ma frankaa no ne nea egyina hɔ ma. Yenni biribiara tia frankaa no. Asɛm no ara ne sɛ, yennye nni sɛ ɛsɛ sɛ yɛsom anaa yekyia frankaa.”​—1 Yohane 5:21.